Read Nduga NGGALATIA 2 Bible Online

NGGALATIA 2 - Nduga bible

NGGALATIA 2

¹Olengen empat belas woraruk, an-e Mbaranabas imin luk tuguruk Yerusalem mborosolar-e, Titus na waruk mbirigi-o.

²Mbal Pem Nagawan-nen-e: “Iri me-t li-o” luk yak norosola-nen lagi-o. Lagirig-e, nanduk wanigi yabu min yawo wanusu yabu na min ebe lak mende ma naru, it unnu kek tak nap enarik inmbiri bem an-nen-e enlem nin nap aid wene yak indigi wene iri na yak indigi-o.

³An totno mbirige nap Titus na elem-e Yunani nab-et nde, “Mondok iye ambasap waburag-o” luk yigir-e lag-o.

⁴Alat nde, ennesiget yogolar-e nir-e konowe konowot-nen yili-o luk, nit ninmin lambuksa wene mbariga nap erep-nen-e at iye ambasap waburak yiga-o. It iri na-ge mbik mbok lobok yigarik, nendam ngguruk, nir-e Kerisut Yesus ebem-nen weserak woragwi na mbenat nunpuwokluk nggwigarig-e, teberak nunpuwokluk yiga-o.

⁵Alat nde, ndemeret aid wene na kit kinmin tugup lak wolmaklug-e, an-e mariger-o luk tet it inndi aye-nen e-o yigir-e lag-o.

⁶Alat nde, ap sarok iri-ge (it unnu kek tak pidnag-e an-nen nggulok tak pimin pug-o. Mbal Pem Nagawan-nen-e ap entare kaidnak pem mbenat onposo pug-o) ap sarok iri na-nen-e enne amawi min yak niriga-t nde, nin wene mbi yak nirigit lag-o.

⁷Are, Yawuri nap aid wene yak unduwakluk, Mbal Pem Nagawan-nen Peterus ebem pid nggal, iri nggal-et enlem nin nap aid wene yak unduwakluk, an nebem pidnak iri-ge ir-e yenggerak piga-o.

⁸Nde, Yawuri nap enmanggim Peterus-e wirik ibidnak nap kwat momtak amawi wok tid, at Mbal Pem Nagawan iri na-net an na enlem nin nap enmanggim wirik nibidnak nap kwat momtak amawi wok nirij-o.

⁹Iri ala-ge, it-nen-e Mbal Pem Nagawan-nen we wok ondoso mende an wok niridnak na karug-e, ap sarok Yakobus min Peterus min Yoanes min-nen-e an min Mbaranabas min nininggi tena buruk, wa yak kerak mbogolar-e, nit ninndi misiget yogolar-e, yu nggal yige-o: Nit nenmbereg-e enlem nin nap endam mborogolat, nde, ir-e Yawuri nap endam mborogolat mul-o luk yige-o.

¹⁰It-nen yogolar-e: “Yu nak perak nde keya burak pug-o. It insilobulo lak nap iri-ge meme rak unpurak pug-o” luk yak nindiga-o. Nde iri-ge an-e iri kwarurak pem an namawi kondoso-t nde yak niriga-o.

¹¹Peterus na Antiokia wok yamu-ge, ar-e mborok tak nggwe kwaridnak me, ap inmbiri bem-et inggiri wirigi-o.

¹²Yakobus-nen inpil lobok yidnak nap iri me wok yigit lak ma-ge, Peterus-nen-e nennggamirak enlem nin nap na inmin totno ningga-t nde, it iri na wok yogolikma-ge, iniye ambasap wabugwi nap iri na inndi aye-nen Peterus-e it enlem nin nap keya unpuruk, it inmin ninggit lak woragaij-o.

¹³Iri ala-ge, Yawuri nap erep-nen na Peterus-nen kwaridnak karuk, at imin totno ap inndi aye kagolat woraiga-o. Nde, Mbaranabas na irit, it-nen lugud tak nggwe kwaridnak karuk, it-nen kwariga kwarij-o.

¹⁴Nde, an-nen yik eneyasolar-e, it-nen kwaridnag-e ndemeret aid wene iri-nen yidnag-e ndak ndak kwarigit lak ala karuk, ap pidsa inmbiri bem-et an-nen Peterus na yak tosolar-e: “Kar-e Yawuri nab-et nde, Yawuri nap-nen kwarugwi keya buruk, enlem nin nap-nen kwarugwi mende kwarosola me, kar-e nggeluk-nen kene amawi min-et enlem nin nap inmin-e: ‘Yawuri nap-nen kwarugwi mende-t kwarer-o’ luk yak undusu-o?”

¹⁵Nir-e nenlem-e Yawuri nab-er-o. Nir-e meya yugwi nap, enlem nin nab-e lag-o.

¹⁶Alat nde, wene yu nir-e nenaru-o. Imiri mbarak pidnak wene-nen yidnak yidnak nak kwaridnak pem-nen ap lud tak onposo bug-o. Inndi-ge Yesus Kerisut ebem angin tubu yidnak pem-net lud tak onposo-o. Nit-nen na irit, Kerisut Yesus ebem ninndi angin tubu yige iri-ge, lud tak nunpuwakluk-nen ninndi-ge Kerisut ebem angin tubu yige-o. Nde, imiri mbarak pidnak wene-nen yidnak yidnak kwaridnak pem-nen-e lud tak nenpelep pug-o. Imiri mbarak pidnak wene-nen yidnak yidnak nak kwaridnak pem-nen-e ap lud tak onposo bug-o.

¹⁷Alat nde, nit-nen nde Kerisut ebem-nen lud tak nak nunpuwakluk nenmawi kunduruk tu kore yili-t nde, nit Yawuri nab-et nde enlem nin nap nggal meya yugwi nde ala-ge, iri-nen-e Kerisut-e meya kwarugwi elem ndegel poso-nen yusu-o luk eberaul-a? Mondok lag-o.

¹⁸Nde, an-nen nde an-nen mijarak pidnak mende tuguruk worosolar-e, iri kwarosolar-e, an-e nam-et imiri mbarak pidnak wene kuruk toso nab-et kwarusu-o.

¹⁹Nde, imiri mbarak pidnak wene bem-e an-e wat yigi-o. Mbal Pem Nagawan amanggim nak nuruk worayekluk imiri mbarak pidnak wene arem-nen wat yigi-o. An-e Kerisut imin e lang pang tak pem nindiga-o:

²⁰An nuruk worasu yu-ge an-nen nuruk worasu-ge lag-o. Are, Kerisut perak nde an narem uruk worasu-o. Nde, yawo an nuruk worasu yu-ge, an nabuwa-nen at-net at ambikpebe iminep wesel koragaid nap, Mbal Pem Nagawan Ambara ebem nindi angin tubu yidnak pem-net nuruk worasu-o.

²¹An-nen-e Mbal Pem Nagawan-nen we wok ondoso elem iri-ge nimbir-o yimin pug-o. Imiri mbarak pidnak wene bem-nen ap lud tak nak onposo nggal-nen-e Kerisut-e wewesa wat yeleb-o!