Read Nduga 2 KORINTUS 8 Bible Online

2 KORINTUS 8 - Nduga bible

2 KORINTUS 8

¹Nanggamirak wa-e. Makeronia woragwi lambuk tak inpidnak nap ennggendumu-ge Mbal Pem Nagawan-nen we wok ondoso elem wok indidnak wene-ge kenaru rak pul-o.

²Andi bandi mende kwarat it enpem mbosolat, inndi kwarat ngarij-et nde, it enalin enalen mondok kwarat kagolar-e, it insilobulo lag-et nde, silobulo-ge kasaba inndi lubug-et pogolat woraiga-o.

³It-nen kwariga wene ndemeret kenggel kendeyeg-o. It enarengge ndak ndag-et wok nindiga-o. Alat nde, terak menna wok nindiga-o.

⁴Marak nap yongga undugwi enabuwa elem wanogolar-e, it enmanggim silobulo pul-o luk it inndi mbek tak pem-net nit nenmengen kiri keresa mbariga-o.

⁵It-nen iniksa puwag-o luk peraige iri na ombol nggwe terak menna piga-o. Nandug-er-e it na it-net enpe-ge Nagawan Indo wok tiga-o. Imbirig-e Mbal Pem Nagawan indi-n pidnak pem-et it inndi-ge nit nenpem na piga-o.

⁶Iri bem-e, ap enabuwa kagwi yabu tel kwirid nap Titus na-nen kit kendam lobok luk, yabu iri na kit kennggendumu iminep mbal makluk at emengen mbarige-o.

⁷Kir-e yi mende ndi mende bem oboksa winde worali-o. Nde, iri-ge, kinndi angin tubu yugwi bem na, wene yugwi bem na, enaru yugwi mende bem na, ap yongga ondogolat kenmawi kundugwi bem na, nit nenabuwa kali bem na yili-o. Iri bem-e, ap enabuwa kagwi yabu bem-nen na kit kinndi lubug-et ap wok ondogolat tobog-o luk-nen yige-o.

⁸An-nen-e “Iri nggal-et kwarurag-o” luk yak kundusu bug-o. Are, ap erep-nen enmawi min-et yongga undugwi wene na mirik konposolar-e, kit-nen kinndi mbek tak pem-et ap enabuwa kali, lak? luk-nen kinndi ngarusu-o.

⁹Nit Nagawan Indo Yesus Kerisut-nen we wok ondoso elem iri-ge kir-e kenaru nar-o: At isilobulo kwarat worag-et nde, kit kenmanggim-nen isilobulo lak nap agaij-o. Iri agaid iri-ge at isilobulo lak yidnak pem-nen kit kinsilobulo kwarat winde rak kenpeyekluk-nen iri yij-o.

¹⁰Wene iri bem an nindi-n yebet kasu-ge yu-o: Olengen nanduk iri bem-net kit-nen-e wanuwog-o luk, yabu na tel kwirigep iri-ge yawo-nen worok tak purag-e kit kenmanggim-e op nggal kasu-o.

¹¹Iri bem-e, yawo-net yabu na-ge worok tak per-o! Yabu na wanogolar-e, “Iri nggal-et wanul-o” luk kenalen min-et wanigep iri nggal ndak ndak yabu na worok tak pogolar-e, kit kininggem worasu mende bem-net wanogolat wolmer-o.

¹²Kir-e kenalen min-et pugup ala-ge, Mbal Pem Nagawan-nen kit kininggem woraso mende iri ndak ndak irit wanuwa-o. Nde, enarengge lak kagir-et nde, Mbal Pem Nagawan-nen “Wok niri-o” luk yoso bug-o.

¹³Ap erep na enalen tak onpogolat, anggun panggun kit kenpem purag-o luk yigir-e lag-o. Are, kit min it min-e ndak ndak kwarobokluk-net yigi-o.

¹⁴Yawo-ge kit kinsilobulo kwarat iri-ge it insilobulo lak nap iri wok undurag-o. Nde, nin tarem-e kit kenarengge lak woragola-ge, it-nen-e insilobulo kwarat worasola-ge, wok kunduwa-o. Iri kwarogolar-e, kir-et, ir-et kenarengge-ge ndak ndak wolma-o.

¹⁵Mbal Pem Nagawan engga bem-nen yosolar-e: “Kwarat ndok wirid nab-e terak minik nggal yigit lag-o. Nde, mariget ndok wirid nab-e we mariget nggal yigit lag-o” luk yij-o.

¹⁶Nir-e kit yongga kundurak pem ninndi embem yili nggal, Mbal Pem Nagawan-nen kit yongga kundurak pem Titus na indi embem wok tid iri bem nit Mbal Pem Nagawan wa yak tili-o.

¹⁷Nit-nen nggomo wirige wene-ge at alen min-et wanij-o. Wanurug-e, at amawi puruk, at ondomok indi-n puruk kit kendam wok yurak peragaij-o.

¹⁸At imin ibil lobok yogolar-e, nennggam misik, aid wene yak indidnak pem lambuk tak inpidnak nap oboksa-nen at unu kek tak pugwi nap irit nit-nen ibil lobok yili-o.

¹⁹Iri nag-e lag-o. Are, lambuk tak inpidnak nap-nen at iri len obogolar-e, nir-e ap enabuwa kagwi yabu yu wanogola, nit ninmin waring kujwakluk len ibiga-o. Yabu yu wanogolar-e, Nagawan Indo unu kek tak puwokluk-nen na, ap yongga ondogolat nenalen min yongga indili nam tak puwokluk-nen na wanili-o.

²⁰Inndi lubug-et Mbal Pem Nagawan amanggim pidnak silobulo kwarat yu tena woragolar-e, ap-nen nit nonpok puwa naru, nir-e mondok kwara tena worali-o.

²¹Nir-e Nagawan Indo indi aye nak-nen kwatli-ge lag-o. Are, ki nap inndi aye min-et kagolat-nen nir-e mot mot nak kwatli-o.

²²Iri bem-e, it mberen nap inmin-e nit nennggam misik ibil lobok yili-o. Nit-nen at iri indi ngal tenak woraige nggal-e, ap yongga undurak pem-e indi embem nde kaige-o. Nde, yawo-ge mondok at indi kit kenpem pidnak me, kit yongga kendeyekluk at amawi kundusu-o.

²³Titus iri perak nde, nannggam an totno yabu wanugwi nap, at totno yongga kundugwi nap-nen yusu-o. Nde, nennggamirak mberen at imin waring kali nap iri perak nde, lambuk tak inpidnak nap-nen wirik inpidnak nap, Kerisut unu kek tak pugwi nap-nen yili-o.

²⁴Iri bem-e, nit-nen kit kentembel wanili na ndemerer-o luk kunpurujwak-nen kir-e lambuk tak inpidnak nap oboksa inmbiri bem ap enabuwa kagwi mende bem kwara enabuwa ker-o.