Read Nduga TITUS 3 Bible Online

TITUS 3 - Nduga bible

TITUS 3

¹Kat-nen nggomo ondoso nap na yeberak onposolar-e: “Nggweyak tena woragwi nagawan min pemerinta nap min-nen yidnak wene kuluruk, it-nen yidnak yidnak nak kwarogolar-e, yi mende ndi mende konak nak kwarurak pem-e lid lud tak puruk wolmer-o.

²Ap onpok purak pug-o. Yuk puk na mburak pug-o. Are, yanggonak konak nak woragolar-e, ap pidsa inmin-e pempa nanggau kanggau wolmer-o” luk yak indi-o.

³Nit na irit nandug-e nenaru buk woragolat, yidnak yidnak kwarigit lak lugud tak nak kwarogolar-e, nit-nen ukwe ukwe yugwi mende min nit nindingen mende pidsa-nen urugwe nggwe rak ninpidnak woraige-o. Meya kwarurak nak peragolat, enambuwon mbarogolat, nin nap inmin nisili kisili woragolat kwat tenak woraige-o.

⁴Alat nde, Ninmiri Yoso Mbal Pem Nagawan-nen-e indi konak elem min nenabuwa kaso elem min mirik nonposolar-e,

⁵ninmiri yij-o. Nde, nit-nen lud tak nak kwaridnak pem ninmiri yij-e lag-e. Alat nde, at ondomok-net nunpud karuk, ninmiri yij-o. Iri yid iri-ge Konak Indi na-nen nit mat nonposolar-e, tuguruk ndet nonposolat, nit nenpage ngget wok nondosolat yij-o.

⁶Ninmiri Yoso Yesus Kerisut ebem Mbal Pem Nagawan-nen Konak Indi-ge nit nenpem kwarat nggilara mberak pij-o.

⁷Iri rak ninpid iri-ge, Yesus-nen we wok ondoso elem pem nir-e Mbal Pem Nagawan imin kwindik nonposolat, pem-et nunlug-et wulmul-o luk ninndi-ge iri bem mbung mbung tak worali iri na wok nondosolat yekluk, iri rak ninpij-o.

⁸An-nen yak kurusu yu-ge ndemeret wene-o. Mbal Pem Nagawan ebem inndi angin tubu yugwi nap-nen-e ndemeret konak nak kwarogolat wolmakluk, kat-nen wene yu-ge amawi rak purak iri-ge an-e nindingen-o. Iri kwarurak iri-ge ap pidsa enmanggim mondok konak lombok-nen yusu-o.

⁹Alat nde, ebe lak mende ngguno suwal suwal mbogolat, ndet yidnak lolo unnu mbarak mbenarogolat, imiri mbarak pidnak wene lit lit yuk puk mbogolat, yig pogolat yogola-ge kar-e erep nggaru bug-o. Iri kwaridnak pem-nen lesa wanurak mondok lak, ebe lak mende-nen yoso-o.

¹⁰Ap mbi-nen ndowaga lambuk tak inpidnak nap ennggendumu kuri wat onposo nap iri mberen pem-et nggomo wurugun-et nde, kuligit lak ala-ge, at imin-e are kundurak pug-o.

¹¹Iri kwaroso nap iri-ge lugud tak nggwe mburusu-o luk karu nar-o. At meya yidnak iri-nen ndowaga at ondomok are pusu-o.

¹²An-e Aretemas ala na, Tikikus ala na, ndag-et nak kat keram wirik onposolug-e, o toro wok yidnak tarem-e Nikopolis woramin-o luk nindi pigirik me, kar-e ndag-et nggal-et an neram iri me lobok yugun na-e.

¹³Imiri mbarak pidnak wene aru nap Senas min Apolso min iri-ge kona ndak nak mburuwaklug-e, it-nen ukwe mende pidsa wok undugun na-e.

¹⁴It-nen pempa ukwe peragwi mende na ndak nak wolmakluk, nit nab-e konak nak kwarurak iri-ge mondok kwarogolat wolmag-o. Ir-e we kasabat wolmomtag-e meya-o.

¹⁵An totno yu me worali nap pidsa-nen wa yak kitli-o. Nde, nennggamirak Kerisut ebem ninndi angin tubu yige nap erep na yak ondosolar-e: “Wa yak kindiga-o” luk yak indi-o. Mbal Pem Nagawan-nen we wok ondoso elem-e kit pidsa kinmin wolmag-o. Hormat kami, Paulus