Read Nduga YAKOBUS 3 Bible Online

YAKOBUS 3 - Nduga bible

YAKOBUS 3

¹Nanggamirak wa-e. Kit kennggendumu ap kwarat-nen ap mul undugwi nap yurak nak yili-ge meyog-o. Ap erep enpem-e wene te-t mbaruwa-t nde, nit mul undugwi nap nenpem-e, wene angin worag-et mbaruwa-ge kenaru nar-o.

²Kit pidsa-ge pempa lugud tak nak kwarugwi-o. Ta-nen nde ene yoso bem meya kwaroso buk nab-e iminep mbarak-nen yusu-o. At iri-ge at ebe oboksa tena woraso-o.

³Nit ninndi-n pidnak nggwe nak mburuwakluk posid abare mbarak iri kura wam emendam pidnak kere iri na lit kagolar-e, kura wam ebe ebis-et tena worali-o.

⁴E koma na irit kinndi yebet ker-o. E koma nggulok pare-t nde, obube amawi-nen wat kaidnag-et nde, mot tak poso abi marik komosa iri na perel kaidnak nggal-e e koma ombo na indi-n pidnak nggwe-t mboroso-o.

⁵Iri nggal-et ap enma-ge marik komosa-t nde, wene yok nggok pem at-net at kek yoso-o. Kanduk marig-et-nen pago pidnag-et nde, o wal nggulok terak kani naso iri ker-o!

⁶Nenma iri-ge nit nenpem meya kwarugwi ondoro nggal yosolar-e, nit nenpem meya wugarak pusu-o. Kan mare arem-nen pago pidnak me, nenma yu-nen nenpe pidsa pak nunpusu-o.

⁷Nde, erengen kege worak mende oboksa min towe min keyok keyok noso mende min keyane min oboksa-ge wanggo rak purak ndak me, ap-nen wanggo rak pugwi-o.

⁸Alat nde, ap enma-ge ap misiger-o luk tet-nen wanggo rak purag-e meya-o. Ap enma iri-ge meya elem, tena uburak na meya me, ap worak unpurak ninggis mende nak kobong tak-nen yusu-o.

⁹Nit nenma yu bem-nen Nineid Nagawan Indo erembel wanogolar-et nde, nenma yu bem-net Mbal Pem Nagawan at ut mimirik ndak wat inpidnak nap na inmbiri lamut tak inpili-o.

¹⁰Nenemnde misiget nggwe nak-net nde, imbiringgat wene mborosolat, imbiri lamut wene mborosolat yoso-o. Nanggamirak wa-e. Iri nggal kwarurag-e mondok meya-o.

¹¹Yi lusu misiget-net nde, yi eyak worak mborosolat, yi ngari worak mborosolat yoso-a?

¹²Nanggamirak wa-e. Marengge-nen ebe yosolar-e, aruwa yoso-a? Nde, kwari-nen ebe yosolar-e, marengge nde yoso-a? Iri nggal, mayu yi-nen-e we yi mboroso bug-o.

¹³Kit kennggendumu ap mbi indi tenggerak, indi nggat nggat worak mbi worala-ge, at-nen woraso abage konak iri na bem-nen nam tak posolar-e, konak nak kwarosolar-e, indi teberak, indi nggat nggat worak irit kwarosolat wolmag-o.

¹⁴Alat nde, kir-e kenlengen ale yogolat, kinsilepma yogolat, kondomok kenmanggim nak nggok tak pogolat yugwi ala-ge, kir-e kenambikpebe kek yogolat, ndemeret wene na imin kenesiget yili-ge meyog-o.

¹⁵Inndi nggat nggat elem iri nggal iri-ge aid arem-nen mbuwaidnag-e lag-o. Are, nggweyak ma mende-nen yusu-o. Konak Indi-nen idnag-e lag-o. Sere-nen idnak-nen yusu-o.

¹⁶Nde, enlengen ale min ondomok enmanggim nak nggok tak pugwi min woraso sa iri me-ge nari wari nak, yi meya ndi meya nak kwarogolat woragwi-o.

¹⁷Alat nde, aid arem-nen mbuwaidnak inndi nggat nggat elem-e yu nggal-o: Nandug-er-e mbek tag-et woraso, iri-nen-e lambuk tak onposo, yanggonak nak woraso, yidnak yidnak nak kwaroso, enabuwa nak kaso, konak mende nak kwarak poso-nen yusu-o. Inndi nggat nggat elem iri-ge ap entare lombonoso buk, indi-net nde enesiget siget yoso buk-nen yusu-o.

¹⁸Lud tak nak kwarugwi iri-ge yamuksa wolmomtak nak inndi peragwi nap iri-nen yamuksa woragwi uwi pil kaidnak iri engen pidnak-nen yusu-o.