Read Nduga 1 TESALONIKA 2 Bible Online

1 TESALONIKA 2 - Nduga bible

1 TESALONIKA 2

¹Nenggamirak wa-e. Nir-e kit kendam lobok yige-ge we yeba-t lobok yiga-ge lag-o luk kir-e kenaru nar-o.

²Nde, nir-e nanduk Pilipi woragola-ge, lel mberel nonpogolat, nagweyak nggal tak nonpogolat yiga wene iri-ge kenaru nar-o. Alat nde, Mbal Pem Nagawan-nen ninndi kwiye lak tak posola-ge, nit ninmin kwarat wene eyak worogola-t nde, Mbal Pem Nagawan-nen idnak aid wene-ge kwiye lag-et yak kindige nar-o.

³Nde, nit-nen nggomo kindili wene yu-ge kabak tak unpugwi wene na lak, ninndi mberen pem yak kindili na lak, kenmberam lokluk-nen yili na lag-o.

⁴Are, Mbal Pem Nagawan-nen-e at-nen idnak aid wene yurag-e ndak neneyaruk, nenpem pidnak me, nit-nen wene yogolar-e, ki nap indingen tak puwokluk-nen yili-ge lag-o. Are, nit ninndi ngaroso Mbal Pem Nagawan at nak indingen tak puwokluk-nen yili-o.

⁵Nde, nit-nen-e kit kinndi wanuwokluk wene konak nak yak kondogolat, kinsilobulo luruwokluk-nen wene konak nak yak kondogolat yige-ge lag-o luk kir-e mondok kenaru nar-o. Nde, Mbal Pem Nagawan-nen na aru-o.

⁶Nggweyak ma nap, kit-nen na irit, ap erep-nen na irit nentembel wanurak pem nenmawi kundili-ge lag-o. Nir-e Kerisut-nen wirik ninpidnak nap-nen yili me, “Iri nggal kwaru-o” luk yak kundurag-e ndag-et nde, larok yige-o.

⁷Alat nde, nir-e kinmin woragolar-e, iniyarak-nen inlirag-e yanggonak nak enparugu woragwi nggal, nir-e iri nggal-et kit kinmin-e ninndi yanggonak irit woraige-o.

⁸Nir-e kit kenabuwa mondok kwarat iri-nen ndowaga Mbal Pem Nagawan-nen idnak aid wene nak tembesa wok kundurag-e lag-o. Are, nit nenpe min-et wok kundurag-e te-t woraige-o. Nir-e kit kenabuwa kwarat kagolat woraige-o.

⁹Nennggamirak wa-e. Nir-e nondomok neneyabu wanogolat siri mbige iri-ge kir-e yebet yebet tak worali-o. Nir-e Mbal Pem Nagawan-nen idnak aid wene yak kondogolat woragolar-e, angin tak kunpul naru, lengge-nen kubu-nen neneyabu wanogolat woraige nar-o.

¹⁰Kit-nen na irit, Mbal Pem Nagawan-nen na irit, wene yu-ge ndemeret wene-o luk kunggurugub-o. Nir-e kit kinndi angin tubu yidnak nap kwat konpogolar-e, marak nak, lud tak nak, siyak lugud tak pigit lak irit kwat kinpige nar-o.

¹¹Nde, nir-e kit kenariktak kwat konpogolar-e, ineidtak-nen it ondomok inlirak kwat unpugwi nggal-et kwat kinpige na-ge kenaru nar-o.

¹²Mbal Pem Nagawan-nen tenagaidnak wi min at unu kek tak pidnak min at totno wanobok-nen wene mbo kinpid Mbal Pem Nagawan na alen tak pobokluk-nen nit-nen-e nggomo kondogolat, keneyak marogolat, kiri keresa yak kondogolat yige-o.

¹³Nde, wene misik yu bem-nen na nir-e Mbal Pem Nagawan wa-o luk kundugu yak tili-o. Nir-e Mbal Pem Nagawan-nen yidnak wene-ge kit yak kindil lobok yogola-ge, kir-e wene na kuluruk wanogolar-e, ki nap-nen yidnak nggal wanigit lag-o. Are, Mbal Pem Nagawan-nen yidnak wene-o luk wanigep nar-o. Nde, wene iri-ge ndemeret Mbal Pem Nagawan-nen yidnak-nen yusu-o. Nde, Mbal Pem Nagawan-e kit kinndi angin tubu yidnak nap kenarem yabu wanusu-o.

¹⁴Nanggamirak wa-e. Mbal Pem Nagawan-nen idnak lambuk tak inpidnak nap, Kerisut Yesus arengge Yurea woragwi nap iri na kwat inpiga nggal, kit na iri nggal-et kwat kinpiga-o. It enlem Yawuri nap-nen it andi bandi rak inpiga nggal, kit na kenma nap-net iri nggal-et andi bandi rak kinpiga-o.

¹⁵Yawuri nap iri-nen-e Nagawan Indo Yesus worogolat, Mbal Pem Nagawan ene lomboksa yugwi nap na ondogolat, nit na lel mberel nonpogolat yiga-o. It iri-ge Mbal Pem Nagawan indi-n pidnag-e perali bug-o. Ap oboksa inmin na sirid mbarak worali-o.

¹⁶Inmiri yurak wene-ge nit-nen enlem nin nap yak unduwa naru, it Yawuri nap-nen larok tak nunpuwokluk yiga-o. Iri nggal kwarogolar-e, it meya yidnag-e mondok kwarat ligik piga-o. Nde, yawo-ge Mbal Pem Nagawan isilepma-ge it enpem mondok pil mbuwasu-o.

¹⁷Nenggamirak wa-e. Nir-e luru kit kendam-nen wud tak ma woragola-ge, nenlengen-nen keneyagit lag-et nde, ninndi arem worali nar-o. Nir-e kiniyudtak kunndulu kagolar-e, kinmin lambuk yurak pem mondok pabok pige-o.

¹⁸Nir-e kit kendam nunuwok lem lobok yurak perarug-e, Paulus an-e mberen kenan nggal pem kendam lobok yurak wal kagi-t nde, Sere-nen larok tak nonposolat woragaij-o.

¹⁹Nde, nit ninndi ebem mbung mbung tak woragwi-ge tarag-o? Nit nenalen eneyagwi-ge tarag-o? Nit Nagawan Indo Yesus lobok yosola tarem-nen at imbiri bem nit nunnu kek tak purak wirik iri-ge tarag-o? Iri-ge kir-er-o.

²⁰Nde, nit ninndi kek yugwi min nit nenalen yugwi min-e kir-er-o.