Read Nduga 1 TIMOTIUS 6 Bible Online

1 TIMOTIUS 6 - Nduga bible

1 TIMOTIUS 6

¹Mbal Pem Nagawan unu min nit-nen mul undugwi aid wene min nggwiyuruwa naru, it mumnggup manggi onnggo pidnak nap pidsa-nen-e it onmborak na kek tak onpogolat wolmag-o.

²Nde, it onmborag-e inndi angin tubu yidnak nap ala-ge, “At yu-ge Yesus ebem an nanggam-net yusu-o” luk it mumnggup manggi onnggo pidnak nap-nen onmborak te rak unpurag-e meya-o. Are, it-nen ndegel inpili nab-e enabuwa worak ennggamirak me, kwara lombok ndegel onpogolat wolmag-o. Wene yu-ge mul ondosolat, nggomo ondosolat wolmin-o.

³Nin wene owak mul ondosolat, nit Nenagawan Indo Yesus Kerisut-nen ndemeret yidnak wene min Mbal Pem Nagawan-nen kwaroso nggal nit-nen mul undugwi wene min “Ndemerer-o” luk perasu buk nab-e

⁴ar-e aru buk, mondok kabak-net nde, ondomok kek yusu-o. At-nen indingen yidnag-e wene lugud tugwi min yi wene ndi wene bem ngguno nak purak indi nak yosolar-e, enlengen ale worak tak posolat, kuri worak tak onposolat, nobokpe kobokpe yogolat, inndi-nen kwaramu-t peragwi min

⁵yebet kagwi mende lak yidnak nap min ndemeret wene kabak tak pidnak nap min-nen pempa kundugu neyak puk keyak puk tenak worali-o. It-nen peragolar-e, aid wene iri bem-e silobulo terak lesa wanugwi-o luk perali-o.

⁶Nde, ap mbi-nen perasolar-e: “An narengge yu-ge ndak worasu-o” lu peraso nap amanggim-e aid wene-nen-e ndemeret terak lesa wok toso-o.

⁷Nit ndet yogolar-e, yi mende ndi mende mbi nggweyak ma yu me waruk lobok yigir-e lag-o. Nde, mborogolat na, nggweyak ma yu me-nen na yi mende ndi mende waruk mburul pug-o.

⁸Nde, nunggwi mende min nunsum min worala-ge, “Iri-ge abu ndag-o” luk wolmomtag-o.

⁹Alat nde, “Ninsilobulo worak nap yuwog-o” yugwi nab-e it inndi ngaroso mende bem-nen wosa mbogolat, kere ma ngonok yogolat, ebe lak mende, meya rak onposo mende irit ukwe ukwe yili-o. Iri mende-nen-e ap abapno rak onposolat, ap lak tak onposolat yoso-o.

¹⁰Yi meya ndi meya pidsa elem-e uwang nak ukwe ukwe yugwi irir-o. Ap erep-nen-e uwang langgal luk mborogolar-e, it inndi angin tubu yidnak na-ge kabak tak puruk, it inndi andi bandi rak purak mende kwarat ondomok enpem pugwi-o.

¹¹Alat nde, Mbal Pem Nagawan ndegel oboso nap wa-e. Kat perak nde iri mende pidsa keya bi-o. Are, lud tak nak kwarugwi min Mbal Pem Nagawan indi aye kagwi min inndi angin tubu yugwi min ap enabuwa kagwi min mamak puruk woragwi min yanggonak nak woragwi min iri nak langgal luk mbiri-o.

¹²Kindi angin tubu yidnak wim-e konag-et tomborosolat wolmin-o. Iri kwarosolar-e, unlug-et woralik nalik momtak elem wanugun-o. Kar-e ap kwarat inmbiri bem-et “Nindi angin tubu yigi-o” luk kinggirigen tarem-e Mbal Pem Nagawan-nen unlug-et woralik nalik momtak elem wok kururak pem wene mbo kibid irir-o.

¹³Yi mende ndi mende pidsa unluk wolmomtak mende wok ondoso Mbal Pem Nagawan imbiri bem-et, Pontius Pilatus anggarem ndemeret wene kinggirid nap Kerisut Yesus imbiri bem-et, kiri keresa wene yu yak kurusu-o:

¹⁴Wene yu-nen yidnak yidnak kwarosolar-e, kindi mbek tak, ambut lak irit worasoma, Nenagawan Indo Yesus Kerisut nam ma tarem wok mag-o.

¹⁵Yesus na-ge Mbal Pem Nagawan nak-nen lud tak pidnak tarem-net nam ma-o. O tena woraso amawi worak iri-ge kek tak Mbal Pem Nagawan nak-nen yusu-o. Nggweyak tena woragwi nap pidsa onmbol pem Nagawan-nen yusu-o. Ar-e ki nap kek tak woragwi nap pidsa onmbol pem Nagawan Indo-nen yusu-o.

¹⁶At arig-et nak wat yoso buk-nen yusu-o. Ap-nen panggosa eram wok yugwi buk yaya bem woraso-nen yusu-o. Ap misiger-o luk tet mondok eyagwi bug-o. Iri-nen na ap-nen at eyudtak na meya-o. At unu nak kek tak pugwi min at amawi min-e pem-et worasolat nasolat mag-o! Amen.

¹⁷Nggweyak ma mende winde nap nggomo ondosolar-e: “Kenambik kek yurak pug-o. Lak wolmomtak mende iri bem kinndi-ge mbung mbung tak wolmomtak pug-o. Are, nit nenalen kujwakluk, yi mende ndi mende kwarat tak nonposo Mbal Pem Nagawan ebem nak kinndi mbung mbung tak wolmer-o” luk nggomo indi-o.

¹⁸“Kir-e konak nak kwarogolat, konak nak kwarurak nggok tak pogolat, kinndi konak woragolat, kenarengge ap tembet ondogolat wolmer-o” luk nggomo indi-o.

¹⁹Iri nggal kwarogolar-e, it abok wolmomtak amanggim pem-et wolmomtak silobulo kwarat it enmanggim ndok wuruwa-o. Iri kwatli iri-ge ndemeret unlug-et wolmomtak elem na wanuwa-o.

²⁰Timotius wa-e. Kat kebem pidnak mende iri-ge kwara parugu wolmin-o. Nde, ebe lak wene min Mbal Pem Nagawan indi-n peraso buk wene min enaru yugwi mende-o luk yidnag-et nde, iri wene lit lit eyak wat kerak mbugwi wene min erep tenagurak pug-o.

²¹Nde, ap erep-nen-e: “Mondok enaru yugwi mende iri-ge wanigi-o” luk yogolar-e, inndi angin tubu yidnak keya buruk, lugud tak nggwe mbitli-o. Mbal Pem Nagawan-nen we wok ondoso elem-e kinmin wolmag-o.