Read Nduga PILIPI 3 Bible Online

PILIPI 3 - Nduga bible

PILIPI 3

¹Nowe nowosi wa-e. Worok tak posolat, yak kendeyeg-o. Nagawan Indo ebem kenalin kenalen kagolat wolmer-o. An nanduk engga mbara kendam pil lobok yigi wene iri-ge kit kinmiri yurak wene-nen yusu me, tuguruk iri na-t yak kundurag-e te-nen yusu-o.

²Yengge min meya kwarugwi nap min we onmbol nggwe enaboro mbarugwi nap min enabiyem-o luk kwara-t wolmer-o.

³Nir-e at Indi ebem Mbal Pem Nagawan erembel wanogolat, Kerisut Yesus ebem nunluk worali iri bem nenalen kagolat yili nap nit perak nde mondok ndemeret iniye ambasap wabidnak nap-net yili-o. We nenaboro mbaridnak iri na bem ninndi mbung mbung tak worali-ge lag-o.

⁴An-nen perak nde iri mende bem nindi mbung mbung tak wolmomtag-o ob-o. Ap erep-nen nde enaboro-nen kwarugwi mende bem nde inndi mbung mbung tak woragola nggal-e, an perak terak minik nindi mbung mbung tak woraleb-o.

⁵An ndet nuburuk, tuju nene luk delapan pem-e niye ambasap wabiga-o. An-e Isarael nap-net ndet nibidnag-o. Nelem unu na Mbenyamin-nen yusu-o. Iberani nap lolo-net ndet nibidnak me, an-e ndemeret Iberani nap-net yusu-o. Nde, imiri mbarak pidnak wene na wanugwi bem-e an-e Parisi nap woragi-o.

⁶Imiri mbarak pidnak wene na elat mbarosolar-e, lambuk tak inpidnak nap lel mberel onposolat woragi-o. An-e imiri mbarak pidnak wene-nen yidnak yidnak nak kwarosolar-e, lugud tak poso bug-o.

⁷Alat nde, nanduk-nen an-e ob-o luk peraso iri na-ge yawo-ge Kerisut ebem-nen-e meya nde kasu-o.

⁸Nde, iri mende nak meya-ge lag-o. Are, yi mende ndi mende oboksa-ge ebe lak mende nde kasu-o. An Nagawan Indo Kerisut Yesus naru mom iri perak nde mondok nggulok lombog-o. At ebem an yi mende ndi mende oboksa keya bosolat, iri mende-ge we eneyak ngen mbo bidnak nggal-nen yusu-o luk peraso-o. Iri keya bigi iri-ge an-e mondok Kerisut nak wanuruk,

⁹at arem worayekluk-nen yigi-o. An-e lud tak nibidnak yu-ge an nindi-net iri kwareyeg-o luk, an-nen imiri mbarak pidnak wene-nen yidnak yidnak kwaroso ala-nen kwat nibidnag-e lag-o. Are, Kerisut ebem nindi angin tubu yidnak pem-net lud tak nak nibidnak perak nde worasu-o. Inndi angin tubu yidnak pem-net Mbal Pem Nagawan-nen lud tak nak onposo iri nde yigi-o.

¹⁰An nindingen kaso mende-ge yu-o: Kerisut na naru yosolat, at uruk yidnak amawi iri na naru yosolat, at andi bandi kagaid nggal an na andi bandi kasolat, at wat yid nggal an na iri nggal wat yosolat yurag-e nindingen-o.

¹¹Iri nindingen kasu iri-ge, wat yidnak nap unluk tak puwa tarem-e an na nuruk tak nubuwakluk-nen yusu-o.

¹²“An-e iri mende ludsa-t wanigi-o” luk, “An-e iminep mbarak nap-nen yusu-o” luk yusu-ge lag-o. Are, Kerisut Yesus-nen an tena nibid nggal, iri nggal-et an-nen na tena beyekluk, muk kerenak worasu-o.

¹³Nowe nowosi wa-e. “An-e abu tenabigi-o” luk perasu bug-o. Alat nde, an-nen kwarusu misiget nag-e yu-o: Nanduk kwarosolat woraidnak mende na meme yaga namberam tak purug-e, neraret ma worasu mende iri nak tenabeyeklug-e, namawi kunduruk muk kasu-o.

¹⁴Iri bem-e, onggo iri waneyeklug-e, kondok yugwi sa iri me pong kil mburusu-o. Onggo iri na-ge Mbal Pem Nagawan-nen-e: “Kerisut Yesus ebem-e aid arem yu me kuruk woranok-nen lobok yi-o” luk wene mbo nibidnak iri-net yusu-o.

¹⁵Ninndi worak nap nit-nen-e an yigi iri nggal-et yebet kagolat wolmog-o. Nde, kit erep-nen iri nggal yebet kagit lak yogola-ge, Mbal Pem Nagawan-nen-e nam-et yak kunduwa-o.

¹⁶Iri alat nde, yawo-ge nit nenaru yidnak wene ndemeret wene iri bem-et waring kagolat wolmog-o.

¹⁷Nowe nowosi wa-e. Kit pidsa-ge an-nen kwaroso nggal-et kwarogolat wolmer-o. Kit na iri nggal-et kwarobokluk, nit-nen kwarogolat woragwi iri nggal kwatli nab-e kwara lombot pogolat wolmer-o.

¹⁸An-nen-e wene yu-ge kwarat pem yak kondosolat woragi nar-o. Nde, yawo-ge yip min-et tuguruk yak kundusu-o. Ap kwarar-e it-nen kwarugwi mende bem-nen Kerisut e lang pang tak imin wim mbarak worali-o.

¹⁹It iri-ge worok tak posolat tarem-e lag-et ma-o. Mbal Pem Nagawan ondolma-ge it unluk amanggim nggok tak pili-o. It-nen-e innggiri kagwi mende irit kek tak pili-o. Nde, ir-e nggweyak ma mende nak yebet yebet tak woragwi-o.

²⁰Nde, nit perak nde nunuwi elem ma-ge aid arem-et worasu-o. Nit Ninmiri Yoso Nap Nagawan Indo Yesus Kerisut iri-ge aid arem-nen mbuma-o luk yik karok worali-o.

²¹At lobok yuwarig-e, nit nenpe piri yoso yu-ge nin tak nunpuruk, at ebe abinal worak iri nggal tak nunpuwa-o. Iri kwat nonposolar-e, yi mende ndi mende oboksa at urugwe nggwe rak poso amawi iri bem-net kwat nunpuwa-o.