Read Nduga NGGALATIA 4 Bible Online

NGGALATIA 4 - Nduga bible

NGGALATIA 4

¹An-e yu yosolat-nen yigi-o: At eid isilobulo winde yurak la iri-ge yi mende ndi mende winde-t nde, ar-e la marik worala-ge, ndegel oboso nap nggal-et woraso-o.

²Alat nde, at eid-nen urul pidnak tarem awo wok yigit lak ma-ge, la iri na-ge ndugurugwi nap min mul tugwi nap min ininggem woraso-o.

³Iri nggal-et, nit-nen na li marik nggal woragolar-e, nggweyak ma yu me kek tak woragwi inndi na ininggem woragolat, it ndegel unpugwi nap woraige-o.

⁴Alat nde, iri kwarurak tarem-e ndak yosola-ge, Mbal Pem Nagawan-nen-e at ambik ambara ibil lobok yosola, at ambara na-ge ki kwami-nen ndet ebamu-ge, imiri mbarak pidnak wene urugwe nggwe worala-ge,

⁵imiri mbarak pidnak wene urugwe nggwe woraidnak nap nonggo buruk weserak nunpuruk, Mbal Pem Nagawan ilirak tak nunpuwakluk ibil lobok yid irir-o.

⁶Kir-e ndemeret at ilirak-nen yili-o luk mirik kenpeyeklug-e, Mbal Pem Nagawan-nen at Ambara Indi-ge nit ninndi arem ibil lobok yosola, at Indi na-nen wene mbo bosolar-e: “Neid wa-e. Neid wa-e” yusu-o.

⁷Iri bem-e, kar-e ndegel oboso nab-e lag-o. Kar-e at ambara-net yusu-o. Nde, kar-e at ambara me, Mbal Pem Nagawan-nen-e at arengge nde winde rak kibij-o.

⁸Nanduk kir-e Mbal Pem Nagawan kenaru buk woragolar-e, Mbal Pem Nagawan nggal-e lag-et nde, ebe lak kugi iri na ndegel ubugwi nap woraigeb-o.

⁹Alat nde, yawo-ge kir-e Mbal Pem Nagawan kenaru luk — are, yawo-ge Mbal Pem Nagawan-nen kit aru yij-o luk yurag-et nde — nggweyak ma kugi ndeyak, arengge lak kugi na kir-e tuguruk ndegel ubuwokluk, nden karuk eram mbururak kinndingen-a?

¹⁰Kit-nen-e iri tarem ala na, waneya tarem ala na, nggulok sakwi tarem ala na, olengen iri tarem ala na, iri nak kwara nggok tak pogolat worali-o.

¹¹An-e kit kennggendumu yabu wanosolat woragi-ge ebe lak mende nde ma-o luk, numud keneyasu-o.

¹²Nowe nowosi wa-e. An nebage nggal-et mer-o luk, kenmengen mbarusu-o. Nde, an na kit kenpage nggal-et kwat yusu-o. Kit-nen-e an nimin meya mbi kwarigit lag-o.

¹³Nandug-er-e an nebe kugi niridnak me, aid wene kit yak kondosolat woragi iri-ge kenaru nar-o.

¹⁴Alat nde, an nebe andi kaso iri-ge kit kinndi ngarurak mende nggal agaij-et nde, kit-nen-e kinsili rak nobogolat, kinmbit-nen wirik nobogolat yigir-e lag-o. Are, Mbal Pem Nagawan-nen idnak aid nap nggal wok nobogolat, Kerisut Yesus wok ibidnak nggal wok nibigeb-o.

¹⁵Kit kenalen kwarat kagolat woraigep na-ge ngge me-o? An-nen kenpem konggorosolar-e: Enlengen nde kulugwi nggal-nen-e kenlengen kela an wok netleb-o.

¹⁶Nde, yawo-en-e ndemeret wene yak kindigi iri na bem an-e kit kinmin sirid nap kwat yigi-a?

