Read Nduga 1 TIMOTIUS 1 Bible Online

1 TIMOTIUS 1 - Nduga bible

1 TIMOTIUS 1

¹Ninmiri Yoso Mbal Pem Nagawan-nen yidnak pem-nen na, nit ninndi ebem mbung mbung tak woragwi Kerisut Yesus ebem-nen na, Kerisut Yesus-nen wirik nibidnak nap Paulus an-nen-e

²kat kindi angin tubu yidnak pem ndemeret an nambara kwat yidnak Timotius kamanggim engga yu mbarusu-o. Nde, Nineid Mbal Pem Nagawan min Nenagawan Indo Kerisut Yesus min-nen we wok ondoso elem min ap unpud kagwi elem min yamuksa woragwi elem min-e kimi wolmag-o.

³Nde, an-e Makeronia nggwe mbereyekluk yosolar-e, “Kar-e mondok Epesus wolmin-o” luk yak kirigi nar-o. Nde, Epesus woralar-e, iri me-nen ap kabak tak unpugwi wene mul indili nap ereba na inmin-e “Wene iri yurak pug-o” luk met unpurag-o.

⁴“Tisiya wene min ineid onmbo nderak lolo pok tak pugwi buk wene iri-ge keya ber-o” luk yak indi-o. Iri wene yogolar-e, suwal suwal ndi wurugwi elem-nen yusu me, ninndi angin tubu yidnak pem Mbal Pem Nagawan-nen ninmiri yoso elem iri na kabak tak pusu-o.

⁵It nggomo undugun iri-ge it-nen ap enabuwa kagolar-e, enarem marak pem-net kagolat, yebet kagwi inndi yek tak pem-net kagolat, inndi angin tubu yidnak mondok mot mot pem-net kagolat makluk-nen nggomo ondugun-o.

⁶Ap erep-nen-e wene yu nggal kwarigit lak, ebe lak wene nak yik tenak woragolar-e, kabak yili-o.

⁷It iri-nen-e imiri mbarak pidnak wene mul undugwi nap yurak yili-t nde, it ondomok-nen yili wene min it-nen enne amawi min yak indili wene min iri-ge ir-e kwara yeber-e kagit lag-et yili-o.

⁸Imiri mbarak pidnak wene-nen yidnak ndak ndag-et kwarogolat-nen-e imiri mbarak pidnak wene iri-ge konak-nen yusu-o luk nenaru nar-o.

⁹Wene yu kwara yebet ker-o: Imiri mbarak pidnak wene iri-ge lud tak nak kwarugwi nap enmanggim yidnag-e lag-o. Are, wene kuruk tugwi nap min Mbal Pem Nagawan ene kulugwi buk nap min Mbal Pem Nagawan enaru buk nap min meya kwarugwi nap min Mbal Pem Nagawan indi-n pidnak kwarugwi buk nap min aid wene enaru buk, it inndi-n pidnak nak kwarugwi nap min ineid iniya undugwi nap min ap undugwi nap min

¹⁰mbona yugwi nap min ap-net nde ap ye unpugwi nap min ap-net ap yariya wok unpugwi nap min enesiget yugwi nap min enesiget wene ap enpem pugwi nap min nderemet wene na keya buruk, iri nggal erep kwarugwi nap min enmanggim yidnak-nen yusu-o.

¹¹Ndemeret wene iri-ge mondok erembel wanugwi kek tak Mbal Pem Nagawan-nen idnak Konak Wene-ge an-nen yuwakluk nebem pidnak wene iri-nen yusu-o.

¹²An-nen at eyabu yu wanuwakluk amawi wok nirid Nenagawan Indo Kerisut Yesus-nen-e at ndegel uburak pem ar-e ndak-net yusu-o luk neberaidnak pem an-nen wiwa-o yak tusu-o.

¹³Nanduk woralar-e, an-e at obok posolat, lel mberel obosolat, nisilepma-nen meya rak obosolat yigi-t nde, iri tarem-e an at ebem nindi angin tubu yigit lak, naru buk worasolat-nen kwarigirik me, Mbal Pem Nagawan-nen an nubud kagaij-o.

¹⁴Nde, Nenagawan Indo-nen-e we wok ondoso elem kwarat tak nobosolar-e, Kerisut Yesus ebem-nen-e inndi angin tubu yugwi elem min enabuwa kagwi elem min wok nirij-o.

¹⁵Wene yu-ge ndemeret wene-o luk mondok kwara yebet kudtak wene-o: Kerisut Yesus iri-ge meya yugwi nap inmiri yekluk-nen nggweyak ma yu me lobok yamu-o. Nde, meya yugwi nap ennggendumu-nen-e mondok meya nggulok kwaroso-ge an-ner-o.

¹⁶Alat nde, yu bem-nen Mbal Pem Nagawan-nen an nabuwa kagaij-o. An meya nggulok yoso iri bem-nen Kerisut Yesus-nen mamak puruk woraso na an nebem nam tak pamu-o. Nde, iri yid iri-ge it abok at ebem inndi angin tubu yogola, unlug-et woralik nalik momtak elem wanuwa nap enmanggim mul ondosolat-nen kwat nibij-o.

¹⁷Woralik nalik yoso Nagawan, lak yoso buk Nagawan, ap-nen kagwi buk, misig-et nak woraso Mbal Pem Nagawan iri nak erembel wanogolat, unu kek tak pogolat pem-et woralik nalik mag-o. Amen.

¹⁸Nambara Timotius wa-e. Mbal Pem Nagawan ene lomboksa yugwi nap-nen kat-nen kwarurak urul pidnak iri na yebet karug-e, ndag-et kwarugun kagi luk, an-nen yabu yu kebem pusu-o. Kat kurul pidnak wene iri bem-nen kamawi kondosolar-e, konag-et wim mbarosolar-e,

¹⁹kindi angin tubu yidnak min karem mbek tak pem min-et wim mbarosolat woomin-o. Ap erep-nen-e it inndi konak yebet kagwi na-ge keya buruk, it inndi angin tubu yidnak na-ge lak tak piga-o.

²⁰Iri kwarugwi nap ennggendumu-nen-e Imeneus min Aleksandet min worali-o. Nde, it mberen-e Mbal Pem Nagawan obak pili iri keya buwakluk, an-nen-e Sere eram kegera inpigi-o.