Read Nduga PILIPI 4 Bible Online

PILIPI 4 - Nduga bible

PILIPI 4

¹Iri bem-e nowe nowosi wa-e. An-e kit kenabuwa kwarat kasolar-e, an nindi kundugu kit kenpem worasu-o. Kir-e an nalen min an nuwirik menda min-nen yili-o. Nowe nowosi kenabuwa worak wa-e. Kir-e Nagawan Indo ebem-et tugup lak wolmer-o.

²Eyoria min Sintike min wa-e. Nogweyaptag-o. “Kir-e Nagawan Indo ebem-nen kinndi misiget yer-o” luk kenmengen mbarusu-o.

³Nde, an tot-no yabu wanosolat, mot mot nak yabu wanoso nanggam Sunsugos wa-e. Kwami mberen iri min Kelemens min an totno yabu wanugwi nap erep na min-e an nimin totno aid wene wigarogolar-e, enmawi kundidnak me, kwami mberen iri-ge kat-nen yongga indi-o luk kemengen mbarusu-o. It iri unnu-ge unlug-et wolmomtak engga bem mbarak worasu-o.

⁴Nagawan Indo ebem pempa pempa-t kenalin kenalen kagolat wolmer-o. Nde, tuguruk yak kendeyeg-o. Kenalin kenalen-et kagolat wolmer-o.

⁵Kir-e yangonak nak kwarugwi nab-o luk ap pidsa-nen enaru yuwag-o. Nde, Nagawan Indo lobok yurag-e panggo yij-o.

⁶Yi mende ndi mende bem-e kunmud kudtak pug-o. Alat nde, tepan yogolar-e, kit kinndi kabak yidnak mende-ge Mbal Pem Nagawan nggi yak togolar-e, pempa pempa “Wiwa-o” yak togolat-nen nggi yugup na-e.

⁷Iri kwarugup ala-ge, ki nap inndi nggat nggat iri-ge teberag-o. Nde, Mbal Pem Nagawan-nen idnak lambuksa woragwi elem terak minik iri-nen Kerisut Yesus ebem-nen kit kinndi min yebet kagwi min-e parugu wolma-o.

⁸Nowe nowosi wa-e. Worok tak posolar-e, wene yu yak kendeyeg-o. Kit kinndi-nen yebet kagolar-e, lud tak kwarugwi min entembel wanugwi min mot mot nak kwarugwi min marak nak woragwi min konak mende min konak kulugwi mende min oboksa iri-ge kinndi konak tak purak mende worasola na, kek tak unpurak mende worasola na, iri mende oboksa bem nak kinndi-nen yebet kagolat wolmer-o.

⁹An-nen mirik konposola kenaru yigep wene min nggomo kindigi wene min an-nen yosola kuligep wene min an-nen kwarosola kaigep mende min-e iri nak kwarogolat woragup na-e. Iri kwarogola-ge, lambuksa woragwi elem Mbal Pem Nagawan-e kit kinmin wolma-o.

¹⁰Nagawan Indo ebem an nalin nalen kwarat kasu-o. Meme rak nuburuk kwarat woraigeb-et nde, abok-nen kir-e tuguruk an nubud kali-o. Nde, kir-e ndemeret “Ngge sa worasu-o?” luk kinndi an nebem woraigeb-et nde, an yongga nururak tarem lak me, larok yigeb-o.

¹¹Nde, an-nen wene yusu yu-ge an neram silobulo lak ala-n yusu-ge lag-o. Nde, “An neram worasu mende-ge ndak worasu kagi” luk an-e iri nak yebet kaso-o.

¹²An-e silobulo lak woralat na, silobulo mondok kwarat woralat na, mberensa irit naru-o. Nde, iri naru iri-ge, yi mende ndi mende bem-nen na, yi wene ndi wene bem-nen na, nimbit woralat na, nere woralat na, silobulo worak woralat na, silobulo lak woralat na, an-e ndak nak woraso-o.

¹³Amawi wok noroso Kerisut na ebem-nen-e an-e yi mende ndi mende pidsa ndak kwarimin-o.

¹⁴Alat nde, an anggun panggun worala, yongga nirigep iri-ge mondok konag-et kwarigeb-o.

¹⁵Nde, kit Pilipi nab-e wene yu perak kenaru nar-o. An-e Makeronia-nen mborosolar-e, mondog-et aid wene tomboroso tel korosola-ge, lambuk tak inpidnak nap o misiger-o luk tet-nen uwang an wok nirigit lag-et nde, kit nak-nen perak nde yongga nirigeb-o.

¹⁶An Tesalonika worasola-nen na, kit-net namanggim pil lobok yigeb-o. Iri kwarogolar-e, misik pem nag-e lag-o. Mberen pem-et yongga nirigeb-o.

¹⁷Nde, an-nen-e silobulo we wok nururak iri nggok tak pusu-ge lag-o. Are, kit-nen silobulo wok niridnak pem-nen Mbal Pem Nagawan-nen terak menna wok kunduwakluk-nen yusu-o.

¹⁸Yawo-ge an-nen ukwe peraidnak oboksa-ge kit-nen namanggim pigepma wanigi iri-ge an-nen ukwe peraidnak ombol nggwe terak menna wanigi-o. Epaporotitus-nen wok nirigep mende wok niril lobok yamu-nen an-e mondok ndak worasu-o. Nde, silobulo wok nirigep iri-ge, emben konak mende nggal Mbal Pem Nagawan-nen kujwaklug-e, Mbal Pem Nagawan indingen tak posolat, alen tak posolar-e, Mbal Pem Nagawan amanggim wam wosa eyabi pugwi nggal-nen yusu-o.

¹⁹Nde, Nembal Pem Nagawan-nen-e kit-nen ukwe peraidnak mende oboksa-ge Kerisut Yesus ebem-nen at eram woraso arengge mondok kwarat iri wok kondosolat wolma-o.

²⁰Woragolat nagolar-e, Nineid Mbal Pem Nagawan kek tak pogolat wolmog-o. Amen.

²¹Kerisut Yesus ebem woragwi marak nap oboksa-ge “Wiwa-o yij-o” luk yak undurag-o. An nowosirak nimin worali nap-nen na wa yak kindili-o.

²²Yu me woragwi marak nap oboksa-nen wa yak kindili-t nde, Kaisat woraso sa woragwi nap irit wa yak kindili-o.

²³Nagawan Indo Yesus Kerisut-nen we wok ondoso elem-e kit kinndi imin wolmag-o.