Read Nduga IBERANI 6 Bible Online

IBERANI 6 - Nduga bible

IBERANI 6

¹Iri bem-e, Kerisut owene owak nandug-et iri na nak wanugwi iri keya buruk, nit ninndi amburu mbarak purak wene owak irit wanogolat wolmog-o. Nggeret wanogolat-nen yugwi wene owak iri-ge ebe lak mende keya buruk kondok yurak wene min Mbal Pem Nagawan ebem ninndi angin tubu yurak wene min iri na-t yik tenak worali iri-ge keya buwog-o.

²Nde, wene owak iri erep na, ap yi ma unpugwi wene min enanggul tenakwi wene min ap wat yidnak unluk yurak wene min meya yidnak onggo enpem wene mbaruwama, pempa andi bandi kerenak wolmomtak wene min iri-ge keya buwog-o.

³Nde, Mbal Pem Nagawan-nen-e “Iri kwaruwag-o” luk nenperasola-ge, ninndi amburu mbarurak wene owak arem nggal wanuwog-o.

⁴Nde, it Mbal Pem Nagawan eyaya bem woragwi na-t nde, inndi angin tubu yidnak keya bidnak nap iri-ge nggesa-nen tuguruk kondok tak uburag-o? It iri-ge aid arem-nen we wok ondoso mende na undu karuk, Konak Indi-ge it enpem mbidnak erep na winde luk,

⁵Mbal Pem Nagawan-nen yidnak wene na wanosolar-e, “Wene yu-ge konak wene-o” luk wanurug-et nde, abok-nen wolmomtak amawi na-ge ir-e enaru lug-et nde,

⁶inndi angin tubu yidnak keya bili nab-e it meya yidnak keya buruk kondok makluk, tuguruk ininggi waruk lobok yurag-e mondok meyar-o. It iri-nen-e Mbal Pem Nagawan Ambara na-ge tuguruk e lang pang tak pem worogolat, ap inmbiri bem at inggiri witli iri bem-nen it kondok yurag-e meyar-o.

⁷Talme pempa mbosolar-e, nggweyak na amburu rak posola-ge, uwi yagaid nap-nen nujwakluk yi mende ndi mende kwarat wirik poso nggweyak iri-ge Mbal Pem Nagawan-nen alim tak poso-o.

⁸Alat nde, nggweyak iri-nen-e tusuwangge min isile worak min nak wirik posola-ge, nggweyak na-ge meya me, Mbal Pem Nagawan-nen imbiri lamut tak puruk, worok tak posolar-e, kan nujwa-o.

⁹Nanggamirak kenabuwa worak wa-e. Nit-nen kit konowene yu nggal yili-t nde, kit kinmiri yurak erep kundik konak wene iri wanigeb-o luk nir-e perali-o.

¹⁰Nde, Mbal Pem Nagawan-e mborok tak kwaroso-ge lag-o. At-nen-e kit-nen wanigep yabu iri meme rak posolat, kit-nen at abuwa kagolar-e, mbek tak inpidnak nap kwara yongga indigep min yawo na yongga indili min ar-e meme rak puwa bug-o.

¹¹Kit kondomok tak-nen kenmawi kondogolat iri worakmu worok tak posolat-nen kit-nen ebem kinndi mbung mbung tak puruk woragwi na mondok wanurak iri-ge mondok nindingen-o.

¹²Nde, kir-e kenperari yurak iri-ge ninsili-o. Are, it inndi angin tubu luk, Mbal Pem Nagawan-nen urul pidnak na wanul-er-o luk mamak puruk towarak worali nap iri nggal woragup iri-ge nindingen-o.

¹³Nde, Mbal Pem Nagawan-nen Abaram urul paga yak tosolar-e, owak mbarosolat-nen urul pid irir-o. Nde, Mbal Pem Nagawan ombol pem kek tak terak minik misig-e mondok lak me, at ondomok unu bem-et owak mbarosolat-nen yak tosolar-e:

¹⁴“An-nen imbiringgat tak kobosolat, kat kilirag-e ap kwarat tak onposolat yimin-o” luk urul paga Abaram yak tij-o.

¹⁵Nde, Abaram na-ge indi luruk puruk towarak woragaid pem-e Mbal Pem Nagawan-nen urul paga yak tidnak na-ge mondok wanid nar-o.

¹⁶Nde, ap-nen owak mbarogolar-e, at ombol pem terak minik kek tak woraso nap na unu luk owak mbaroso-o. Nde, ap-nen ngguno pidnak na-ge owak mbaridnak iri na-nen-e wene lak tak poso-o.

¹⁷Mbal Pem Nagawan indi-nen perasolar-e, at-nen urul yak indidnak iri na wanurak nap-nen-e at-nen urul pid iri-ge nden-e kujwa bug-o luk ndemeret enaru makluk-nen owak mbara urul pid irir-o.

¹⁸Mbal Pem Nagawan-nen urul pid min owak mbarid min wene mberen iri-ge tuguruk nden kujwa-ge lak me, Mbal Pem Nagawan-e enesiget yurag-e meya-o. Iri bem-e nit ninmiri yuwakluk Mbal Pem Nagawan indipma worali nap nit-nen-e abok-nen wok nundurak lid lud tak pidnak iri na bem nit ninndi mbung mbung tak pidnak iri-ge puksa tena wolmomtag-o.

¹⁹Nit ninndi ebem mbung mbung tak pige wene iri-nen-e e koma tugup lak tak poso posid nggal nit ninndi-ge pem tugup lak tak poso-o. Ninndi ebem mbung mbung tak pige wene iri-nen-e o mondok marak Mbal Pem Nagawan woraso sa iri na me sum kuri worak pidnak iri na kwidsa nggwij-o.

²⁰Yesus na-ge nit nggumakluk tu ya bosolat iri me nggwij-o. Nggosolar-e, Melkisendek na tepan ombo woragaid iri nggal, Yesus-e tepan ombo nggulok pem-et woralik nalik wolmomtak irit kwat yij-o.