Read Nduga EPESUS 5 Bible Online

EPESUS 5 - Nduga bible

EPESUS 5

¹Nde, kir-e Mbal Pem Nagawan ilirak kenabuwa worak-nen yili me, at-nen kwaroso nggal-et kwarer-o.

²Kerisut na-ge nit nenabuwa kagaid nggal, iri nggal kir-e ap enabuwa kagwi elem pem-et waring kagolat wolmer-o. Kerisut-e nit nenabuwa kasolar-e, nit nenmanggim at-nen at ondomok indi wisirik posolar-e, Mbal Pem Nagawan indi alen tak poso emben konak mende nggal luk, at eyabi Mbal Pem Nagawan amanggim pij-o.

³Kir-e marak nap-nen yili me, ap onkwe yebugwi wene nde mbabi kwarugwi wene oboksa nde ap enarengge ukwe ukwe yugwi wene nde kit kennggendumu-nen-e iri obok tet yurak pug-o.

⁴Iri nggal-et, kit-nen meya wene nde ebe lak wene lom nde keyari wene nde yurak pug-o. Iri yugwi wene-ge kit-nen yurag-e meya-net yusu-o. Alat nde, kit-nen-e Mbal Pem Nagawan nak wa yak togolat wolmomtag-o.

⁵Kit-nen “Iri-ge ndemeret wene-o” luk peragolat wolmomtak wene-ge yu-o: Mbabi yugwi nap min kop kap tobok tak woragwi nap min ukwe ukwe yugwi nap min (Nde, ukwe ukwe yugwi iri-ge kugiwak erembel wanugwi nggal-nen yusu-o) iri kwarugwi nab-e Kerisut min Mbal Pem Nagawan min-nen tenagaidnak wi-ge winde ma bug-o.

⁶Ap-nen-e ebe lak wene iri na yak kondogolat, konmbol pem ludtag-e meya-o. Iri nggal kwarogolat woraidnak pem-e Mbal Pem Nagawan isilepma-ge at-nen yidnak wene kuruk tugwi nap enpem mbuma-o.

⁷Iri bem-e, kit-nen-e it inmin yi mok ti mok yurak pug-o.

⁸Nde, nanduk kir-e ndamuk woraigeb-et nde, yawo-ge Nagawan Indo ebem yaya worali-o. Iri bem-e, yaya ilirak-nen kwarugwi nggal-et kwarogolat wolmer-o.

⁹Yaya iri-nen engen utlud posolar-e, konak nak kwarugwi elem min lud tak nak woragwi elem min ndemeret wene min irit pusu-o.

¹⁰Irit posola-ge, Mbal Pem Nagawan-nen indingen kaso mende irit mbenasa kenaru yogolat wolmer-o.

¹¹Ndamuk arem woragwi nap-nen ebe lak mende kwarugwi iri na min kundurak pug-o. Are, iri kwarugwi iri-ge kit-nen-e nam tak purag-o.

¹²It-nen kuruwama-nen kwatli mende iri-ge obok yurak tet inggiri worag-o.

¹³Alat nde, yi mende ndi mende oboksa-ge yaya-nen nam tak posola-ge, nam yusu-o. Nde, nam tak pidnak mende iri na-ge yaya-nen yusu-o.

¹⁴Iri bem-nen Mbal Pem Nagawan engga-nen yosolar-e: “Nene yusu nap wa-e. Men min-o. Wat yidnak nap ennggendumu-nen men min-o. Iri ala-ge, Kerisut-nen yaya rak kubuwa-o” luk yij-o.

¹⁵Iri bem-e, kit-nen kwarogolat woragwi mende-ge kinndi kwara mbenarogolat wolmer-o. Wid-nen kwarugwi nggal kwarurak pug-o. Are, inndi nggat nggat worak-nen kwarugwi nggal kwarogolat wolmer-o.

¹⁶“Yawo ya-ge meya momtak tarem-nen yusu-o” luk, kwarurak tarem worala yat nanongga kwarogolat wolmer-o.

