Read Nduga 2 KORINTUS 5 Bible Online

2 KORINTUS 5 - Nduga bible

2 KORINTUS 5

¹Wene yu-ge nenaru-o. Nit nggweyak ma yu me luru woragwi nunuwi na mijarak pogola-ge, Mbal Pem Nagawan-nen nit nenmanggim wiridnak uwi mbi aid arem worasu-o. Nde, o iri-ge ininggi-nen wiridnak wi-ge lag-o. Are, woralik nalik wolmomtak wi irit worasu-o.

²Nde, nir-e yawo luru nggweyak ma wi yu arem woragolar-e, aid arem-nen wiridnak nunuwi iri na yesa wok nunduwag-o luk ukwe kwarat yogolar-e, yane witli-o.

³Nde, nunuwi iri yesa wok nunduwama-ge, nit ngenwa-ge wulmul pug-o.

⁴Nir-e nggweyak ma yu me luru wolmomtak wi na arem woragolar-e, angin worak mende nenpem pidnak iri bem-nen yane witli-o. Iri-ge nit nenpe, nggweyak ma mende yu yungguruwakluk-nen yili-ge lag-o. Are, nenpe ngget mende-ge taro iri na ombol pem yesa wok nondosola, pem-et unlug-et wolmomtak mende-nen luru wolmomtak mende iri lungguk mberak puwakluk-nen yili-o.

⁵Iri nggal nin tak nunpurak pem lid lud tak ninpid nab-e Mbal Pem Nagawan-net yusu-o. Nde, nit kwat nunpurak mende oboksa urul posolar-e, at Indi wok nindij-o.

⁶Iri bem, nir-e pempa kwiye lag-et worali-o. Nit nenpe yu arem woragolar-e, Nagawan Indo imin-e erepma worali-o luk nenaru yili-o.

⁷Nde, nit yawo mbitli yu-ge, nenlengen-nen kagwi mende bem mbitli-ge lag-o. Ninndi angin tubu yidnak pem-net mbitli-o.

⁸An-e tuguruk yak kundusu-o. Nir-e kwiye lag-et woragolar-e, nenpe yu keya buruk, Nagawan Indo imin wolmokluk at eram mbururak perak nde mondok nindingen-o.

⁹Iri bem-e, nit nenpe imin woragolat-nen na irit, nenpe keya buruk-nen na irit, at alen tak ubuwokluk nenmawi kwindili-o.

¹⁰Lag-e lag-o. Nit oboksa-ge Kerisut-nen ap enpem wene mbareyekluk kore yurak sa iri me wok yul-o. Iri me-nen-e ap enariktak-nen unluk woragolat-nen kwarogolat woraidnak na onggo wanogolar-e, konak nak kwaridnak ala na, meya kwaridnak ala na, onggo-ge ndak ndag-et wanuwa-o.

¹¹Nir-e Nagawan Indo aye kagwi nenaru me, ap enmengen mbatli-o. Mbal Pem Nagawan-e nit ninndi mondok nam-et kasu-o. Nde, an-nen perasolar-e, kit-nen na nit ninndi nam-et kali, lak? perasu-o.

¹²Nit nentembel wanogolat-nen wene tuguruk yak kindili-ge lag-o. Are, kit-nen nit nunnu kek tak pobokluk-nen yili-o. Iri yugup ala-ge, ap inndi arem woraso mende bem-e lak, are, ap onmbol nggwe nak kaidnak pem unnu kek tak pili nap iri na wene yak ondobog-o luk yak kindili-o.

¹³Nit ninndi wawa-nen yili ala-ge, Mbal Pem Nagawan amanggim-et yili-o. Nde, nit ninndi imin-net nde yogola-ge, kit kenmanggim-et yili-o.

¹⁴Nde, Kerisut-nen nit nenabuwa kaso elem-nen-e nit tena nunpuruk worasola me, nit-nen yebet kagolar-e, ap misiget nak-nen ap oboksa enmanggim wat yid iri bem-nen ap oboksa wat yikma-o.

¹⁵Ar-e ap oboksa enmanggim wat yid iri-ge, unluk worali nab-e it ondomok enmanggim wolma-o luk, ar-e it enmanggim wat luk, uruk tak pid nap iri na amanggim-et wolmakluk-nen wat yij-o.

¹⁶Iri bem, nir-e ap enpage mbenarogolar-e, ki nap-nen irit wurugwi mende bem-nen mbenatli bug-o. Nanduk nir-e Kerisut abage mbenarogolar-e, ki nap-nen irit wurugwi mende bem mbenarige-t nde, yawo-nen-e iri nggal kwasa at abage mbenatli bug-o.

¹⁷Ta-nen nde Kerisut imin kundik worasola-ge, at abage ngget tak ibidnak-nen yusu-o. Abage nanduk na-ge lak lug-e, abage ngget irit kwat yamu-o.

¹⁸Iri mende oboksa-ge Mbal Pem Nagawan-net kwarusu-o. Kerisut ebem-nen Mbal Pem Nagawan-nen-e at imin sirid nap nir-e at ondomok imin lambuk tak ninpij-o. Iri rak puruk, nin nap na at imin lambuk tak unpurak yabu na-ge nit nenpem pamu-o.

¹⁹Nit-nen yili wene-ge yu-o: It-nen meya yidnak na wonarigit lag-et, Mbal Pem Nagawan-nen-e Kerisut ebem ap oboksa at ondomok imin lambuk tak inpij-o. Nde, at-nen-e at imin lambuk tak unpurak wene iri-ge nit nenpem pamu-o.

²⁰Iri ala-ge, nir-e Kerisut-nen ninpil lobok yidnak nap-nen yili me, nit nenemende nggwe-nen Mbal Pem Nagawan-nen-e kenmengen mbarusu-o. Nde, Kerisut unu bem nit-nen kenmengen mbarogolar-e: kondomok-net Mbal Pem Nagawan imin lambuk tak kunpuwakluk eram lobok yer-o luk yak kindili-o.

²¹Kerisut ebem-nen Mbal Pem Nagawan-nen lud tak nak kwaroso nggal tak nenpeyeklug-e, Kerisut na meya yoso bug-et nde, nit nondolmasa Mbal Pem Nagawan-nen-e meya yoso nap tak ibij-o.