Read Nduga IBERANI 12 Bible Online

IBERANI 12 - Nduga bible

IBERANI 12

¹Iri bem-e yik neneyarok worali nab-e mondok kwarat kambuk kambuk tak nunpuruk worali me, angin tak nunpurak mende oboksa keya buruk, puk tak nunpurak meya yogolat woragwi mende na keya buruk, nir-e kondok yil mburugwi sa iri me pong kil mborogolar-e, pong tenak nak wolmog-o.

²Nenlengen-e Yesus ebem-et kere kererak wolmog-o. Nde, nit ninndi at ebem angin tubu yul kuri-nen woroksiyem kuri Yesus-nen nak yongga nunduwa-o. Yesus na-ge e lang pang tak pem wat yosolar-e, abok-nen nalen kamin-er-o peraruk-nen e lang pang tak pem wat yogolat-nen ininggiri kagwi na kagit lak wat yij-o. Watlug-e, Mbal Pem Nagawan-nen koreyak woraso sa iri na inggi kigit ambigit nggwe yawo na koreyak worasu-o.

³Meya yugwi nap-nen Yesus na-ge insili min mondok kwarat lel mberel obogola, indi mamak puruk woragaid iri-ge kinndi yebet ker-o. Iri yebet kagup pem-e, kinndi pok luk nggeyok yugup pug-o.

⁴Kir-e meya yogolat woragwi mende imin wim pogolar-e, awo keneyabi wirik pigit lag-o.

⁵Nde, ineidtak-nen inlirak nggomo undugwi nggal Mbal Pem Nagawan-nen ilirak kit nggomo kindid na meme rak purak pug-o. At-nen yosolar-e: “Nambara wa-e. Nagawan Indo-nen kindi wanonok-nen korosola-ge, te rak purak puk na-e. At-nen met kobosola-ge, kindi pok yurak puk na-e.

⁶Nde, Nagawan Indo-nen-e at abuwa kaso nap ala-ge, indi wanuwakluk worosolat, nde, at ambara rak pidnak nap ala-ge, linggamburok worosolat yoso-o” luk yij-o.

⁷Ineidtak-nen inndi wanuwakluk undugwi nggal, Mbal Pem Nagawan-nen linggamburok kondosola-ge, kir-e e! luk wanurag-o. Nde, la mbi-ge eid-nen indi wanuwakluk woroso buk mbi worasu-a?

⁸At ilirak oboksa inndi wanuwakluk ondoso me, kit nde iri nggal kwat konposo buk ala-ge, kir-e ndemeret at ilirak-nen yili-ge lag-o. Are, we ndumu nderak-nen yili-o.

⁹Nde, nit nineidtak-nen-e ninndi wanuwakluk nondogola-ge, nit-nen-e it unnu kek tak pugwi-o. Nde, Nineid Mbal Pem Nagawan-nen ninndi wanuwakluk nondosola, nunluk wolmakluk nundusu-o luk mondok at-nen yidnak yidnak terak menna irit kwaruwog-o.

¹⁰Nit nineidtak-nen-e it-nen konak kwarurak iri nggal-o luk peraidnak pem we luru woragolar-e, ninndi wanuwakluk nundugwi-t nde, Mbal Pem Nagawan-nen nundusu iri-ge nit nondomok konak tak nenpeyekluk, at mbek tak woraso nggal nit mbek tak nenpeyekluk nondoso-o.

¹¹Nit ninndi wanuwakluk nondogola-ge, nindidnak tarem ereya na-net ninndi alen tak poso bug-o. Ninndi puru yugwi-t nde, abok-nen-e nindidnak iri-nen ndowaga Mbal Pem Nagawan indi-n pidnak nak kwarogolat, ninndi yamuksa woragwi-o.

¹²Iri bem-e kininggi leyok tak iri na lek tak pogolat, konowak merakurak na amawi rak pogolat mer-o.

¹³Konowak ya langgok nugwi iri na ebem lud ma naru, tula ndung tak nggwe nak waring kagolat wolmer-o.

¹⁴Ap pidsa inmin kundik wolmomtak pem kenmawi konder-o. Nde, mbek tak worabokluk na kenmawi yer-o. Mbek tak woragwi buk nab-e ap misiget ter-o luk Nagawan Indo kujwa bug-o.

¹⁵Kit kennggendumu-nen ap misik-nen-e Mbal Pem Nagawan-nen we wok ondoso elem keya buwa naru kwil kwalsa wolmer-o. Kit kennggendumu-nen ap misik-nen ngari worak emengen nggal lasolar-e, ninggis mende-nen ap kwarat meya rak unpuwa naru, kwil kwalsa wolmer-o.

