Read Nduga 1 TESALONIKA 5 Bible Online

1 TESALONIKA 5 - Nduga bible

1 TESALONIKA 5

¹Nennggamirak wa-e. Iri tarem kwaruwa-o luk urul paga engga mbal kundurag-e lag-o.

²Yariya wanoso nap-nen yariya waneyekluk kubu nggwe lobok yoso nggal, iri nggal-et Nagawan Indo lobok yurak Tarem-e wok ma-o luk kit na mondok kenaru nar-o.

³Nde, ap-nen yogolar-e: “Lag-o. Pidsa yamuksa konak nak worali-o” luk yogola, ereya na-net it lak tak unpurak mende-ge mimo enpem mbuma-o. Kwami enabila-nen li ndaguwokluk, mimo yane witli nggal, iri nggal-et it enpem mbuwasolar-e, it na mengga mburuwa bug-o.

⁴Alat nde, nenggamirak wa-e. Kit perak nde ndamuk arem worali buk me, iri Tarem-e yariya wanoso nap nggal mimo wok yosola-ge, kir-e wendet yugup pug-o.

⁵Nde, kit oboksa yaya ilirak luk lengge ilirak-nen yili-o. Nir-e kubu min ndamuk min erep kundik yidnak nab-e lag-o.

⁶Iri bem-e, nin nap-nen nene yogolat worali nggal, nit na nene yurak pug-o. Are, nir-e nunluk woragolat, ninndi min-et wolmog-o.

⁷Ap nene yogolar-e, kubu-n nene yugwi-o. Nde, anggut engen amburu ndonggosa nuruk, inndi wawa yogolar-e, kubu-nen inndi wawa yugwi-o.

⁸Alat nde, nir-e lengge imin kwin yidnak nap me, ninndi min-et wolmog-o. Nit-nen yorogolar-e, ninndi angin tubu yidnak min ap enabuwa kagwi elem min-e tagun nggal yorogolat, nenanggul ndimno nggal-e ninmiri yurak ninndi ebem mbung mbung tak woragwi iri na yuruwog-o.

⁹Mbal Pem Nagawan-nen len ninpij-e, at isilepma nenpem peyekluk-nen len ninpigit lag-o. Are, Nenagawan Indo Yesus Kerisut ebem-nen ninmiri yekluk len ninpij-o.

¹⁰Yesus nit nenmanggim wat yid iri-ge nir-e nunluk woragolat na, wat luk woragolat na, at imin totno nunluk wolmokluk nenmanggim wat yij-o.

¹¹Iri bem-e, kit yawo kwatli iri nggal-et kit na kit-net nggomo wat kerak mbogolat, kinndi uwi yak kerak mbogolat wolmer-o.

¹²Nennggamirak wa-e. Kit kennggendumu yabu wanili nap, Nagawan Indo-nen tu mirik konpogolat, nggomo kondogolat makluk len inpidnak nap ri-ge kit-nen-e kwara kek tak enper-o luk nir-e kiri keresa kenmengen mbatli-o.

¹³It-nen yabu wanili na bem-e, kit-nen mondok kwara kek tak onpogolat, enabuwa ker-o. Kit na kit-net lambinik konak nak wolmer-o.

¹⁴Nennggamirak wa-e. Kir-e wene kuruk tugwi nap iri nggomo ondogolat, inndi terak yugwi nap iri inndi uwi ya bogolat, ndeyak woragwi nap iri na yongga ondogolat, ap oboksa inmin kinndi luruk puruk wolmer-o luk kenmengen mbatli-o.

¹⁵Nde, meya kwarurak pem ap-nen onggo onggo kwaruwa naru, kwara wolmer-o. Kit kennggamtak inmin konak nak wolmomtak pem na irit, ap pidsa inmin konak nak wolmomtak pem na irit, pempa kenmawi kondogolat wolmer-o.

¹⁶Pempa pempa kenalen nak kagolat wolmer-o.

¹⁷Tepan kundugu yogolat nak wolmer-o.

¹⁸Nde, Yesus Kerisut imin kundik woragolat-nen Mbal Pem Nagawan indi-n pidnak kwarugwi-ge yu-o: Kir-e yi mende ndi mende kwat kinpidnak pem Mbal Pem Nagawan wa yak togolat wolmer-o.

¹⁹Konak Indi-ge nigirik purak pug-o.

²⁰Konak Indi-nen yi wene ndi wene yak kindidnak iri-ge te rak purak pug-o.

²¹Yi mende ndi mende oboksa kwara lombot puruk-net konak mende ala, puksa tena wolmer-o.

²²Nde, meya kwarugwi elem oboksa konmbol wok ter-o.

²³Yamuksa woragwi elem Mbal Pem Nagawan-nen-e marak kunpuruk, iminep mbarak konposolar-e, kinndi min kenpe min oboksa nit Nenagawan Indo Yesus Kerisut lobok yurak tarem-nen mondok kop kap lak woraboklug-e, kontowarak wolmag-o.

²⁴Wene mbo kinpid Mbal Pem Nagawan iri-ge mot mot nak kwaroso me, irit kwat kunpuwa-o.

²⁵Nennggamirak wa-e. Nenmanggim tepan yogolat wolmer-o.

²⁶Nennggamirak oboksa wa yak ondogolar-e, marak kinpidnak pem-net manuksa wa yak ender-o.

²⁷Nagawan Indo unu bem an-e kiri keresa yak kundusu-o: “Engga mbarak yu-ge nennggamirak oboksa inmbiri bem wonarurag-o.”

²⁸Nit Nenagawan Indo Yesus Kerisut-nen we wok ondoso elem-e kit kinmin wolmag-o.