Read Nduga 1PETERUS 1 Bible Online

1PETERUS 1 - Nduga bible

1PETERUS 1

¹Yesus Kerisut-nen wirik nibidnak nap Peterus an-nen-e Mbal Pem Nagawan-nen len kinpidnak nap, ap ennggenggerak sit mbit tak, o Pontus min Nggalatia min Kaparokia min Asia min Mbitinia min worali nap kit kenmanggim engga yu mbarusu-o.

²Nineid Mbal Pem Nagawan indi-n pidnak pem-net at elem nap makluk len kinpid iri-ge Konak Indi-nen at amanggim nap tak kunpuwakluk, Yesus Kerisut-nen yidnak yidnak kwarobokluk, at eyabi-nen mbek tak kun-puwakluk len kinpid irir-o. We wok ondoso elem min lambuksa woragwi elem min kwarat wok kondosolat wolmag-o.

³Nenagawan Indo Yesus Kerisut Eid Mbal Pem Nagawan irit wa yak tuwog-o. Nit nunpud kwarat kaso me, nit na ngget mende rak nenpeyekluk Yesus Kerisut iri-ge wat yidnak nap ennggendumu-nen uruk tak pij-o. Iri bem-e, nir-e woralik nalik wulmul-o luk ninndi mbung mbung tak worali-o.

⁴Iri bem-e, Mbal Pem Nagawan-nen at elem nap enmanggim pidnak silobulo winde yul-o luk, ninndi mbung mbung tak worali-o. Silobulo iri-ge meya yoso buk, emben na yoso buk, terabet na yoso buk irit aid arem iri me kit kenmanggim ndok worak worasu-o.

⁵Kir-e Mbal Pem Nagawan ebem kinndi angin tubu yidnak me, iri yidnak silobulo iri-ge pidsa kenmanggim worasu-o. Worok tak puwa tarem-nen kinmiri yidnak mondog-et nam tak puwa tarem kinmiri yidnak iri na wanobokluk, Mbal Pem Nagawan amawi bem-nen kontowarak worasu-o.

⁶Iri bem-e, kir-e kenalin kenalen wolmer-o. Kit luru ya woragola, inndi ngaroso mende nin tak nan tak kenpem mbosola, mondok kinndi puru pera min woragub-et nde, kenalin kenalen wolmer-o.

⁷Nde, kinndi ngaruwa iri-ge kit-nen ndemeret Nagawan Indo ebem kinndi angin tubu yigep lak? luk kinndi kasolat-nen kinndi-t ngaruwa-o. Lak momtak mende emas posid iri perak nde abut mbaruwokluk kan ma pugwi-o. Nde, emas posid iri-ge onggo nggulok pugwi mende-t nde, marik-nen yusu-o. Nde, kit kinndi angin tubu yidnak iri perak nggulok-nen yusu me, tugup lak wolmakluk mondok kinndi ngaruwa-o. Iri lug-e, Yesus Kerisut lobok yuwa tarem-nen-e kentembel wanogolat, kunnu kek tak pogolat, nggok tak konpogolat ma-o.

⁸Yesus Kerisut iri-ge kir-e kagwi bug-et nde, abuwa kali-o. Yawo na kali bug-et nde, ebem kinndi angin tubu yili-o. Iri bem-e, kit kenalin kenalen pem-et Mbal Pem Nagawan erembel wanili iri-ge wene yurag-e meya-o.

⁹Kit-nen Nagawan Indo ebem kinndi angin tubu yidnak iri na ebe kwat yosolar-e, kinmiri yuwa irir-o.

¹⁰Kit kinmiri yurak wene iri-ge Mbal Pem Nagawan ene lomboksa yugwi nap-nen-e wene na kwara mbenarogolat, kore yogolar-e: “Mbal Pem Nagawan-nen we wok ondoso elem wok kunduwa-o” luk urul pogolat woraiga-o.

¹¹“Iri wene-ge ngge tarem-nen, ngge kwasa kwat ma-o?” luk, mbenarogolat woraiga-o. Iri tarem-et Kerisut Indi-ge it enarem woralat-nen Kerisut mondok andi bandi rak uburak wene min abok at kek tak wolmomtak wene min urul yak ondosolat woragaij-o.

