Read Nduga IBERANI 8 Bible Online

IBERANI 8 - Nduga bible

IBERANI 8

¹Nit-nen yu yili wene yu ebe-ge yu-o: Nit nentepan ombo nggulok iri nggal kwarak iri-ge Mbal Pem Nagawan Mondok Kek tak aid arem woraso-nen koreyak woraso sa inggi kigit ambigit nggwe koreyak worasu-o.

²At-nen eyabu tepan ombo nggulok yabu-ge ap-nen nggugwi buk mondok marak sa iri me-nen wanusu iri-ge, ki nap-nen wiridnak sum-nen wiridnak wi iri me wanusu-ge lag-o. Are, ndemeret ebe wi Nagawan Indo-nen wiridnak sum-nen wiridnak wi iri me-t wanusu-o.

³Nde, tepan ombo nggulok yuwakluk mendak unpugwi na-ge it-nen-e Mbal Pem Nagawan amanggim pogolar-e, Mbal Pem Nagawan amanggim pugwi mende min wam wosa eyabi pogolat wolmakluk mendak unpugwi-o. Iri nggal-et nit nentepan ombo nggulok na irit mondok Mbal Pem Nagawan amanggim purak mende mbi inggem wolmomtag-o.

⁴Nde, at iri na-ge nggweyak ma yu me woragaid nggal-e, Yawuri nap-nen imiri mbarak pidnak wene-nen yidnak yidnak kwarogolat, wam wosa eyabi Mbal Pem Nagawan amanggim pugwi tepan omborag-e woragola me, at iri na-ge mondok tepan ombo woralep pug-o.

⁵Nde, it tepan omborak-nen kwarugwi eneyabu iri-ge ebe-ge aid arem worala, ir-e we amorok ndak worak nggal kwarugwi-o. Iri wene-ge nandug-et Musa yak tij-o. Musa-nen-e sum-nen wiridnak wi iri na wereyekluk yosoma, Mbal Pem Nagawan-nen at yak tosolar-e: “Kar-e ndobo iri bem woralat-nen mirik kibidnak iri na ndak ndak nag-et woragun na-e” luk yak tij-o.

⁶Nde, it tepan omborak erep-nen wanugwi eneyabu-ge teberag-et nde, Yesus-nen wanoso eyabu-ge terak minik kek tak-net yusu-o. Nde, at-nen-e ki nap min Mbal Pem Nagawan min ennggendumu ngarak koro kwat yosolat-nen urul pidnak wene-ge mondok terak minik kek tak-net yusu me, nanduk tul pidnak wene iri-ge teberag-et nde, at-nen urul pidnak wene-ge mondok terak minik konak wene-o.

⁷Nde, nanduk tul pidnak wene iri nde iminep mbarak nggal-nen-e, abok tul pidnak wene ngget iri-ge ondolma pelep pug-o.

⁸Alat nde, Mbal Pem Nagawan-nen at elem nap-nen mborok tak kwarugwi na karuk-nen yak ondosolar-e: “Nagawan Indo-nen yosolar-e: ‘An-nen tul pidnak wene ngget misig-e Isarael nap min enlem Yewura nap min yak undurak tarem-e panggo yusu-o.

⁹Nde, urul pidnak wene yak indimin iri-ge it onmborak Mesira wi-nen lit unpuruk lobok yosolat-nen yak indidnak urul pidnak wene iri na nggal yak indimin pug-o. Nde, it iri-nen-e urul paga yak indigi wene na-nen yidnak yidnak kwarigit lak ala karuk, an-nen na it keya inpigi-o’ luk Nagawan Indo-nen yij-o.

¹⁰Nde, Nagawan Indo-nen yosolar-e: ‘Alat nde yawo-ge Isarael nap inmin urul paga yak indimin wene na-ge yur-o: Abok woragolar-e, an-nen-e imiri mbarak pidnak wene iri na waga it inndi arem posolat, wene na-ge it inndi bem mbarosolat yimin-o. An-e it Enmbal Pem Nagawan kwat yosolat, nde, ir-e an nelem nap kwat yogolat mul-o.

¹¹Iri kwarogolar-e, ap yok nggok-nen na irit, marik-nen na irit, oboksa-nen-e an enaru yidnak me, At misik-nen-e nggweyak misiget pem woragwi nap ala na, at owe owot ala na, mirik onposolar-e: “Nagawan Indo iri-ge kenaru mer-o” luk yak undurag-e meya-o’ luk yij-o.

¹²Iri ala-ge, it-nen wene kuruk tidnak na namberam tak puruk, it-nen meya yogolat woraidnak na nindi yebet yebet tak woramin pug-o” luk yij-o.

¹³Nde, Mbal Pem Nagawan-nen-e: “Ngget urul pidnak wene-o” luk yarik pem-e nanduk urul pidnak wene iri-ge obi mende nde kwat yij-o. Nde, obi mende kwat yidnak umbuk yidnak mende iri-ge ndag-et nak lak momtak mende-nen yusu-o.