Read Nduga NGGALATIA 3 Bible Online

NGGALATIA 3 - Nduga bible

NGGALATIA 3

¹Wid inndi worak Nggalatia nap wa-e! No mende kenarem nggwij-o? Yesus Kerisut nae lang pang tak pem wat yidnak wene kinmbiri bem nam-et yak kindidnak nar-o!

²Wene misiget yu nak yak nerer-o: Imiri mbarak pidnak wene-nen yidnak yidnak nak kwarigep pem-nen Konak Indi wanigep, lak? Are, aid wene kuluruk, iri bem kinndi angin tubu yigep pem-nen Konak Indi wanigeb-a?

³Kir-e noluk-nen wid nggal yili-o? Konak Indi bem-net tel kwirigeb-et nde, yawo-ge nggweyak ma nap-nen kwarugwi bem-nen worok tak pugub-a?

⁴Kwat kinpidnak mende pidsa-ge ebe lak mende-nen yusu-a? Kit kwat kinpidnak iri na ebe lak mende yurak iri-ge meya-o.

⁵Mbal Pem Nagawan-nen-e Konak Indi we wok kondosolat, kit kennggendumu-nen kwiye worak mende kwarusu iri-ge, kir-e imiri mbarak pidnak wene-nen yidnak yidnak nak kwarogola-nen iri kwarusu, lak? Are, kir-e aid wene kuluruk, iri bem kinndi angin tubu yigep pem-nen kwarusu-a?

⁶Iri nggal-et Abaram na Mbal Pem Nagawan ebem indi angin tubu yij-o Nde, at indi angin tubu yidnak pem-nen Mbal Pem Nagawan-nen eberasolar-e, lud tak nak yoso eberagaij-o.

⁷Iri ala-ge, inndi angin tubu yidnak nab-e ndemeret Abaram ilirak-nen yili-o luk kenaru mer-o.

⁸Enlem nin nab-e inndi angin tubu yidnak pem-net Mbal Pem Nagawan-nen lud tak nak unpurak wene na awo ma-net aru luk, Mbal Pem Nagawan-nen at engga bem mbarosolar-e, aid wene-ge Abaram yak tosolar-e: “Kat kebem-net yi nap ndi nap enlem pidsa-ge imbiringgat tak unpuwa-o” luk yak tij-o.

⁹Abaram na at indi angin tubu yidnak pem inbiringgat worak woragaid na nggal, iri nggal-et inndi angin tubu yuwa nab-e inmbiringgat worak nab-et wolmar-o.

¹⁰“Imiri mbarak pidnak wene-nen yidnak yidnak nak kwarosolat woramin-o” luk perali nab-e imbiri lamut urugwe nggwe worali-o. Nde, Mbal Pem Nagawan engga bem-nen yosolar-e: “Imiri mbarak pidnak wene-nen yidnak yidnak pik paksa kwarigit lak nab-e imbiri lamut worasu-o” luk yij-o.

¹¹Nde, imiri mbarak pidnak wene bem-e Mbal Pem Nagawan-nen-e ap lud tak nak onposo bug-o luk nam-et kali-o. Mbal Pem Nagawan engga mbarak pem-nen yosolar-e: “At indi angin tubu yidnak pem-nen Mbal Pem Nagawan imin lud tak nak ibidnak nab-e urug-et wolma-o” luk mbarij-o.

¹²Alat nde, imiri mbarak pidnak wene iri-ge inndi angin tubu yugwi elem min parig-e lag-o. Are, Mbal Pem Nagawan engga mbarak pem-nen yosolar-e: “Imiri mbarak pidnak wene-nen yidnak yidnak nak kwaruwa nab-e iri kwaridnak pem-net uruk wolma-o” luk mbarij-o.

¹³Alat nde, Kerisut-e imiri mbarak pidnak wene-nen imbiri lamut tak ninpidnak iri na inggiyem-nen nonnggo buruk weserak nenpeyekluk, nit nenmanggim imbiri lamut nde agaij-o. Mbal Pem Nagawan engga bem-nen yosolar-e: “E bem panggarak inpidnak nab-e inmbiri lamut mag-o” luk yij-o.

¹⁴Mbal Pem Nagawan-nen Abaram urul yak tidnak imbiringgat mende iri-ge Kerisut Yesus ebem-nen enlem nin nap wok unduwakluk, nit-nen na ninndi angin tubu yidnak pem Mbal Pem Nagawan-nen urul pidnak Konak Indi wanuwakluk, Kerisut-e imbiri lamut agaid irir-o.