¹⁷Iri bem-e tabuksa wolmomtak pug-o. Are, Nagawan Indo indi-n pidnak wene yenggerak pobok-nen kenmawi kondogolat wolmer-o.

¹⁸Anggut engen amburu ndonggosa nuruk kinndi wawa yurak pug-o. Iri nunggupndig-e, ukwe ukwe rak onposo-nen yusu-o. Alat nde, kir-e Konak Indi nde kenarem kobong tak irit wolmer-o.

¹⁹Kit-nen wene yak kerak mbogolar-e, Ndawi Engga bem mbaridnak wene yogolat, Mbal Pem Nagawan erembel wanogolat, aid wene ndawi yogolat mer-o. Kit kenarem-nen Nagawan Indo yak togolar-e, at erembel wanogolat, Nagawan Indo ebem ndawi yogolat wolmer-o.

²⁰Yi mende ndi mende pidsa bem kir-e pempa “Nineid Mbal Pem Nagawan wa-o” yak togolar-e, Nenagawan Indo Yesus Kerisut unu bem-et yak togolat wolmer-o.

²¹Kerisut indi aye woragolar-e, kit na kit-net kenggam urugom tebe yogolat wolmer-o.

²²Kununtak worak kwami wa-e. Kir-e Nagawan Indo urugom tebe yili nggal-et kununtak unlugom tebe yer-o.

²³Kerisut-e lambuk tak inpidnak nap enanggul-nen yusu nggal, un-e at ogwe anggul-nen yusu-o. Nde, lambuk tak inpidnak nap iri-ge at ebe-nen yili me, Kerisut-e at ebe Imiri Yoso Nap-nen yusu-o.

²⁴Alat nde, lambuk tak inpidnak nab-e Kerisut urugom tebe yili nggal, iri nggal-et ununtak worak kwami-nen-e yi mende ndi mende bem-e ununtak unlugom teberak wolmomtag-o.

²⁵Konkwerak worak nap oboksa wa-e. Kerisut-nen lambuk tak inpidnak nap enabuwa kasolar-e, it enmanggim at-net at ondomok indi wisirik pid nggal, iri nggal-et kit na kit konkwerak enabuwa kagolat wolmer-o.

²⁶Ar-e ondomok indi wisirik pid iri-ge, marak wolmakluk, at-nen korak onposolar-e, yi bem min at ene bem min-nen yi mat inpij-o.

²⁷Nde, iri kwat inpid iri-ge, lambuk tak inpidnak nap iri-ge at-net at ondomok eram enpeyekluk-nen yij-o. At eram onposolar-e, enabinal worak, enpem kopkap min siminggil min iri nggal erep na lag-et. Are, mondok marag-et, enpem ambut lak irit eram enpeyekluk-nen yij-o

²⁸Iri nggal-et ap-nen it ondomok enpe abuwa kali nggal, iri nggal-et onkwerak na enabuwa kujwag-o. At ogwe abuwa kasu nab-e at ondomoge-et abusa kasu-o.

²⁹Ap mbi-nen-e at ondomok ebe-ge isili rak poso bug-. Are, Kerisut-nen lambuk tak inpidnak nap ndegel unpusu nggal, iri nggal-et ap-nen-e ondomok ebe ndogorosolar-e, nunggwi mende mak tosolat, ndegel obosolat woraso-o.

³⁰Nde, nir-e at ebe inggi ijok-nen yili-o.

³¹Mbal Pem Nagawan engga bem-nen yosolar-e: “Iri bem-e ap-nen at eid ija keya unpuruk, at ogwe min lambuk luk, it enmbereg-e enpe misiget ma-o” luk yij-o.

³²Kura wene yu-ge nggulog-et nde, wene iri na-ge Kerisut min lambuk tak inpidnak nap min enpem yidnak-nen yusu-o luk an-e perasu-o.

³³Irit nde, wene iri-ge kit kinmin yidnak-net yusu-o. Kit kenambik kenabuwa kali nggal, kit kondomoktak-nen konkwerak enabuwa ker-o. Nde, ogwe-nen-e at un kek tak ubuwag-o.