¹⁶Nde, kit kennggendumu nen ap misik-nen mbabi kwarosolat, Esau-nen kwarid nggal konak mende na ebe lak mende nggal tak posolat ma naru, kwil kwalsa wolmer-o. Esau na-ge manggu nderak nak-nen wanugwi imbiringgat mende na-ge misiget pem norak piring iri na min onggo onggo rak pamu-o.

¹⁷Kir-e kenaru-o. Onggo wanarik ombol nggwe-nen-e eid-nen at imbiringgat tak uburak na indingen kwarat woragaij-et nde, at imbiringgat tak ibigit lag-o. Yip min-et emengen mbarij-et nde, at-nen kwaridnak iri tuguruk ndet yaga nin tak purag-e meya yij-o.

¹⁸Nde, nanduk Isarael nap-nen wok yiga nggal, kir-e wok yili bug-o. Ir-e ndak unuwok purak sa Sinai ndobo bem wok yiga nggal-e kan mare kwarat yosola, o mom ki yosola, o ndamuk yosola, o wijakni yosola, kaiga-o.

¹⁹Karug-e, posid poba ene yosola, ene nggulok misik mberak posola kuliga-o. Nde, it kuliga nap-nen-e wene erep min yuwa naru emengen mbariga-o.

²⁰Ene iri-nen it yak ondosolar-e: “Wam misiger-o luk tet ndobo yu engga min enpem yidnak nde ala-ge, kerep pem mondok wururag-o” luk yak ondosoloma-ge, ir-e wene iri kulurag-e kwiye yiga-o.

²¹Iri kwaridnak iri-ge Musa-nen kagaidnggal-e, mondok kwiye worak mende ala karug-e, Musa-nen yosolar-e: “An-e kwiye kwarat luk nowak lele yusu-o” luk yij-o.

²²Alat nde, iri-ge kit-nen wok yogolar-e, Sion ndobo bem urug-et woraso Mbal Pem Nagawan uwi siri, aid arem wi Yerusalem iri me-ge aid nap kere kwarat woragwi sa iri me-t wok yigeb-o.

²³Mbal Pem Nagawan ilirak manggu nderak, unnu-ge aid arem mbarak worali nap-nen enalin enalen yuwokluk ndok worogola, kir-e endam wok yigeb-o. Kir-e oboksa enpem wene mbaroso Mbal Pem Nagawan eram wok yogolat, lud tak nak woragwi nap iminep mbarak pidnak inndi endam wok yigeb-o.

²⁴Ngget tul pidnak wene imin kundik ninpidnak nap Yesus eram wok yogolat, nde at eyabi nggweyel kaidnak na eram wok yigeb-o. Nde, Abel eyabi iri-nen wene te nggal yij-et nde, Yesus eyabi iri-nen mondok terak minik konak wene irit yij-o.

²⁵Iri bem-e, wene yak kundusu nap-nen yidnak wene iri-ge “Kulimin pug-o” luk yugup naru, kwil kwalsa womer-o. Nggweyak ma yu me-nen Mbal Pem Nagawan-nen yidnak wene yak ondogola, “Kulul pug-o” luk yiga nap ereya-ge at inggem-nen mengga mbirigit lak nar-o. Nde, nit-nen na irit aid arem-nen wene mberak pil mbuwasu iri na kuligit lak keya bogola-ge, nggesa-nen at inggem-nen mengga mburul-o? Mondok meya-o.

²⁶Iri tarem-e, Mbal Pem Nagawan ene-nen o nggweyak lele rak pij-et nde, yawo-ge at-nen urul posolar-e: “Tuguruk misik pem-e lele rak posolar-e, nggweyak nag-e lag-o. Are, mbal min-et lele rak pimin-o” luk urul pij-o.

²⁷Nde, at-nen-e “Tuguruk misik pem-o” luk yid iri-ge lele rak puwarig-e, ndak wiridnak mende oboksa lele rak puruk, lak tak purak pem yij-o. Iri bem-e, tugup lak wolma mende iri nak wolma-o.

²⁸Iri bem-e, nit nunuwi nggweyak iri-ge mondok tugup lak wolmomtak wi wok nindidnak me, Mbal Pem Nagawan wa yak togolat wolmog-o. Nde, Mbal Pem Nagawan-nen “Iri nggal kwat nubuwag-o” luk yidnak pem at erembel wanogolar-e, ninndi kwiye min-et at kek tak pogolat wolmog-o.

²⁹Nde, nit Nenmbal Pem Nagawan iri-ge lak tak poso kanduk-nen yusu-o.