¹⁵Nowe nowosi wa-e. Ki nap-nen kwarugwi mende bem mbi ndak wereyeg-o: Mberen nap-nen-e inndi misiget luk, “Iri nggal kwarurag-o” luk, urul pidnak engga bem unnu mbara mondok wat tak pidnak me, nin nap-nen uruk pidnak wene na lak tak pogolat, nin wene nambek tak pogolat yurag-e meya-o.

¹⁶Nde, Mbal Pem Nagawan-nen “Iri nggal timin-o” luk, urul posolar-e, Abaram min at-nen wigarak min irit yak indij-o. Wene iri-nen yosolar-e: “At-nen wigarak lolo-o” luk, ap kwarat inmin yij-e lag-o. Are, at-nen yosolar-e: “Kat ndet ubugun nab-o” luk yid na-ge ap misiget, Kerisut nak imin yij-o.

¹⁷An-e yu peraruk-nen yusu-o: Mbal Pem Nagawan-nen watsa urul pidnak wene na-ge olengen empat ratus tiga pulu (430) woraruk ombol nggwe-nen nam yidnak imiri mbarak pidnak wene na-nen-e Mbal Pem Nagawan-nen urul pidnak wene iri na lak tak puruk, amawi lak tak purag-e mondok lag-o.

¹⁸Nde, imiri mbarak pidnak wene bem-nen imining angge wok indidnak ala-ge, urul pidnak wene-nen idnag-e lag-o. Alat nde, Mbal Pem Nagawan-nen Abaram we wok tid iri-ge, at-nen urul pidnak wene iri na bem-net we wok tij-o.

¹⁹Iri ala-ge, imiri mbarak pidnak wene iri-ge ngge kwarurak pem-nen nam tak pij-o? Meya kwarugwi nam tak puwakluk-nen nambek tak pid iri-ge Abaram-nen wigarak lobok yuwa-o luk urul yak tidnak nap na lobok yigit lak worala-ge, imiri mbarak pidnak wene iri-ge woragaij-o. Nde, imiri mbarak pidnak wene iri-ge aid nap enpem pamu, ap misig-e ngarak koro na inggem pij-o.

²⁰Nde, ap misiget nak worala-nen-e ngarak koro mbi wolmomtag-e meya-o. Nde, Mbal Pem Nagawan-e misiget nak-nen yusu-o.

²¹Iri ala-ge, imiri mbarak pidnak wene iri-nen-e urul pidnak wene na imin-e wim mbarak nggal worasu, lak? Mondok lag-o. Unluk wolmomtak elem wok nundurak imiri mbarak pidnak wene wok nindid nggal-e, imiri mbarak pidnak wene iri-nen-e Mbal Pem Nagawan imin lud tak nak nenpeleb-o.

²²Alat nde, Mbal Pem Nagawan engga bem-nen yosolar-e, nggweyak ma nap oboksa-ge meya kwarugwi elem urugwe nggwe rak ninpidnak worali-o. Iri bem-e, inndi-ge Yesus Kerisut ebem angin tubu yidnak nap-nen urul pidnak na-ge wok unduwa-o.

²³Alat nde, inndi angin tubu yurak tarem wok yigit lak ma-ge, imiri mbarak pidnak wene na-nen-e perena keya ninpidnak woraige-o. Nde, wene na-nen perena keya ninpidnak woraige iri-ge, inndi angin tubu yurak elem na nam tak puwakluk iri kwasa woraige-o.

²⁴Iri ala-ge, Kerisut lobok yigit lak ma-ge, imiri mbarak pidnak wene iri-ge nit mul nondoso nap nggal woragaij-o. Nde, Kerisut na lobok yamu-nen-e ninndi angin tubu yidnak pem-nen lud tak nak ninpij-o.

²⁵Nde, inndi angin tubu yugwi na wok yidnak me, mul nondoso iri na urugwe nggwe worali bug-o.

²⁶Nde, kit pidsa Kerisut Yesus ebem kinndi angin tubu yigep pem-e Mbal Pem Nagawan ilirak-nen yili-o.

²⁷Kerisut imin kundik yogolar-e, yi mat kinpidnak nap kit oboksa-nen-e Kerisut imin nggetlel yigeb-o.

²⁸Iri bem-e, Yawuri nab-o yurak na lag-o. Yunani nab-o yurak na lag-o. Ndegel unpugwi nab-o yurak na lag-o. Wisirik woragwi nab-o yurak na lag-o. Ab-o yurak na lag-o. Kwami-o yurak na lag-o. Kit oboksa-ge Kerisut Yesus ebem-e misiget nak kwat yili-o.

²⁹Alat nde, kit nde Kerisut arengge ala-ge, kit na Abaram-nen wigarak-net yili me, Mbal Pem Nagawan urul pidnak iri na wanurak nap-nen yili-o.