Read Nduga 2 TESALONIKA 1 Bible Online

2 TESALONIKA 1 - Nduga bible

2 TESALONIKA 1

¹Nit Paulus min Silwanus min Timotius min-nen-e Tesalonika woragwi lambuk tak inpidnak nap, Nineid Mbal Pem Nagawan min Nagawan Indo Yesus Kerisut min-nen idnak nap kit kenmanggim engga yu mbatli-o.

²Nineid Mbal Pem Nagawan min Nagawan Indo Yesus Kerisut min-nen-e we wok ondoso elem min yamuksa woragwi elem min wok kunduwag-o.

³Nenggamirak wa-e. Kit kenpem ala, nir-e mondok pempa Mbal Pem Nagawan wa yak tili-o. Nde, kir-e kwara kinndi angin tubu yili iri bem-nen na, kit na kit-net kwara nabuwa kabuwa yili iri bem-nen na, nir-e ob-et Mbal Pem Nagawan wa yak tili-o.

⁴Kit iri nggal kwarogola me, Mbal Pem Nagawan-nen idnak lambuk tak inpidnak nap oboksa ennggendumu-nen nir-e kentembel wanili-o. Angin worak mende nin tak nan tak kenpem mbosola na, andi bandi mende kagolat na, kir-e kinndi angin tubu luk, mamak puruk worali me, nir-e kentembel wanili-o.

⁵Iri kwatli iri bem-nen Mbal Pem Nagawan-e mot mor-et ap enpem wene mbaroso-ge nam-et yenggerak kali-o. Nde, kir-e Mbal Pem Nagawan-nen tenagaidnak wi iri-nen ndowaga anggun panggun kali me-ge, kir-e Mbal Pem Nagawan-nen tenagaidnak wi winde yurag-e ndak-nen yusu-o.

⁶Mbal Pem Nagawan-nen mot mot nak kwarosolar-e, kit andi bandi rak kinpili nap na enpem-e at-nen-e andi bandi mende enpem puwa-o.

⁷Iri kwarosolar-e, kit yawo andi bandi kali nap na, nit na, nenmanggim-e Nagawan Indo Yesus na-ge at-nen idnak aid nap amawi worak inmin luk aid arem-nen nam ma tarem-e Mbal Pem Nagawan-nen-e yamuksa woragwi elem wok nunduwa-o.

⁸Kan mare min lobok yosolar-e, Mbal Pem Nagawan-e ndemerer-o luk yugwi buk nap min Nenagawan Indo Yesus-nen yidnak aid wene kuruk tugwi nap min enpem angin worak mende puwa-o.

⁹Iri kwarugwi nap onggo wok ondosolar-e, Nagawan Indo eram-nen abu abu-t mbo unpuwama, woralik nalik woragolar-e, at-nen kek tak woraso amawi eram-nen ir-e nuruk tak irit wolma-o.

¹⁰Iri kwaruwa tarem-e Nagawan Indo-ge at winde nap oboksa ennggenggerak-nen at erembel wanogolat, inndi angin tubu yidnak nap oboksa-nen at wi langgu mbal obogolat yuwa Tarem-e nit-nen yak kindidnak wene wanigep pem-e, kit na it ennggendum iri me-t woragub-o.

¹¹Iri bem-e, nir-e pempa kit kenmanggim tepan yili-o. Nit Nenmbal Pem Nagawan-nen kenperasolar-e, at-nen wene mbo kinpidnak nap ndag-et yobokluk, kenmanggim tepan yili-o. Kir-e konak nak kwaruwog-o luk perali mende kwarurak pem-e at amawi bem-nen ebe kwat yosolat, kit kinndi angin tubu luk kwarugwi mende na iminep mbal yosolat mag-o.

¹²Iri ala-ge, nit Nenmbal Pem Nagawan min Nagawan Indo Yesus Kerisut min-nen we wok ondoso elem pem-net kit kenpem-nen nit Nenagawan Indo Yesus unu kek tak pogolat, kit na at ebem-nen kek tak konposolat ma-o.