Read Nduga IBERANI 5 Bible Online

IBERANI 5 - Nduga bible

IBERANI 5

¹Nde, tepan ombo nggulok len onpogolar-e, ki nab-et nde, len unpugwi-o. Nde, len ibidnak nap na-nen-e ki nap enmanggim-e Mbal Pem Nagawan ndegel obosolar-e, ap-nen meya yogolat woraidnak pem Mbal Pem Nagawan amanggim silobulo we posolat, lomba wam wosa eyabi poso-o.

²Tepan ombo nggulok at na yi mende ndi mende bem ndeyak yoso me, it enaru buk, mborok tak nak kwarugwi nap inmin-e indi luruk puruk woraso-o.

³Nde, at-nen na irit mborok tak nak kwaroso me, at-nen lomba wam wosa eyabi-ge Mbal Pem Nagawan amanggim posolar-e, ap erep-nen meya yogolat woraidnak enmanggim nak poso bug-o. Are, at-nen meya yosolat woraidnak amanggim na posor-o.

⁴Nde, ap misik-nen-e an-e tepan ombo nggulok teyeg-o luk ondomok indi-n pidnak pem men yoso bug-o. Are, Mbal Pem Nagawan-nen Arun na wene mbo bid nggal, Mbal Pem Nagawan-nen wene mbo onposola nak-nen tepan ombo nggulok kwat yugwi-o.

⁵Iri nggal kwarosolar-e, Kerisut na at ondomok-nen tepan ombo nggulok kwat yigit lag-o. Are, Mbal Pem Nagawan at-net Kerisut yak tosolar-e: “Kar-e an Nambara-nen yusu-o. An-e yawo-t kat Keid kwat yigi-o” luk yak tij-o.

⁶Nde, engga wene misik pem-nen Mbal Pem Nagawan-nen yosolar-e: “Melkisendek-nen tepan ombo nggulok woragaid na nggal, kar-e tepan ombo nggulok irit pempa woralik nalik woragun-o” luk yij-o.

⁷Yesus na-ge ki nap ennggendumu nggweyak ma yu me woralat-nen tepan yosolar-e, wat yimin naru at-nen an nimiri yurag-e ndag-o luk peraso Mbal Pem Nagawan na emengen mbarosolar-e, at ene nggoksa yip min-et at emengen mbarosolat woragaij-o. Nde, iri kwarosolar-e, at indi tebe luk, Mbal Pem Nagawan-nen yidnak yidnak nak kwaroso ala karuk, Mbal Pem Nagawan-nen-e at ene kulij-o.

⁸Yesus iri-ge Mbal Pem Nagawan Ambara-t nde, andi bandi ebem mbid iri bem-nen Mbal Pem Nagawan-nen yidnak yidnak nak kwarurak irit aru yij-o.

⁹At iri na-ge iminep mbarak obosola-ge, at-nen yidnak yidnak nak wanugwi nap pidsa inmiri yaga wok ondoso woralik nalik momtak elem-e ar-e kwat yij-o.

¹⁰Nde, Mbal Pem Nagawan-nen-e Yesus na-ge tepan ombo Melkisendek nggal tepan ombo nggulok tak ibij-o.

¹¹Yesus tepan ombo nggulok worasu wene-ge wene erep kwarat yak kundurag-et nde, kir-e ndag-et yenggerak pili buk ala, mirik kunpurag-e meya-o.

¹²Nde, kir-e ap mul undurak nap kwat yurag-e yigeb-et nde, Mbal Pem Nagawan wene owag-e awo kenaru yigit lak me, ap erep-nen kwara mul kundurak worasu-o. Kir-e indi worak-nen nunggwi mburu-ge ninggit lak, kamongen nak nonggolat worali-o.

¹³Ta-nen nde kamongen iri nak nasu ala-ge, li nggisiya indi worak me, lud tak nak kwarugwi wene owak iri yebet kudtag-e meya-o.

¹⁴Nde, nunggwi mende amawi worak iri-ge meya min konak min lumbunugwi enaru nap, inndi worak nap iri nak-nen nunggwi-o.