Read Nduga 2 KORINTUS 13 Bible Online

2 KORINTUS 13 - Nduga bible

2 KORINTUS 13

¹Yawo kenan pem tak posolat kit kendam lobok yimin-o. Ap enpem pidnak wene-ge ap mberen ala na, ap kenan ala na-nen kinggiridnak wene bem-net wene iri luj-et yoso-o.

²Kit nanduk-nen meya kwarigep nap min ap erep oboksa min-e wene yu tuguruk yak kendeyeg-o. An-e mberen pem tak posolat kendam lobok yigirik-nen yak kindigi nar-o. Yawo na nin me woralat-net nde, iri wene-ge yak kundusu-o. An misik pem tak posolat kendam lobok yosolar-e, kenabuwa-o luk keya kinpimin pug-o.

³Kerisut-e an nemndam nggwe-nen wene yoso-o luk kir-e ndemerer-o luk yenggerak purak mende nde kore yili-o. Kerisut na kit kinmin-e ndeyak yusu bug-o. Are, kit kennggendumu-nen-e at amawi worak worasu-o.

⁴At ndeyak yidnak pem e lang pang tak pem wiriga-t nde, Mbal Pem Nagawan amawi bem-nen at uruk worasu-o. Nde nir-e at imin ndeyag-et worali-t nde, Mbal Pem Nagawan amawi bem-nen kit kenmanggim ala, at totno nunluk wulmul-o.

⁵Kit na kit-net kinndi mbenarer-o. Kir-e ndemeret kinndi angin tubu yidnak pem tugup lak worali, lak? luk kondomok kinndi ngarer-o. Kerisut Yesus-e nit nenarem worasu-o luk kenaru yili, lak? Nde, Yesus-e kenarem lak ala-ge, mborok tak pigep pem-nen-o.

⁶Nde, nit ninndi ngarogola, mborok tak pigit lak yige iri-ge kenaru tobog-o luk an nindi perasu-o.

⁷Kit meya kwarugup naru, nir-e Mbal Pem Nagawan eram tepan yili-o. Iri yili iri-ge, nir-e ombol nggwe yidnak nap nggal yik niniyujwaklug-e lag-o. Are, nir-e mborok tak pugwi nap nggal tak nonpogola-t nde, kit konak nak kwarobog-o luk-nen yili-o.

⁸Ndemeret wene iri na lugud tak pogolar-e, nir-e lugud tak kwarurag-e meya-o. Are, nit-nen kwatli iri-ge ndemeret wene bem-et kwatli-o.

⁹Nir-e ndeyag-et nde, kit kenmawi ala karuk, nit nenalin nenalen kali-o. Nde, kir-e iminep mbal yobok-nen nir-e kenmanggim tepan yili-o.

¹⁰Iri bem-nen an-e erepma woralar-et nde, engga yu mbal kundusu-o. Kit kendam wok yimindig-e, Nagawan Indo-nen wok niridnak amawi iri na bem nene amawi min yak kindimin naru, yawo-net engga mbal kundusu-o. Amawi wok nirid iri-ge, kit mbud tak kunpurak pem-e lag-o. Kit mendak kunpurak pem-et wok niridnak amawi-nen yusu-o.

¹¹Worok tak posolar-e, nanggamirak wa-e. Wiwa-o. Iminep mbal yobok-nen kwara kenmawi kondogolat wolmor-o. An-nen nggomo kindidnak wene oboksa wanogolat wolmer-o. Kinndi misiget nak woragolar-e, lambuksa wolmer-o. Nde, Mbal Pem Nagawan-e ap enabuwa kaso elem na, lambuksa woragwi elem na kit kinmin wolma-o.

¹²Kit na kit-net wa yak kerak mbogolat wolmer-o. Marak inpidnak nap oboksa-nen wa yak kindiga-o.

¹³Nagawan Indo Yesus Kerisut-nen we wok ondoso elem min Mbal Pem Nagawan ap enabuwa kaso elem min Konak Indi ebem woragolat nanggam kanggam woragwi elem min-e kit pidsa kinmin wolmag-o.