Read Nduga IBERANI 4 Bible Online

IBERANI 4 - Nduga bible

IBERANI 4

¹Iri bem-e nir-e Mbal Pem Nagawan indisep kwaroso sa nggurak obok yak nindid na-ge worasotla me, kit kennggendumu-nen ap mbi-ge iri me nggwigit lak ma-o luk kwara wolmog-o.

²Nde, konak wene iri-ge it-nen kuliga na nggal-et nit na kulige-o. Nde, wene iri kologolat woraiga-t nde, wene na bem inndi angin tubu yigit lak yigarik me, wene na-ge it enmanggim-e ebe lak mende nggal yij-o.

³Nde, nit ninndi angin tubu yige nab-e Mbal Pem Nagawan indisep kwaroso sa iri me-t nindisep kwaril nggul-o. Iri-ge Mbal Pem Nagawan-nen yosolar-e: “An nisilepma luk owak mbarosolar-e: ‘It iri-ge an nindisep kwaroso sa iri me mondok pem ngguma bug-o’ luk owak mbarigi-o” luk yij-o. Iri yid iri-ge o nggweyak yu me ndak worak pidnak kuri-net at eyabu pidsa worak tak pij-et nde, at-nen iri yij-o.

⁴Nde, Mbal Pem Nagawan engga arem-nen-e tuju bem tak posolat we woragaid tarem iri na min yosolar-e: “Mbal Pem Nagawan-e yi mende ndi mende ndak worak puruk, tuju bem tak posolar-e, indisep kwaramu-o” luk yij-o.

⁵Nde, engga wene iri bem-nen wene iri na-t yosolar-e: “It iri-ge an nindisep kwaroso sa iri me an neram-e mondok pem ngguma bug-o” luk yij-o.

⁶Nde, ap ereb-e at indisep kwaroso sa iri me ndak ngguwa-o luk yidnag-e nam-et worasu-o. Alat nde, it nanduk nandug-et konak wene kuliga nab-e it inndi angin tubu yigit lak iri bem-nen indisep kwaroso sa nggwigit lak yiga-o.

⁷Nde, Mbal Pem Nagawan-nen “Iri tarem-o” luk yid iri-ge yawo yu min-et yij-o. Nde, iri wene-ge Mbal Pem Nagawan-nen Ndaud emendam tak pij-et nde, olengen kwarat woraruk ombol nggwe yanem abam nggwe yigi engga wene (3:15) iri arem-nen tuguruk yosolar-e: “Kir-e yawo Mbal Pem Nagawan ene kulurug-e, keneyanggo lak yurak pug-o” luk yij-o.

⁸Nde, Yosuwa iri-nen nde it indisep kwarurak sa iri me wok unpuruk nggwidnggal-e, Mbal Pem Nagawan-nen-e nin tarem urul pid iri-ge tuguruk urul pelep pug-o.

⁹Iri bem-e, Mbal Pem Nagawan-nen tuju bem tak posolat ababok kwarid iri nggal Mbal Pem Nagawan ilirak enmanggim enpabok kwarurak tarem-e worasur-o.

¹⁰Nde, ta-nen nde Mbal Pem Nagawan indisep kwaroso sa iri na me ngguwa nab-e Mbal Pem Nagawan-nen yi mende ndi mende ndak worak puruk indisep kwarid iri nggal at eyabu ndegera keya buruk indisep kwaruwa-o.

¹¹Iri bem-e it nanduk inndi angin tubu yigit lak yidnak pem nggwigit lak yiga na nggal, Mbal Pem Nagawan indisep kwaroso sa nit nennggendumu ap misiget ter-o luk nggwigit lak yul-o luk Mbal Pem Nagawan indisep kwaroso sa iri me nggurak pem kwara lombok nenmawi kunduwog-o.

¹²Nde, Mbal Pem Nagawan-nen yidnak wene-ge uruk nak woraso, amawi kwarat-nen yusu-o. Yalawi anggat ponok ponok worak iri-ge anggar-e te-t nde, Mbal Pem Nagawan-nen yidnak wene-ge anggar-e terak minik-net yusu-o. Wene iri-nen at enarem nggosolar-e, enaboro-nen ukwe yugwi inndi na arik lenak posolat, inndi-nen ukwe yugwi inndi na arik lenak posolat, il min enpa min lenak posolat; ap inndi-nen ukwe ukwe yugwi min ap inndi arem-nen yebet kagwi min nam tak poso abam-nen yusu-o.

¹³Nde, ndak wiridnak tengge misiger-o luk tet at erengen pem-e kura worasu-ge mondok lag-o. Yi mende ndi mende oboksa-ge at erengen pem-e mondok ngenwa nam-et nak yik kasu-o. Nde, iri yoso nap imbiri bem nit pidsa-ge nit-nen kwarogolat woraidnak mende-ge mondok nam para yak tul-o.

¹⁴Iri ala-ge, Mbal Pem Nagawan Ambara Yesus, nit nentepan ombo nggulok na-ge Mbal Pem Nagawan eram aid arem iri me nggwidnak me, nit ninndi angin tubu yidnak na-ge mondok puksa tena wolmog-o.

¹⁵Nde, nit nentepan ombo nggulok iri-ge nit ndeyak yugwi mende iri bem-e at-nen na nunpud kasu-o. Nde, nit ninndi ngaroso mende pik paksa-nen-e at indi na ngarij-et nde, ar-e meya mbi kwarigit lag-o.

¹⁶Iri bem-e, Mbal Pem Nagawan indi op koreyak worasu sa at eram wok yogolar-e, ninndi kwiye lag-et wok yuwog-o. Nit nenabuwa kasolat, nit ninndi kabak yidnak tarem-nen we irit yongga nunduwakluk wok yuwog-o.