Read Nduga PILEMON 1 Bible Online

PILEMON 1 - Nduga bible

PILEMON 1

¹Kerisut Yesus ebem kere kamat nibidnak nap Paulus an min nonowot Timotius min-nen nit nennggam, yabu misiget erep wanoso nap Pilemon kat min,

²kat kama ndok wurugwi lambuk tak inpidnak nap min, nit nonowot la kwe Apia min, nennggam totno nenmawi kundugwi nap Arakipus min, kenmanggim engga yu mbatli-o.

³Nineid Mbal Pem Nagawan min Nagawan Indo Yesus Kerisut min-nen idnak we wok ondoso elem min yamuksa woragwi elem min-e kit kinmin wolmag-o.

⁴Nanggam Pilemon wa-e: An-e pempa tepan yosolar-e, kat kunu luk kat kebem ala, “Mbal Pem Nagawan wa-o” luk yoso-o.

⁵Nde, iri yoso iri-ge kat-nen marak nap oboksa enabuwa kasolat, Nagawan Indo Yesus ebem kindi angin tubu yosolat yoso iri-nen yoso-o.

⁶Nde, an-nen tepan yosolar-e, nir-e ninndi angin tubu yidnak pem nanggam kanggam yidnak iri-nen kwat nonposolar-e, Kerisut imin kundik woragola, imbiringgat tak ninpidnak mende pidsa nenaru makluk tepan yoso-o.

⁷Nanggam Pilemon wa-e. Kar-e an nabuwa kasu bem-e an nalen tak posolat, nindi uwi ya bosolat yusu-o. Marak inpidnak nap pidsa na inndi uwi ya bigen-o.

⁸Iri bem-e, an-e Kerisut ebem kat kanggam tak nibidnak me, an-e kwiye lag-et kat-nen kwarurak mende kwaronok-nen nene amawi min-et yak kururag-e ob-o.

⁹Iri yurag-e ob-et nde, Paulus an-e ap nindi worak Kerisut Yesus ebem ala, yawo o kubu me nibidnak na worasu-t nde, kat kabuwa-nen an-e kwat obonokluk wene nak yak kurusu-o.

¹⁰An o kubu me worasolar-e, Kerisut ebem at eid kwat yidnak me, an Paulus-nen-e an nambara Onesimus-e kat kebe nggi yak kurusu-o. (Onesimus yogolar-e, ebe worak mende yogolar-o.)

¹¹Nandug-e Onesimus iri-ge kat kimin woralar-e, ebe lak mende nggal woragaij-et nde, yawo-nen-e kat kimin na irit, an nimin na irit, ebe worak mende agaij-o.

¹²Nde, yawo-ge la iri-ge kat keram pil lobok yusu yu-ge an nindi kumburak irit pil lobok yusu-o.

¹³An-e aid wene bem-nen o kubu me nibil nggwidnak yu worala, kat-nen yongga nururak nggal kondolma sa yongga nuruwakluk la iri-ge tenaburak peragi-t nde,

¹⁴kat-nen “Ob-o” yigit lak ma, an-nen nak kwarurag-e meya-o. An nak-nen ndumu yurag-e lag-o. Are, kat kindi-nen peraruk nak-nen yongga nururag-e nindingen-o.

¹⁵Onesimus na-ge we luru marig-et kat keya kuburuk mbirid iri-ge, tuguruk wok obosola-ge, kat kimin pem-et worayekluk-nen kwarid nde ma-o.

¹⁶Nde, yawo-ge are kat ndegel koboso nap nag-e lag-o. Are, Kerisut ebem kat kowot abuwa worak kwat yidnak-nen yusu-o. La iri-ge an-nen abuwa kwarat kasu-o! Nde, an-e abuwa kasu-t nde, kat ndegel koboso bem na, Nagawan Indo ebem-nen kat kowot yidnak pem na, kar-e abuwa kwarat kagun-o.

¹⁷Iri bem-e, kat-nen nde an nimin-e “Nit Kerisut ebem ninndi angin tubu yidnak nap misiger-a” luk neberasolar-e, Onesimus na tuguruk wok obosolar-e, an wok nibidnak nggal irit wok ibi-o.

¹⁸Nde, at-nen nde kat meya rak kibidnak worala na karengge namat wanidnak worala-ge, an ngebem keya burag-o.

¹⁹Nde, an nondomok ninggi-net yu mbarusu-o: “Paulus an-net pidsa uwi yagimin-o.” (Alat nde, an namat kat kebem pidnak iri “Iniksa kebem worasu-o” luk yak kururag-e lag-o. Nde, namat iri-ge kat kindi ngget wanigen min-et yigi-o.)

²⁰Iri bem-en, nab-o, Nagawan Indo unu bem yongga niri-o. Kerisut ebem kundigerik me, nindi yamuk tak pi-o.

²¹An-nen nggi yak kurusu mende iri-ge mondok wog-et nurugun-o peraruk engga yu-ge mbarusu-o. Nde, kat-nen siyak terak menna-t kwarugun-o luk keberasu-o.

²²Iri kwarosolar-e, an wolmomtak nondoro mbi lud tak puruk wolmin-o. Mbal Pem Nagawan-nen-e kit pidsa-nen tepan yili na kuluruk, tuguruk kit kendam nibil lobok yuwa-o luk perasu-o.

²³Kerisut Yesus ebem totno o kubu me worali nap Epaparas na-nen-e wa yak kurusu-o.

²⁴An nimin yabu misiget erep wanugwi nap Marakus min Aristarakus min Ndemas min Lukas min-nen na irit wa yak kitli-o.

²⁵Nagawan Indo Yesus Kerisut-nen idnak we wok ondoso elem-e kit pidsa kinmin wolmag-o.