¹²Nde, Mbal Pem Nagawan-nen at ene lomboksa yugwi nap yak indid iri-ge, it ondomok enmanggim yak indigit lag-o, Are, kit kenmanggim-et yak indij-o. Kit yawo kwara kulili aid Wene iri-ge aid wene yugwi nap-nen-e aid arem-nen mbuwaidnak Konak Indi na amawi bem-nen mul kindiga-o Nde, wene iri-ge aid nap-nen na enaru momtag-e ukwe worag-et worali-o.

¹³Iri bem-e, kinndi enggengge bem puruk, kwil kwalsa woragolar-e. Yesus Kerisut abok lobok yosolat-nen we wok ondoso mende wok kunduwa na bem kinndi mbung mbung tak wolmer-o.

¹⁴Kir-e Mbal Pem Nagawan-nen yidnak yidnak nak kwarogolat wolmer-o. Nde, kit nanduk Mbal Pem Nagawan kenaru buk woragolat-nen kinndi-nen ukwe ukwe yoso-nen yidnak yidnak kwarugwi na kwarurak pug-o.

¹⁵Are, wene mbo kinpid Mbal Pem Nagawan-e marak nak woraso me, kit-nen yi kwatlik ndi kwatlik kwarogolar-e, kit-nen na iri nggal mot mot nak kwarogolat wolmer-o.

¹⁶Nde, Mbal Pem Nagawan engga bem-nen yosolar-e: “An-e marak nak woraso me, kit na irit marak nak wolmer-o” luk yij-o.

¹⁷Kit-nen Mbal Pem Nagawan eram tepan yogolar-e: “Nineij-o” luk yugwi-t nde, Mbal Pem Nagawan-e ap ondomoktak-nen kwaridnak ndak ndag-et entare limbinigit lak enpem wene mbaroso-o. Iri bem-e, kir-e nggweyak ma yu me woragolar-e, Mbal Pem Nagawan kek tak obogolat wolmer-o.

¹⁸Kir-e ebe lak mende kwarugwi iri-ge, kit konmborak-nen kenpem pidnak mende na kwarogola, iri kwarugwi na weserak kenpeyekluk nonnggo pid iri-ge lak momtak mende perak posid min emas posid min pem-e pigit lag-o luk kenaru mer-o.

¹⁹Alat nde, konnggo posolar-e, lomba wam marik ambut lak, ebem kop kap lak woraso lomba Mbal Pem Nagawan amanggim wosa pidnak nggal Kerisut eyabi onggo nggok iri-nen konnggo pij-o.

²⁰Kerisut iri na-ge o ndak wirigit lak ma-net Mba Pem Nagawan-nen lenak ebamu-o. Nde, woroksiyem yawo tarem-nen-e kit kenmanggim nam tak pid irir-o.

²¹At ebem nak-nen Mbal Pem Nagawan ebem kit kinndi angin tubu yili-o. Mbal Pem Nagawan-nen-e at iri na wat yidnak nap ennggendumu-nen uruk tak posolat, kek tak obosolat yij-o. Iri bem-e, Mbal Pem Nagawan ebem nak kinndi angin tubu yogolat, at ebem nak kinndi mbung mbung tak woragolat yili-o.

²²Kir-e Mbal Pem Nagawan-nen yidnak yidnak nak kwarogolar-e, kit na kit-net mat koragolar-e, Kerisut ebem inndi angin tubu yidnak nap ndemeret enabuwa kali-o. Nde, kinndi min-net nabuwa kabuwa yogolat wolmer-o.

²³Mbal Pem Nagawan-nen yidnak wene, urug-et woralik nalik woraso wene iri-nen-e mberen pem ndet konposolar-e, ki nap-nen ndet unpugwi nggal ndet kinpigit lag-o. Are, Nineid pem-et woralik nalik woraso-nen ndet kinpij-o.

²⁴Mbal Pem Nagawan engga bem-nen yosolar-e. “Ki nap oboksa-ge tusuwangge nggal-nen yili-o. Ki nap unnu kek tak woragwi-ge tusuwangge engen isi pidnak nggal-nen yusu-o. Tusuwangge na terabet yosolar-e, engen isi pidnag-e lera mboso-t nde.

²⁵Nagawan Indo-nen yidnak wene-ge pem-et woralik nalik wolma-o” luk yij-o. Nde, wene iri-ge kit yak kindidnak aid wene-net yusu-o.