Read Nduga TITUS 2 Bible Online

TITUS 2 - Nduga bible

TITUS 2

¹Alat nde, kar-e aid wene mot mor-et mul undugun na-e.

²Ap indi worak yak ondosolar-e: “Kir-e kinndi min-et woragolat, kinndi nggat nggat worak woragolat, kondomok kinndi towarak woragolat mer-o. Nde, kinndi angin tubu yidnak pem na, ap enabuwa kagwi bem na kinndi luruk puruk woragwi bem na iminep mbarak irit wolmer-o” luk yak indi-o.

³Nde, iri nggal-et kweyap indi worak yak ondosolar-e: “Mbal Pem Nagawan indi aye worak kweyap-nen woragwi irit woragolar-e, kenpage marak irit wolmer-o. Ap erep unnu meya rak purak pug-o. Anggut engen amburu na ndonggosa norak pem iri ndegel pugwi kweyap yurak pug-o.

⁴Kir-e wene konak nak mul ondogolar-e,

⁵it kweyap ndugum-nen it ununtak min inlirak min enabuwa kagolat wolmakluk, kit-nen na kwara mul ender-o. Nde, mul undugup iri-ge ap-nen Mbal Pem Nagawan-nen idnak aid wene meya rak puwa naru, kweyap ndugum-e inndi pindong tak woragolat, marak irit woragolat, it enma woragwi kweyap kwara ndegel unpugwi kwami konak irit woragolat, ununtak enne nak kologolat makluk mul ender-o” luk yak indi-o.

⁶Iri nggal-et sugwe na kiri keresa nggomo ondosolar-e: “Kit kondomok kinndi towarak wolmer-o” luk nggomo indi-o.

⁷Nde, kat na kebage ob-et kiyujwaklug-e, yi mende ndi mende kwarosolar-e, konak nak kwarugun na-e. Kar-e kindi mot mor-et woralat, ndemeret kindi-net mul ondosolat wolmin-o.

⁸Kat kene eyak wurugwi nap-nen nit nonpok puwokluk yuwa-t nde, nit-nen yidnak yidnag-e konak nak ala, pesera mbuwakluk, kat-nen wene yosolar-e, kwalug-et ap-nen obok purak puk wene-t yurag-o.

⁹Ndegel unpugwi nap-nen-e it-nen ndegel unpugwi nap enne kologolat, it-nen yidnak yidnak irit kwarogolat wolmag-o. It-nen ndegel unpugwi nap-nen yidnak wene eyak worogolat,

¹⁰enarengge yariya wanogolat yurak pug-o. Are, Ninmiri Yoso Mbal Pem Nagawan-nen yidnak wene iri-ge kek tak nak pogolat wolmakluk, ir-e pempa yi mende ndi mende kwarogolar-e, konak nak kwarogolat, mot mor-et kwarogolat mag-o.

¹¹Ap pidsa inmiri yekluk, Mbal Pem Nagawan-nen we wok ondoso elem nam tak pij-o.

¹²We wok ondoso elem-nen mul nondosolar-e: “Mbal Pem Nagawan isili rak pidnak kwarugwi min nggweyak ma mende ukwe ukwe yugwi min iri na mbo buruk, nggweyak ma yu me woragolar-e, kondomok kinndi towarak woragolat, mot mor-et kwarogolat, Mbal Pem Nagawan indi aye worak wolmer-o” luk mul nundusu-o.

¹³Nde, yawo-ge nit Nenmbal Pem Nagawan anggu obok worak min Ninmiri Yoso Nap Yesus Kerisut min-nen idnak abinal nam tak purak Tarem iri na bem nit ninndi mbung mbung tak woragwi iri na yik karok worali-o.

¹⁴Yesus iri-ge yi meya ndi meya kwarugwi inggem-nen ninmiri yekluk, at ondomok amanggim marak nunpuruk, at elem nap tak nenpeyekluk, “Konak mende nak kwaruwog-o” yugwi nap tak nenpeyekluk, at-net at ambikpebe iminep nit nenmanggim wesel koragaij-o.

¹⁵Wene yu oboksa mul ondosolat, nggomo ondosolat, meya kwarogola, met onposolat yosolar-e, kene amawi min-et yurag-o. Nde, ap misik-nen kat teberak nggal yik kiyudtag-e meya-o.