Read Nduga IBERANI 1 Bible Online

IBERANI 1 - Nduga bible

IBERANI 1

¹Nandug-e kwarat pem Mbal Pem Nagawan-nen nit nenlawingga yak ondosolar-e, Mbal Pem Nagawan ene lomboksa yugwi nap enpem nggwe-nen yak indij-o. Iri yosolar-e, tu nin tak nan tak pem yak ondosolat woragaij-o.

²Alat nde, worok tak posolat tarem yawo-nen-e at Ambara ebem nggwe-nen wene yak kundusu-o. At Ambara ebem-net Mbal Pem Nagawan-nen yi mende ndi mende oboksa ndak wirij-o. At Ambara iri-net yi mende ndi mende oboksa winde yuwag-o luk Mbal Pem Nagawan-nen len ibij-o.

³At Ambara iri-ge Mbal Pem Nagawan kektak woraso abinal-net yusu-o. Ambara iri-ge Mbal Pem Nagawan abage ndak worak-net yusu-o. At ene amawi bem-nen yi mende ndi mende oboksa yogo buruk worasu-o. At iri-nen-e ap-nen meya yogolat woraidnak oboksa marak purug-e, aid arem woraso Amawi worak Mbal Pem Nagawan na inggi kigit nggwe kore yij-o.

⁴Ambara unu yarosolat na, aid nap unnu yarij-e teberag-et nde, Ambara unu-ge kek tak lombok yarij-o. Iri nggal-et it aid nap wolmomtag-e teberak nggal wok indij-et nde, Ambara-ge kek tak irit ibij-o.

⁵Mbal Pem Nagawan-nen-e aid nap misiget ter-o luk yak tosolar-e: “Kar-e an Nambara-net yusu-o. Yawo-t an-e kat Keid kwat yigi-o” luk mondok yak ondoso bug-o. Iri-nen Mbal Pem Nagawan-nen aid nap mbi imin yosolar-e: “An-e at Eij-et timin-o. Nde, ar-e an Nambara ma-o” luk mondok inmin yoso bug-o.

⁶Nde, Mbal Pem Nagawan-nen at Ambara manggu iri-ge nggweyak ma yu me ibil mbuwayekluk-nen yosolar-e: “Mbal Pem Nagawan-nen idnak aid nap oboksa-nen-e at nak erembel wanuwag-o” luk yij-o.

⁷Nde, Mbal Pem Nagawan-nen-e at-nen idnak aid nap inmin yosolar-e, yu nggal yij-o: “Mbal Pem Nagawan-nen-e at-nen idnak aid nab-e obube nggal ndak wat onposolat, at ndegel ubugwi nab-e kan mare nggal kwarak onposolat yusu-o” luk yij-o.

⁸Alat nde, Mbal Pem Nagawan-nen at Ambara yak tosolar-e: “Mbal Pem Nagawan wa-e. Kat-nen tenagaidnak wi-ge pem-et woralik nalik ma-o. Kat-nen tenagaidnak wi arem woragwi nap enpem wene mbarosolar-e, wene lud tak nak mbaroso-o.

⁹Kar-e mot mot kwarugwi-ge kindingen tak posolat, nde, lugud tak kwarugwi-ge kisili rak posolat yoso karuk, Mbal Pem Nagawan, Kembal Pem Nagawan iri-nen-e kalen tak posolar-e, kat kanggamirak na teberak unpuruk, kat nak kek tak kuburak pem len kibij-o” luk yij-o.

¹⁰Mbal Pem Nagawan-nen tuguruk yosolar-e: “Nagawan Indo wa-e. Tel korosolat-net nggweyak yu-ge kat-net ndak worak puruk, kat kondomok kinggi-net mbal na ndak worak pigen-o.

¹¹Ndak wiridnak tengge oboksa-ge lak ma-t nde, kar-e kemesiyak irit woragun-o. Ndak wiridnak tengge oboksa-ge sum lebena labuk yusu na nggal lebena labuk ma-o.

¹²Lis yunggurugwi nggal, ndak wiridnak tengge iri-ge kat-nen-e yunggwirik pugun-o. Sum yonggora keya bugwi nggal, ndak wiridnak tengge iri-ge yonggora keya-t pugun-o. Alat nde, kar-e pempa kemesiyak yu-t woragun-o. Kar-e kindi worak luk wat yugun-e lag-o” luk yij-o.

¹³Nde, Mbal Pem Nagawan-nen aid nap misiger-o luk tet yak tosolar-e: “An-nen-e kat kimin wim nab-e kat kijok ondoro nggal tak enpeyekluk worala-ge, kar-e an ninggi kigit nggwe koreyak wuri-o” luk mondok yak ondoso bug-o.

¹⁴Iri ala-ge, it aid nap iri-ge no mende-nen yili-o? It oboksa-ge Mbal Pem Nagawan ndegel obogolat, Mbal Pem Nagawan-nen urul pidnak inmiri yurak wene iri na wanurak nap yongga unduwakluk wirik onposo indi-nen yili-o.