Read Nduga 2 TIMOTIUS 3 Bible Online

2 TIMOTIUS 3 - Nduga bible

2 TIMOTIUS 3

¹Wene yu yebet yebet tak wolmin-o. Worok tak purak tarem-e nari wari rak unpurak mende-ge ap enpem mbuwa-o.

²Iri tarem-e ap-nen-e ondomok enabuwa nak kagolat, uwang nak nggok tak pogolat, enambikpebe kek yogolat, inndi kek tak pem wene yogolat, ap pesel onpogolat, ineid iniya enne tarogolat, wa na yugwi buk, aid wene insili rak pogolat,

³ap enabuwa na kagwi buk yogolat, kuri wat yogolat, ap unnu komorogolat, yanggo na yugwi buk, insilepma worak woragolat irit ma-o. It-nen-e konak kwarurag-e insili rak pogolat,

⁴mirim kwarogolat, inndi mburugwi buk yogolat, enaru bug-et nde, ija bija yogolat, Mbal Pem Nagawan indi pidnak keya buruk, it inndi pidnak nggok tak pogolat ma-o.

⁵Enaboro nak-nen aid wene wanili-t nde, aid wene amawi-ge it enarem nggurag-e insili ma-o. Iri nggal kwarugwi nab-e kombol wok indi-o.

⁶It ennggendumu ap erep-nen-e ap enma ya nggwilik nogolar-e, meya yurak inndi te yidnak kwami, it meya yidnak mondok kwarat-nen tebel inpidnak kwami, it-nen ukwe peraidnak nin tak nan tak kobong tak pidnak kwami ereba na enare puwokluk ya nggwilik nili-o.

⁷Kwami iri-nen-e “Mul nender-o” luk kundugu nggi renak worali-t nde, ir-e ndemeret wene iri-ge kwara enaru yili bug-o.

⁸Yanes min Yamberes min-nen Musa-nen yidnak wene eyak wiriga nggal, iri nggal-et ap iri kwarugwi na-nen ndemeret wene na eyak witli-o. Iri kwatli nap iri-ge inndi yebet kagwi na lak yidnak me, it inndi angin tubu yidnak na mborok tak pili-o.

⁹Alat nde, Yanes min Yamberes min-nen lugud tak kwariga na nggal, it-nen lugud tak pidnak na ap pidsa enaru ma me, ndemeret it-nen woragwi-ge nin ma bug-o.

¹⁰Alat nde, kar-e an-nen mul ondoso min an-nen woraso nebage min an-nen yebet karuk kwaroso min an nindi angin tubu yidnak min an-nen mamak puruk woraso min an-nen ap enabuwa kaso min an-nen tugup lak woraso min

¹¹lel mberel nibidnak min andi bandi kagi min neyaigen nar-o. Antiokia-nen na, Ikonium-nen na, Listera-nen na lel mberel nobogola, andi bandi kagi iri na kar-e karu nar-o. Ereba nggal kwat nibiga-t de, Nagawan Indo-nen nimiri yij-o.

¹²Kerisut Yesus imin kundik woragolat-nen Mbal Pem Nagawan-nen kwaroso nggal kwaruwokluk yuwa nap pidsa-ge lel mberel unpuwar-o.

¹³Nde, meya yugwi nap min ap onmbol pem lagwi nap min-e meya kwarat ebem lud lud kwarogolar-e, ap onmbol pem lali-t nde, it na enambik onmbol pem lali-o.

¹⁴Alat nde, kar-e ndemeret wene mul korosola, kuluruk ndemerer-o luk wanigen wene iri-ge tena wolmin-o. Kat mul kiriga nap kar-e karu-o.

¹⁵Kar-e la marik pem-net Mbal Pem Nagawan engga karu woraigen iri-ge mondok yeberak wolmin-o. Mbal Pem Nagawan engga-nen-e Kerisut Yesus ebem kindi angin tubu yusola, kimiri yuwakluk kat kindi nggat nggat worak tak purag-e ndag-o.

¹⁶Mbal Pem Nagawan engga bem mbarak worasu wene pidsa-ge Mbal Pem Nagawan-nen enmendam tak pidnak wene-nen yusu-o. Nde, engga iri bem-nen-e ndemeret wene mul nondosolat, meya yidnak nam tak posolat, ap enpage mot tak posolat, konak nak kwaruwakluk nggomo nondosolat momtag-e ndak-nen yusu-o.

¹⁷Mbal Pem Nagawan ndegel ubugwi nap-nen-e yi kwatlik ndi kwatlik kwarogolat konak nak kwaruwakluk Mbal Pem Nagawan engga-nen-e iminep mbarak lid lud tak unpusu-o.