Read Nduga 2 KORINTUS 12 Bible Online

2 KORINTUS 12 - Nduga bible

2 KORINTUS 12

¹Wene yu-ge ebe lak mende-t nde, an-e mondok nindi kek tak posolat woramin-o. Alat nde, yawo-ge Nagawan Indo-nen wok norosola nabi nggwe nggal kaidnak min nam tak posola kaidnak min iri-ge yak kindimin-o.

²An naru nap, Kerisut ene wanidnak nap misig-e lengen empat belas woraige ombol nggwe-ge aid arem tap kenan ombol nggwe mondok teram iri me lek karuk lagaij-o. (Nde, iri-ge ndemeret at ebe lek karuk laidnak min yid, lak? Are, engena nak nde yij-a? An-e naru bug-o. Mbal Pem Nagawan nak aru-o.)

³Nde, lek karuk lagaid nap iri-ge an naru-o. (Nde, ap iri-ge ndemeret ebe lek karuk lagaid, lak? Are, engen nak nde lagaij-a? An naru bug-o. Mbal Pem Nagawan nak aru-o.)

⁴At iri na-ge o Pirandaus ibil lasola, iri me-nen kulidnggal-e, ki nap enmende nggwe-nen yugwi buk wene, wene yurak puk irit kulij-o.

⁵Ap iri-nen yidnak pem perak nde an-e nindi kek tak pimin-o. Alat nde, an nondomok nebem-e nindi kek tak pimin pug-o. Are, an ndeyak yidnak pem perak nde nindi kek tak pimin-o.

⁶An-net an nondomok nindi kek tak pelep nggal-e, an nindi kek pelep iri-ge ndemeret me, “Wid-nen yugwi nggal yusu-o” luk yak nururak pug-o. Alat nde, ap-nen an neberagolar-e, an-nen kwarosola kaidnak pem-nen na, an-nen yosola kulidnak pem-nen na, niyujwag-o luk, an-e nondomok nindi kek tak pimin pug-o.

⁷Nde, nam tak pidnak mende kwiye worak mende kagi iri bem an nindi kek ma naru, isile misik an norosolat wolmakluk an narem nggegetsa pij-o. Isile iri-ge Sere-nen ibil lobok yidnak an nindi teberak wolmakluk an nindi nggambu woroso-o.

⁸Iri andi rak noboso iri bem an-nen kenan pem Nagawan Indo emengen mbarosolar-e: “Yu kwat nubusu yu lak tak pi-o” luk emengen mbarigi-o.

⁹Alat nde, Nagawan Indo-nen nene erep nggarosolar-e: “Kat ndeyak yidnak pem an namawi-ge iminep mbal yusu me, an-nen idnak we wok ondoso elem-e kat kamanggim-e ndak-nen yusu-o” luk yij-o. Iri bem-e, Kerisut amawi an nebem mbumag-o luk an ndeyak yidnak pem an nindi kek tak posolar-e, an nalin nalen kasu-o.

¹⁰Kerisut ebem-nen ndeyak yosolat na, andi bandi rak nobogola na, anggun worak mende nebem mbosola na, lel mberel nobogola na, siri mbosolat na, an-e nalen kaso-o. Nde, an ndeyak yosola, ereya na-net namawi yoso-o.

¹¹An-e wid kwat yigi-t nde, kit-nen kwat nibidnak pem-net iri kwat yigi-o. Kit-nen kek tak nuburag-e an-et nde, an-e ebe lak mende nggal-et nde, yi kwarugwi ndi kwarugwi bem-e an-e wirik inpidnak nap ija lombok ereba inmin ndak ndak-net yusu-o.

¹²Wirik ibidnak nap-nen yusu-o luk yenggerak nuburak mende oboksa-ge kit kennggendumu-nen nindi mamak puruk kwarosolar-e, yenggerak purak mende min kagwi buk mende min kwiye worak mende min kwarosolat woragi-o.

¹³Lambuk tak inpidnak nap erep iri konak kwat onposolar-et nde, kit no mende bem-nen meya nggal kwat kinpigi-o. Angin tak konposolat-nen “Yongga nerer-o” luk yak kindigit lak yigi iri bem-nen meya rak kinpigi-a? Iri kwat konposolat meya kwat kinpigirik me, wiwa-o.

¹⁴Yawo kenan pem tak posolar-e, an-e kit kendam lobok yurak pem lid lud tak puruk worasu-o. Nde, kit kenarengge wanosolat, angin tak kinpimin pug-o. An-e kit kenarengge ukwe-nen yusu-ge lag-o. Kenpe perak nde nindingen keneyasu-o. Nde, li marik-nen it ineid iniya enmanggim silobulo ndok wurugwi bug-o. Are, ineid iniya-nen perak nde inlirak enmanggim silobulo ndok wurugwi-o.

¹⁵Nde, an-nen perak nde nalen min-et an narengge oboksa kenmanggim posolat, an nondomok niminep wesel korasolat yimin-o. Nde, an-nen nde kit kenabuwa kwarat kasola-ge, kir-e ngge luk-nen an nabuwa mariget nak kudtag-o?

¹⁶An-e ndemeret angin tak kinpigit lak yigi-o. Alat nde, kit-nen an nimin yogolar-e: “Lag-o. At iri-ge nonmbol pem lasolar-e, indi nggat nggat puruk nenare pij-o” luk yili-o.

¹⁷Nde, mepme-nen kit kendam wirik inpil lobok yigi nap ennggenggerak ap misik inggem pigepma kenarengge terak lesa wanigi-o?

¹⁸Titus na kit kendam lobok yuwakluk emengen mbarigirig-e, at totno mburuwakluk nennggam misik iri-ge an-nen ibil lobok yigi-o. Nde, Titus-nen-e kit kinsilobulo mbi terak lesa wanid, lak? Titus nenmbereg-e Konak Indi misiget iri na-nen yidnak yidnak nak kwarogolat, nit nunuwok na misiget nak pugwi bug-a?

¹⁹Kit-nen nenperagolar-e: “It iri-ge nit ninmbiri bem-e it enambikpebe lud tak nak kwarugwi nab-o luk yuwakluk engga iri mbatli-o” luk nenperali-t nde, iri-ge lag-o. Nir-e Mbal Pem Nagawan imbiri bem-et Kerisut ebem ala wene yu yili-o. Nennggamirak kenabuwa worak wa-e. Nit-nen kwatli mende oboksa-ge kit kinndi angin tubu yidnak iri mendak pogolat-nen kwatli-o.

²⁰An-e kit kendam wok yimin nggal-e, an nindi-n peraidnak kwarigit lak nde keneyamin-o luk numud kasu-o. Nde, iri nggal-et an-nen na kit kinndi-nen peraidnak mende kwarigit lak niyudtak iri-ge numud kasu-o. An yik keneyamin nggal-e, yuk puk yugwi nde, enlengen ale yugwi nde, insilepma yugwi nde, kuri wat wat woragwi nde, nobokpe kobokpe pugwi nde, yagap yagap pem ap onpok pugwi nde, inndi-n kek tak pugwi nde, narop karop kwarugwi nde kwarogolat woragola keneyamin-o luk, numud kasu-o.

²¹An tuguruk wok yimin nggal, kit kinmbiri bem Mbal Pem Nagawan-nen an ninggiri wuruwa iri-ge nanduk kwarogolat woraidnak nap-nen-e it meya kwarogolat woragwi-ge kop kap tobok tak kwarugwi min kwami terak ye unpugwi min kwarugwi buk mende kwarugwi min iri kwarugwi keya buruk kondok yigit lak ala karuk, an-e yip kwarat timin-o luk numud kasu-o.