Read Nduga 2 KORINTUS 3 Bible Online

2 KORINTUS 3 - Nduga bible

2 KORINTUS 3

¹Tuguruk nit nondomok nentembel wanurag-a? Are, ap ere-nen yili nggal, nit nentembel wanidnak engga kit kinmbiri bem nuk kagolat, kit-nen mbal nindidnak engga nde nuk kagolat yul-a?

²Lag-o. Nit nentembel wanidnak engga-ge kit-nen yili-o. Engga iri-ge ap oboksa-nen enaru yogolat, kagolat maklug-e, nit ninndi arem mbarag-e kit-nen yili-o.

³Nde, Kerisut-nen mbaridnak engga nit-nen pil mburuwakluk ninggem pid engga iri-ge kit-net yili-o. Engga na-ge amburu bem-e mbarigit lag-o. Are, uruk nak woraso Mbal Pem Nagawan Indi bem-nen mbaridnag-o. Nde, kerepnen konidnak engga mbarugwi bem mbarigir-e lag-o. Are, ap inndi bem mbaridnak-nen yusu-o.

⁴Wene iri yili iri-ge Kerisut ebem nit ninndi-nen-e “Irit ma-o” luk Mbal Pem Nagawan ebem irit perali-o.

⁵Nit nondomok nenmawi bem-nen nit nenambik neneyabu nggal yabu yu wanili bug-o. Mbal Pem Nagawan at-net yabu wanurak nenpem tak poso-o.

⁶At nak-nen nenpem tak pidnak pem-nen nir-e ngget urul pidnak wene iri na ndugurugwi nap-nen yili-o. Urul pidnak wene iri-ge engga bem mbaridnak imiri mbarak pidnak wene-nen yusu-ge lag-o. Are, Konak Indi-nen idnak-nen yusu-o. Engga bem mbaridnak imiri mbarak pidnak wene iri-ge ap worak onposo-t nde, Konak Indi-ge ap unluk tak poso-o.

⁷Imiri mbarak pidnak wene iri-ge hurup “a,e” oboksa-ge kerep pem lel kasolat-nen mbarid wene iri-ge, wat momtak wene nde mbarij-o. Alat nde, wene iri wok tid tarem-e Mbal Pem Nagawan abinal pem-net wok tij-o. Abinal iri-ge lak agaij-et nde, Musa erare abinal-nen Isarael nap-nen at erare yik kudtag-e meya yamu-o.

⁸Alat nde, Konak Indi-nen wanoso eyabu-ge abinal kwarat lombog-o!

⁹Nit nenpem anggun worak mende purak wanidnak yabu iri perak abinal worak woragaij-o. Alat nde, nit nenpem mbaridnak wene iri na lak tak purak wanidnak yabu iri-ge abinal worak terak minik-net yusu-o.

¹⁰Nde, nanduk woragaid abinal iri-ge eyaya lak yamu-o. Yawo worasu abinal perak eyaya mondok kwarat-nen yusu-o.

¹¹Nde luru wolmomtak mende iri perak abinal worak woragaij-o. Alat nde, pem wolmomtak mende iri-ge abinal mondok kwarat worasur-o!

¹²Nit ninndi-ge wene iri bem mbung mbung tak woragolat me, nir-e kwiye lag-et yili-o.

¹³Musa-nen kwarid nggal nir-e kwatli bug-o. Isarael nap-nen abinal na lak lak mbosolat, lumu yosola yik kujwa naru Musa na sum pem at erare lemerak pij-o.

¹⁴Ndemeret, it inndi anggat lak nggal woraiga-o. Nde, iri kuri-nen yawo na ir-e nanduk urul pidnak wene engga na kagola-ge, entare lumurak pidnak sum iri-ge worasu-o. Kerisut at nak-nen sum na waburag-e ndag-o.

¹⁵Yawo-nen na irit, ir-e Musa-nen idnak imiri mbarak pidnak wene pempa wonarogola-ge, sum iri-nen it inndi lumurak puruk worasu-o.

¹⁶Alat nde, Mbal Pem Nagawan engga mbarak pem-nen Musa imin yosolar-e: “Ar-e nden karuk Nagawan Indo ambigit nggwe mborosola-ge, sum na wabij-o” luk yij-o.

¹⁷Nde, engga wene iri arem-e Nagawan Indo yidnak iri-ge Konak Indi min yij-o. Nde, Nagawan Indo Indi woraso sa iri me-ge ab-e weserak nak woragwi-o.

¹⁸Iri ala-ge, nit oboksa sum nentare bem na wabidnak me, papalo pem kaidnak nggal Nagawan Indo abinal iri-ge nit nentare bem worasu-o. Iri ala-ge, Nagawan Indo Indi na-nen nin tak nonposolar-e, at abage nggal tak nonposola-ge, abinal iri na nggok nggok mburusu-o.