Read Nduga KOLOSE 4 Bible Online

KOLOSE 4 - Nduga bible

KOLOSE 4

¹Kit nagawan nagawan wa-e. Kit ndegel kunpugwi nap kwat onpogolar-e, ndemeret mot mor-et kwat onpogolat wolmer-o. Kit min-et Kenagawan Indo-ge aid arem worasu-o luk kenaru nar-o.

²Tepan kundugu yogolar-e, kinndi na kwara kunluk woragolat-nen Mbal Pem Nagawan imin-e “Wiwa-o” luk yak togolat wolmer-o.

³Iri kwarogolar-e, nit-nen-e Kerisut owene kura wene aid wene iri-ge ap yak unduwok-nen Mbal Pem Nagawan-nen tu kuwara wok nunduwak-nen nit nenmanggim na tepan yogolat wolmer-o. An-e wene iri bem-nen kere kamat nibidnak worasu-o.

⁴Kura wene iri-ge an-nen mondok kwara ludsa yuwakluk, namanggim tepan yer-o.

⁵It inndi angin tubu yigit lak nap inmin-e kinndi-n yebet karuk-net kwarurag-o. Kit kinmin woragola tarem iri-ge nanongga-nen yusu-o.

⁶Kit-nen wene yogolar-e, ap-nen kologolar-e, wene konag-et kuluruk, indingen tak purak wene nak yogolat wolmer-o. Ap-nen kin wok konpogola, onggo yurak na mondok kenaru wolmomtag-o.

⁷Nit nennggam abuwa worak Tikikus iri-ge mot mot nak ndegel onposo nap, Nagawan Indo eyabu an totno wanoso nap iri-nen-e an nowene-ge ndegera yak kunduwa-o.

⁸Nit-nen kwatli wene yak kondosola, kit kinndi uwi yak makluk-nen an-e kit kendam ibil lobok yusu-o.

⁹At imin-e kit kenma nap Onesimus, mot mot nak kwaroso abuwa worak na at imin lobok yusu-o. Nde, yu me-nen kwatli wene oboksa it-nen yak kunduwa-o.

¹⁰An nimin totno o kubu me pil nggwidnak nap Aristarakus min Mbaranabas irid-nen ndagaid nap Marakus min-nen wa yak kindili-o. (Nde, Marakus na kit kendam lobok yosola, kona wok eber-o luk nanduk yak kindigi nar-o.)

¹¹Nde, Yesus unu misig-e Yustus-nen na irit wa yak kundusu-o. Inndi angin tubu yidnak Yawuri nap ennggendumu-nen-e it kenan iri nak-nen Mbal Pem Nagawan-nen tenagaidnak wi yabu an nimin totno wanugwi nap yili-o. Ir-e mondok kwara an yongga nitli-o.

¹²Kit kenma nap misik, Kerisut Yesus ndegel oboso nap Epaparas-nen-e wiwa yak kundusu-o. Nde, at iri-nen-e pempa pempa kit kenmanggim kiri keresa tepan yosolar-e: “It inndi tugup lak woragolat, iminep mbarak woragolat, Mbal Pem Nagawan indi-n pidnak nak kwarogolat wolmag-o” luk Mbal Pem Nagawan emengen mbaroso-o.

¹³At iri-ge kit kenmanggim na, Laorikia min Kierapolis min woragwi enmanggim na, yabu amawisa wanusu-o luk an-nen kenggera yak kundusu-o.

¹⁴Abuwa worak ndoktet Lukas min Ndemas min-nen-e wiwa yak kindili-o.

¹⁵Nennggamirak Laorikia woragwi min kwe Nimpa min at ama ndok wurugwi lambuk tak inpidnak nap min inmin-e “Wiwa-o yak kindiga-o” luk yak ender-o.

¹⁶Engga yu-ge kit kennggendumu-nen wonatlug-e, lambuk tak inpidnak Laorikia woragwi nap ennggendumu-nen wonarurag-o. Wonatlug-e, Laorikia-nen pil lobok yuwa engga na kit-nen na wonarurag-er-o.

¹⁷Nde, Arakipus na yak togolar-e: “Nagawan Indo-nen eyabu kebem pidnak na mondok worok tak pugun na-e” luk yak ter-o.

¹⁸An nondomok ninggi-nen yu mbarusu-o: “Paulus an-net wa yak kundusu-o.” An kere kamat nibidnak iri-ge yebet yebet tak wolmer-o. Mbal Pem Nagawan-nen we wok ondoso elem-e kit kinmin wolmag-o.