Read Nduga EPESUS 2 Bible Online

EPESUS 2 - Nduga bible

EPESUS 2

¹Nanduk kir-e wene kuruk tidnak pem-nen na, meya yidnak pem-nen na, wat yidnag-et woraigeb-o.

²Woragolar-e, kir-e nggweyak ma yu me-nen kwarugwi mende nak kwarogolat teram enggendumu yu tena woraso indi nagawan-nen yidnak yidnak nak kwarogolat woraigeb-o. Indi nagawan iri na-ge yawo-ge Mbal Pem Nagawan ene kuruk tugwi nap enarem yabu wanoso-nen yusu-o.

³Nde, ndemeret nit oboksa-nen na nandug-e it worali nggal-et woraige-o. Iri nggal woragolar-e, nit nenpe-nen ukwe ukwe yugwi mende nak kwarogolar-e, nit nenpe min nit ninndi meya iri-nen ukwe yidnak mende na kwarogolat woraige-o. Iri kwarogola-ge, Mbal Pem Nagawan isilepma-ge it erep enpem pusu iri nggal, nit nenpem na purag-et woraige-o.

⁴Alat nde, Mbal Pem Nagawan-nen ap unpud kaso elem iri mondok kwarat ala, ar-e nit nenabuwa mondok nggulog-et kaso me,

⁵nir-e at ene kuruk tidnak pem-nen ninndi wat yidnak woraige-t nde, Kerisut uruk tak pid tarem-e Kerisut imin nit na nunluk ta pij-o. Mbal Pem Nagawan-nen we wok ondoso elem pem-net kir-e kinmiri yij-o.

⁶Nde, Kerisut Yesus ebem-nen Mbal Pem Nagawan-nen nunluk tak puruk, at imin nagawan wolmakluk aid arem koreyak ninpij-o.

⁷Iri kwat ninpid iri-ge, abok pempa woragolat-nen-e at-nen we wok ondoso elem utlud iri-ge Kerisut Yesus ebem at-nen konak nak kwaroso iri na mirik nenpeyekluk kwat ninpij-o.

⁸Nde, kinndi angin tubu yogola, Mbal Pem Nagawan-nen we wok ondoso elem pem-net kinmiri yid iri-ge kit-nen kwaridnak pem kinmiri yij-e lag-o. Are, Mbal Pem Nagawan-nen we wok kindidnak pem-ner-o.

⁹Nde, kit-nen kwaridnak pem-e lak me, ap misik-nen at ondomog-et kek yurag-e meya-o.

¹⁰Nir-e Mbal Pem Nagawan-nen ndak wat ninpidnak-nen yili-o. Nir-e konak nak kwarogolat wolmakluk Kerisut Yesus ebem ndak worak ninpij-o. Nde, nit-nen konak nak kwarogolat wolmomtak iri-ge abuwok ma-net Mbal Pem Nagawan-nen lid lud tak pij-o.

¹¹Kir-e kenlem nin nap nderak nanduk woraigep na yebet yebet tak wolmer-o Yawuri nap-nen kit kinmin-e “Iniye ambasap wabugwi buk nab-o” luk yugwi-o. Nde, it ondomok inmin-e “Niniye ambasap wabugwi nab-o” luk yili-t nde, iri-ge ap ininggi-nen enaboro mbaridnak pem nak yili-o.

¹²Nanduk kir-e Kerisut imin wud tak woragolat, Isarael nap inmin-e kir-e ap sal woragolat, Mbal Pem Nagawan-nen at ilirak wok undurak urul paga yak indidnak wene na-ge kit na wanurak puk na woraigeb-o. Nggweyak ma yu me worabolar-e, kinndi mbung mbung tak na lak. Kenmbal Pem Nagawan na lag-et woraigeb-o.

¹³Alat nde, yawo-ge Kerisut Yesus ebem-nen kit wud tak woraigep nab-e Kerisut eyabi bem-nen Mbal Pem Nagawan eram panggo rak kinpij-o.

¹⁴Nde, Kerisut-e nit lambuksa woragwi elem-nen yusu-o. Yawuri nap min enlem nin nap min-e at-nen enlem misiget tak inpij-o. It sirid mbarak ennggendumu kuri worak pak wiridnak iri na-ge at ondomok ebe wisirik pid pem-nen mijarak pij-o.

¹⁵At-nen-e imiri mbarak pidnak wene min wene na-nen “Iri nggal kwaru-o” yidnak wene min-e lak tak pij-o. Iri kwarid iri-ge enlem mberen kuri worak woraidnak iri na-ge at ondomok ebem-nen lambuksa ap elem ngget misiget nak kwarak puruk, lambuk tak enpeyekluk-nen kwarij-o.

¹⁶E lang pang tak pem wat yosolar-e, Kerisut-nen-e it mberen ngarak woraidnak na lambuksa enpe misiget tak unpuruk, Mbal Pem Nagawan eram inpil lobok yij-o. Iri kwarosolar-e, sirid mbarak woraiga na lak tak pij-o.

¹⁷Iri bem-e, Keristu na bolok yij-e, lambuk tak woragwi aid wene-ge ap oboksa yak ondosolar-e, Mbal Pem Nagawan imin wud tak woragwi enlem nin nap kit yak kondosolat, Mbal Pem Nagawan eralu koroga woragwi Yawuri nap na yak ondosolat yij-o.

¹⁸Nde, Keristu ebem-nen Yawuri nap na, enlem nin nap na nit oboksa-ge Konak Indi misiget iri na ebem Nineid Mbal Pem Nagawan eram panggo yil lobok yurag-e ob-o.

¹⁹Iri bem-e, kit enlem nin nab-e ap sal nggal, ap ngguru nggal woraigep na-ge yawo-nen-e iri nggal worali bug-o. Yawo-ge kir-e Mbal Pem Nagawan-nen len inpidnak nap inmin totno kunuwi worak nap yogolat, Mbal Pem Nagawan ama o misik ma woragwi nap yogolat yili-o.

²⁰O ugwi wirik inpidnak nap min Mbal Pem Nagawan ene lomboksa yugwi nap min enpem-nen wiridnak nab-e kit-nen yili-o. Nde, o paro pidnak iri-ge Kerisut Yesus-net yusu-o.

²¹Kerisut ebem-nen o iri oboksa-ge obo nesa worosolar-e, obo ndege ndege irit wirik lasolar-e, Nagawan Indo ebem-nen Mbal Pem Nagawan uwi marak irit kwat yusu-o.

²²Kerisut ebem-net kit na irit, it erep inmin wok kunpuruk, Konak Indi ebem Mbal Pem Nagawan woraso uwi irit wurusu-o.