¹⁷Nde, it iri-ge ennesiger-et nde, it enambigit nggwe mborobokluk, enmawi kundili-o. Nde, iri kwatli iri-ge, an nimin woragwi na pok tak puwokluk-nen yili-o.

¹⁸Nde, konak kwarurak pem-nen nde ap wok unpuwakluk enmawi kondogolar-e ob-o. Alat nde, an-e kit kinmin worala nak-nen iri nggal kwarurag-e lag-o. Are, pempa kwarogolat wolmomtag-o

¹⁹Nilirak kenabuwa worak wa-e. Kwami-nen li ndakolat yane wurugwi nggal, iri nggal-et Kerisut abage kit kenarem kwat makluk, an-e nilirak kit kenpem yane wurusu-o.

²⁰An-nen yak kundusu wene yu-ge siyak nin nggal tak peyeklug-e, an-e kit kinmin totno woraleb-a! Nde, kit kenpem ala, an nindi kabak yusu-o.

²¹Imiri mbarak pidnak wene urugwe nggwe wolmomtak kinndingen nab-e wene mbi an yak nerer-o: Imiri mbarak pidnak wene-nen yoso-ge kir-e kulili bug-a?

²²Engga mbarak pem-nen yosolar-e, Abaram na-ge ilirag-e mberen: Misig-e ndegel oboso kwe-nen ndagaidnak, nde, misig-e at ogwe wisirik woraso kwe-nen ndagaidnak irit woraiga-o.

²³Ndegel oboso kwenen ndagaid la iri-ge ki nap-nen ndakwi nggal irit ndagaij-et nde, wisirik woraso kwe-nen ndagaid la iri-ge Mbal Pem Nagawan-nen urul pidnak iri na bem-nen ndagaij-o.

²⁴Wene yu-ge nden karuk wene-nen yusu-o. Kwami mberen iri-ge “Iri nggal ma-o” luk yidnak wene mberen-nen yili-o. Kwe misik, Agat iri na-ge, Sinai ndobo bem-nen lobok yidnak me, at-nen ndet inpidnak li-ge ndegel unpugwi nap yurak nap ndet onposo-o.

²⁵Agat iri-ge o Arap woraso Sinai ndobo nggal-nen yusu-o. At iri-ge yawo worasu Yerusalem nggal-o. Yerusalem iri na min at ilirak oboksa min-e ndegel unpugwi nap-net yili-o.

²⁶Alat nde, aid arem worasu Yerusalem iri-ge wisirik nak woraso-o. Nde, at iri-ge nit niniya-nen yusu-o.

²⁷Mbal Pem Nagawan engga bem-nen yosolar-e: “Kwe wubiri yu-ge wa-e. Kalin kalen ki-o! La yane woroso buk kwe wa-e. Kalen-nen kum mbo bi-o! Un-nen keya bidnak kwe-nen-e li kwarat ndaguwa-o. Nde, at un imin woraso kwe-nen-e li-ge wonarak nggal ndaguwa-o” luk yij-o.

²⁸Nowe nowosi wa-e. Isak na-ge Mbal Pem Nagawan-nen urul pidnak wene bem-nen ndagaidnak nggal, kit na iri nggal-et urul pidnak wene bem-nen Mbal Pem Nagawan ilirak-nen yili-o.

²⁹Iri tarem-nen-e ki nap-nen ndakwi nggal ndagaidnak nap iri-nen-e Konak Indi bem-nen ndagaidnak nap iri na lel mberel pid nggal, yawo-nen na iri nggal-et kwatli-o.

³⁰Alat nde, Mbal Pem Nagawan engga arem-nen no dne yij-o? Engga iri bem-nen yosolar-e: “Ndegel oboso kwe iri at ambara min-e langgal eneyer-o. Ndegel oboso kwe ambara-nen-e wisirik woraso kwe na ambara imin ineid imining angge winde ma bug-o” luk yij-o.

³¹Iri bem-e, nowe nowosi wa-e. Nir-e ndegel oboso kwe ilirag-e lag-o. Nir-e wisirik woraso kwe ilirak-net yili-o.