Read Nduga KOLOSE 2 Bible Online

KOLOSE 2 - Nduga bible

KOLOSE 2

¹Kit kenmanggim na, Laorikia woragwi nap enmanggim na, an nimbiriwak kagwi buk nap oboksa enmanggim na, yabu kwarat wanosolat woraso wene kit kenaru yurak nindingen-o.

²Iri yusu iri-ge, it inndi yanggo luk, it na it-nen nabuwa kabuwa woragolar-e, it inndi-n kwara yebet kagola-ge, Mbal Pem Nagawan-nen idnak kura wene enaru makluk iri yusu-o. Nde, kura wene iri-ge Kerisut at-net yusu-o.

³Indi tenggerak elem oboksa min enaru yugwi elem oboksa min-e Kerisut arem-et kura worasu-o.

⁴Iri ala, ap misiger-o luk tet-nen konak wene yak kondosolat konmbol pem lujwa naru-nen an-e wene yu yak kundusu-o.

⁵An nebe kit kinmin-e worasu bug-et nde, nindi kinmin worasolar-e, kir-e mondok tugup lak woragolat-nen lambuksa Kerisut ebem kinndi angin tubu yidnak iri-ge kasoluk, an nalen kasu-o.

⁶Kit-nen-e Kerisut Yesus na-ge Nenagawan Indo-o luk wanigepndik me, at imin kundik irit woragolar-e,

⁷at ebem kennlengen kundik woragolat, at ebem-et tugup lak mendak wolmer-o. Mirik kinpidnak na ndak ndag-et kinndi angin tubu yidnak na bem tugup lak woragolar-e, at imin-e “Wiwa-o” luk kwarat yak togolat wolmer-o.

⁸Iri ala-ge, ap-nen kinndi wanogolar-e, ki nap enaru yidnak wene bem-nen na, ebe lak mende onmbol pem lagwi wene, ki nap-nen mul undugwi wene lom nde nggweyak ma yu tena woraso indi-nen yidnak wene bem-nen na ming kunpuwa naru, kwara-t wolmer-o. Wene iri-ge Kerisut-nen yidnag-e lag-o.

⁹Nde, Mbal Pem Nagawan-et woraso oboksa-ge Kerisut nggweyak ma nap enpage worak iri na bem-et worasu-o.

¹⁰Nde, kir-e at imin kundik woragola, iminep mbarak kinpidnak worali-o. Nde, iri-ge nggweyak ma woragwi pemerinta nde enmawi worak mendak inpidnak nde enanggul-nen yusu-o.

¹¹At ebem-net kiniye ambasap wabidnak worali-o. Nde, iri-ge ap ininggi-nen enaboro wabugwi na nggal-e lag-o. Are, Kerisut-nen kiniye ambasap wabosolar-e, meya nak kwarugwi kenaboro iri na keya bid min yigi-o.

¹²Nde, yi mat kinpiga iri-ge, kir-e Kerisut imin-et yapma kinpiga-o. Nde, yi ma-nen waigeb-e, wat yidnak nap ennggendumu-nen Kerisut uruk tak pid Mbal Pem Nagawan na amawi bem kit kinndi angin tubu yigep pem-e, kit na Kerisut imin totno kunluk tak kinpij-o.

¹³Nde, kit meya kwarogolat woraidnak pem-nen na, kiniye ambasap wabigit lak woraidnak pem-nen na, nanduk kir-e wat yidnak woragwi-t nde, yawo-ge Mbal Pem Nagawan-nen Kerisut imin totno kunluk tak kinpij-o. Mbal Pem Nagawan-nen nit meya kwarogolat woraidnak oboksa-ge amberam tak puruk,

¹⁴nit namat meya yidnak wene, “Iri nggal kwaru-o” luk yidnag-et nde, nit-nen tarugwi engga mbarak iri-ge lak tak posolar-e, e lang pang tak pem luruk wosa panggarak pij-o.

¹⁵E lang pang tak na bem-e Kerisut-nen-e pemerinta min enmawi worak ese mendak inpidnak min nggeyok tak inpij-o. Iri lug-e, at urugwe nggwe rak unpuruk, ap pidsa enlengen pem imbirik tak unpuruk mbirij-o.

¹⁶Iri bem-e, nunggwi mende bem ala na, yi norak wene bem ala na, inik inik sakwi wene bem ala na, waneya ngget yarosola kwarugwi bem ala na, we woragwi wene bem ala na, ap-nen “Iri nggal-o” luk yak kondogola-ge, kulurak pug-o.

¹⁷Iri mende oboksa-ge abok-nen kwat ma mende iri na amorok nggal-nen yusu-o. Nde, ndemeret ebe-ge Kerisut-nen yusu-o.

¹⁸Enesiget nde, it ondomok inndi tebe luk, aid nap entembel wanogolat, nabi nggwe nggal kaidnak nggulok tak pogolat kwarugwi nap-nen-e urugwe nggwe rak kunpuwakluk, nggeyok yurak pug-o. Iri kwarugwi nab-e ki nap inndi-n yebet kagwi bem it ondomok kek yugwi-nen yili-o.

¹⁹It iri na-ge enanggul Kerisut na puksa tenakit lak worali-o. Kerisut na ebem-net ebe oboksa-ge ndak ndaksa ndogorosolar-e, it min emengen min-nen konda misiget tak posolar-e, Mbal Pem Nagawan indi-n pidnak pem-et nggok yusu-o.

²⁰Kir-e Kerisut imin wat yogola, nggweyak yu tena woraso indi na inggem-nen weserak kinpij-et nde, kir-e noluk-nen nggweyak ma yu me-nen kwarugwi mende yeba nggal kwat tenak worali-o?

²¹“Iri-ge mondok imin na kenpem yurak pug-o” luk, “Iri-ge mondok undu wal kudtak pug-o” luk, “Iri-ge mondok tena na purak pug-o” luk yili-o.

²²Iri nggal kwarugwi oboksa iri-ge kwatlug-e, lak yoso-nen yusu-o. Iri nggal kwarugwi iri-ge ki nap-nen yugwi wene min ki nap-nen mirik unpugwi wene min-nen yusu-o.

²³Nde, aid nap entembel wanugwi min nam nariya inndi tebe yugwi min enpe andi bandi rak pugwi min yik kagolar-e, wene iri-ge enaru yidnak nap-nen yidnak nggal kali-t nde, wene iri-nen-e ap enpe-n ukwe ukwe yugwi mende ndak tak purag-e ebe lak mende-nen yusu-o.