Read Nduga 2 KORINTUS 7 Bible Online

2 KORINTUS 7 - Nduga bible

2 KORINTUS 7

¹Nanggamirak kenabuwa worak wa-e. Urul pidnak wene oboksa-ge nit-nen idnak me, nit na nit-net nondomok marak nap yogolar-e, nenpe min ninndi min kik tak nunpurak mende iri marak puruk, Mbal Pem Nagawan indi aye min woragolar-e, mondok marak iminep mbarak irit wolmog-o.

²Kir-e kinndingen tak nenper-o. Nit-nen-e ap mbi lel mberel ibigit lak, ap mbi ombol pem lagit lak, ap mbi ebem-nen lesa wanigit lak yige-o.

³Wene yigi iri-ge, anggun worak mende kit kenpem peyekluk-nen yigi-ge lag-o. Are, nit ninndi kit kenpem pidnak me, nir-e nunluk woragolat na, wat yogolat na totnor-o luk yanem yak kindige nar-o.

⁴An-e kit kinmin-e wene nam-et nak yoso-o. An-e kit kenpem-nen na nindi kek tak poso me, anggun worak mende kwarat nenpem mbidnak worasu-t nde, an nindi mondok yanggonak woralar-e, nalin nalen kwarat worasu-o.

⁵Nde, Makeronia wok luk ombol nggwe-nen-e nir-e nenaboro yamuksa woragit lag-o. Nin me, nin me na nir-e anggun panggun nak kagolar-e, ap erep inmin ngguno nak pogolat, nenarem-nen-e kwiye kagolat woraige-o.

⁶Alat nde, inndi teberak nap yanggonoso Mbal Pem Nagawan-nen-e nit ninndi yanggonosolar-e, Titus na ibil lobok yij-o.

⁷At lobok yid pem nak ninndi yanggok yigit lag-o. Are, kit-nen at indi yangunigep wene iri-nen nindi kwarat yangunij-o. At-nen kit-nen kwaridnak yak nondosolar-e, nit niniyudtak kindingen yili wene min, kit kinndi puru yili wene min, an nimiri yurak pem kenmawi kwindili min yak nondosola, an nalin nalen mondok kwarat yusu-o.

⁸Nde, an mbal kindigi engga iri-nen kit kinndi pururak pid ala-ge, “Noluk mbarigi-a?” luk perasu bug-o. Engga iri-nen ereya na-net kit kinndi puru rak posola karuk, “Noluk mbarigi-a?” luk peragi-t nde,

⁹yawo nalin nalen kasu-o. Kit kinndi puru bera rak pigi bem-nen nalen kasu-ge lag-o. Are, kit kinndi puru bera luk, kondok yigep ala-nen nalen kasu-o. Kit kinndi puru bera yigep iri-e Mbal Pem Nagawan indi-n pidnak pem-net yidnak me, nit-nen-e mariger-o luk meya rak kinpigit lag-o.

¹⁰Mbal Pem Nagawan indi-n pidnak pem-nen ap inndi puru bera yugwi iri-nen-e ap inndi kondok yogola, inmiri yurak pem-nen kwaroso-o. Nde, iri yidnak ala, “Noluk iri nggal kwat ninpij-a?” yugwi bug-o. Alat nde, nggweyak ma yu-nen yidnak inndi puru bera yugwi iri-nen-e wat yugwi elem kwarak poso-o.

¹¹Nde, Mbal Pem Nagawan indi-n pidnak pem-nen kit kinndi puru bera yidnak iri-nen kit kenarem engen kwarat pid iri ker-o: Kir-e kondomok kenlat mbarogolat, kinsili-nen kinsilepma yogolat, kwiye yogolat, kenmawi kondogolat, ap-nen meya yidnak pem angin worak mende enpem purak kinndi yogolat yili irir-o. Iri kwarogolat-nen-e, wene iri oboksa bem-e kit-nen meya mbi kwatli buk irit yak nindili-o.

¹²Nde, an-nen engga iri mbal kindigi iri-ge, ap mbi meya yidnak pem-nen ala na, at meya rak ibidnak pem-nen ala na mbarigit lag-o. Are, yu bem-net engga na mbal kindigi-o: Mbal Pem Nagawan imbiri bem-et kir-e nit nenabuwa kwarat kagwi iri-ge kit nam-et kabokluk-nen mbal kindigi-o.

¹³Iri bem-nen nit ninndi kwarat yanggwinij-o. Nde, nit ninndi yanggwinidnag-e iri nag-e lag-o. Kit pidsa-nen Titus kwarat indi yangonogola, at alen kwarat kaidnak iri na bem-nen nit-nen na nenalin nenalen kwarat kaige-o.

¹⁴An-nen Titus imbiri bem kit kentembel kwarat wanigirik me, kit-nen an ninggiri rak pigit lak yigeb-o. Nir-e pempa ndemeret wene nak yak kondogolat woraige-o. Iri nggal, nit-nen Titus imbiri bem kentembel wanige wene na lud tag-et yij-o.

¹⁵An-nen yebet keneyasolar-e, kir-e at-nen yidnak yidnak nak kwarogolat, kinndi kwiye min konowak lele min-et kit-nen kirip koropsa wa yak togolat yigep iri na yebet kasolar-e, at-nen kit kenabuwa-ge kwarat kasu-o.

¹⁶Yi mende ndi mende bem kir-e kenpam-et kwatli kagi luk kenperasolar-e, an-e nalin nalen kasu-o.