Read Nduga KOLOSE 3 Bible Online

KOLOSE 3 - Nduga bible

KOLOSE 3

¹Kir-e Kerisut imin kunluk tak pidnak me, teram woraso mende nak kore yer-o. Teram iri me-ge Kerisut-e Mbal Pem Nagawan inggi kigit nggwe koreyak worasu-o.

²Kit kinndi-ge nggweyak ma mende bem wat tak purak pug-o. Are, teram woraso mende bem-et wat tak wolmer-o.

³Kir-e wat yigepma-o. Nde, kunluk worali iri-ge Kerisut ebem-net Mbal Pem Nagawan arem kura worali-o.

⁴Nit nunluk worali yu-ge Kerisut-nen yusu-o. Nde, at nam yosolar-e, kit na at imin totno nam yogolar-e, at unu kek tak pidnak pem-et nam yugub-o.

⁵Iri ala-ge, kir-e nggweyak ma nap woragolat-nen ukwe ukwe yugwi mende-ge mbabi yugwi nde, mbilaro ngin mende kwarugwi nde, mbabi kwarurak ukwe ukwe yugwi nde, meya nak kwarurak peragwi nde, worala-t nde ukwe nak yugwi nde, iri-ge oboksa worak pugup na-e. Nde, worala-t nde ukwe nak yugwi iri-ge kugiwak erembel wanugwi-nen yusu-o.

⁶Iri mende kwarugwi na bem-e Mbal Pem Nagawan isilepma-ge at-nen yidnak yidnak kuruk tugwi nap enpem mbuma-o.

⁷Nanduk kit na irit iri kwarugwi mende urugwe nggwe woragolar-e, kit na iri mende-t kwarogolat woraigep nar-o.

⁸Alat nde, yawo-ge kit-nen-e yu mende yu-ge mbo bugup na-e: kinsilepma yugwi nde, ukwe ukwe yugwi nde, inndi-nen ap ngal unpugwi nde, onpok pugwi wene nde, meya wene yugwi nde kit kenmende nggwe-n mbururag-e meya-o.

⁹Kit na kit-net kenesik wene yak kerak mburak pug-o. Nanduk-nen woragwi kenpage na keya burug-e,

¹⁰kenpage ngget mende wanigeb-o. Kenpage ngget mende iri-ge ndak worak pid Mbal Pem Nagawan-nen-e at abage nggal pempa pempa ngget tak konposolar-e, at mondok kenaru tobokluk-nen kwarusu-o.

¹¹Iri bem-e, enlem nin nab-o luk, Yawuri nab-o luk na lak, iniye ambasap wabidnag-o luk iniye ambasap wabigit lag-o luk na lak, ap enlem oboksa ennggendumu-nen misik kek tak, misik teberak na lak, ndegel unpugwi-o luk, weserak woragwi-o luk na lag-o. Are, oboksa iri-ge Kerisut-nen yusu-o. Kerisut it oboksa inmin misiget yidnak-nen yusu-o.

¹²Kir-e Mbal Pem Nagawan ilirak-net yili-o. Ar-e kit kenabuwa karuk, at arengge rak kenpeyekluk lenak kinpij-o. Iri bem-e, kit-nen na ap enabuwa kagolat, kinndi konag-et woragolat, kinndi teberak woragolat, yanggonak nak woragolat, kinndi mamak puruk woragolat wolmer-o.

¹³Kit na kit-net kennggam imin mamak puruk woragolat, kit meya rak kinpidnak mbi worala-ge, “Wiwa-o” luk yak kerak mbogolar-e, lak tak pogolat wolmer-o. Nagawan Indo-nen kit meya yidnak amberam tak pid nggal, kit-nen na iri nggal-et nin nap-nen meya rak kinpidnak mondok kenmberam tak per-o.

¹⁴Nde, mondok nggulok nanduk tak pidnag-e ap enabuwa kagwi elem-net yusu-o. Ap enabuwa kagwi elem-nen-e yi mende ndi mende lambena iminep mbarak poso-nen yusu-o.

¹⁵Kerisut-nen idnak yamuksa woragwi elem-e kit kinndi arem ombo luk wolmag-o. Iri yurak pem-nen ebe misiget kwat yobokluk Mbal Pem Nagawan-nen wene mbo kinpij-o. Nde at “Wiwa-o” yak togolat wolmer-o.

¹⁶Kerisut owene utlud lombok iri-ge kit kenarem wolmag-o. Kinndi mondok lid tak pem-nen-e kit na kit-net mul kerak mbogolat, kit na kit-nen nggomo wat kerak mbogolar-e, ndawi engga bem nde, Mbal Pem Nagawan erembel wanugwi ndawi bem nde, aid ndawi bem nde yogolar-e, kit kinndi arem-nen “Mbal Pem Nagawan wiwa-o” luk yak togolat wolmer-o.

¹⁷Yi kwatlik ndi kwatlik kwarogolat na, yi wene ndi wene yogolat na, Nagawan Indo Yesus unu bem-net iri pidsa kwarogolar-e, at ebem-nen Nineid Mbal Pem Nagawan imin-e “Wiwa-o” luk yak togolat woragup na-e.

¹⁸Kununtak worak kwami wa-e. Kit kununtak unlugom tebeluk wolmer-o. Iri kwarugwi iri-ge Nagawan Indo ebem woragolat-nen kwarugwi-ge irir-o.

¹⁹Konkwe worak nap wa-e. Kit konkwerak enabuwa kagolat, it inmin yanggonak nak wolmer-o.

²⁰Li marik marik wa-e. Kir-e Nagawan Indo ebem woragolat-nen kwarogolar-e, kineid kiniya-nen yidnak yidnak nak pempa kwarogolat wolmer-o. Iri kwarugwi iri-ge Mbal Pem Nagawan indingen tak pugwi-o.

²¹Kinlirak worak ineidtak wa-e. Kit kinlirag-e insilepma rak unpurak pug-o. Insilepma rak pogola-ge, it inndi terak tak pugub-o.

²²Ap ndegel unpugwi nap wa-e. Yi kwatlik ndi kwatlik kwarogolar-e, nggweyak ma nap kit-nen idnak nagawan nagawan-nen yidnak yidnak nak kwarogolar-e, it-nen yik keneyarok woragola, nam nariya kentembel wanuwakluk nak-nen kwarurak pug-o. Are, ndemeret kit kinndi-net kwarogolat wolmer-o.

²³Kenpem pidnak yabu oboksa wanogolar-e, ndemeret kinndi-net wanogolar-e, ki nap enmanggim wanugwi nggal-e lag-o. Are, Nagawan Indo amanggim wanugwi nggal irit wanogolat wolmer-o.

²⁴Nde, Nagawan Indo-nen onggo wok kondosolar-e, at elem nap enmanggim pidnak na kit na wok kundurag-e kenaru nar-o. Nde, kir-e Nagawan Indo Kerisut nak ndegel ibili-o.

²⁵Nde, Mbal Pem Nagawan-e ap pidsa ndak ndak tak onposo me, meya kwaruwa nab-e at-nen meya kwarosolat woraidnak onggo wanuwar-o.