Read Nduga 1PETERUS 2 Bible Online

1PETERUS 2 - Nduga bible

1PETERUS 2

¹Iri bem-e, onmbol pem lagwi min inndi-net enmberel pugwi min enlengen ale yugwi min onpok pugwi min yi meya ndi meya kwarugwi iri-ge pidsa mbo ber-o.

²Nde, kamo nonggolar-e, kenpe nggok yogolat, kinmiri yuwaklug-e, li nggisiya ngget nderak-nen ndemeret kamo nere yili nggal, iri nggal-et kit na ndemeret kamo Mbal Pem Nagawan-nen yidnak wene iri nere kagolat wolmer-o.

³Mbal Pem Nagawan engga bem-nen yosolar-e: “Nagawan Indo-nen konak nak kwat konposo iri-ge kir-e kagwi-o” luk yij-o.

⁴Iri bem-e, Nagawan Indo eram lobok yer-o. At iri-ge urug-et woraso kereb-et nde, ki nap-nen ebe lak mende nggal tak puruk mbo biga-t nde, Mbal Pem Nagawan-nen-e kerep iri na onggo nggok pugwi kerep tak uburuk, len ibij-o.

⁵Kir-e kunlug-et woragwi kerep-nen yili me, kit wok kunpuruk Mbal Pem Nagawan uwi indi amanggim o iri wat momtak kerep iri kinndi mer-o. Iri nggal kwarogolar-e, kir-e tepan ombo marak kwat luk, Yesus Kerisut ebem kir-e Mbal Pem Nagawan amanggim wam wosa kan pogola-ge. Mbal Pem Nagawan-nen-e kit-nen pidnak mende bem-e alen kujwa-o.

⁶Nde, Mbal Pem Nagawan engga bem-nen yosolar-e: “An-nen-e onggo kwarat pugwi kerep mbi lena, kerep iri na-ge o unggut paro pidnak maklug-e, Sion iri me pigi-o. Nde, kerep na ebem inndi angin tubu yuwa nab-e inndi kabak ma bug-o” luk yij-o.

⁷Kerep iri na bem kinndi angin tubu yili nap kit kenmanggim-e ebe worak memde-nen yusu-t nde, at ebem inndi angin tubu yili buk nap enmanggim-e engga wene ya-nen yidnak ndak ndak kwat yusu-o: “O wurugwi nap-nen mbo biga kerep iri na-ge o unggut paro pidnak kerep irit agaij-o” lug-e,

⁸engga wene misik-nen yosolar-e: “Ap unuwok abis pijasa woma mberak onposo kere irit ma-o” luk yij-o. Nde, it unuwok abis pija yugwi iri-ge ir-e Mbal Pem Nagawan-nen yidnak wene kuruk togola-nen pija yugwi-o. Iri yugwi-ge Mbal Pem Nagawan-nen it inmin-e: “Irit ma-o” luk yidnak pem-nen kwatli-o.

⁹Alat nde, kir-e len kinpidnak nap elem yogolat nagawan-nen idnak tepan ombo yogolat, marale elem yogolat. Mbal Pem Nagawan ondomok ilirak yogolat yili-o. Ndamuk arem-nen at eyaya kwiye worak arem nggobokluk, Mbal Pem Nagawan-nen wene mbo kunpuruk, len kinpid irige at-nen kwiye worak kwaroso wene iri na tomborobokluk, wene mbo kinpij-o.

¹⁰Nde, nanduk woragolar-e, kir-e Mbal Pem Nagawan ilirak woragit lag-et woraigep, nde, yawo-ge kir-e Mbal Pem Nagawan ilirak-nen yili-o. Nanduk Mbal Pem Nagawan-e kit kunpud kagit lag-et nde, yawo-ge kunpud kasu-o.

¹¹Nenggamirak kenabuwa worak wa-e. Kir-e nggweyak ma yu me woragolar-e, ap sal nggal, ap enma woragwi nap nggal yili me, ap-nen ukwe ukwe yugwi na-nen kinndi min wim poso iri-ge keya ber-o luk an-nen kiri keresa yak kundusu-o.

¹²Enlem nin nap ennggenggerak woragolar-e, kit-nen kwarugwi mende-ge konak nak kwarugup na-e. Iri nggal kwarogola-ge, it-nen-e kir-e meya kwarugwi nab-o luk konpok puwokluk yuwa-t nde, kit-nen kwaridnag-e konak nak ala-ge, Nagawan Indo lobok yuwa tarem-e ir-e Mbal Pem Nagawan erembel wanuwa-o.

¹³Nagawan Indo ebem me, nggweyak ma worali pemerinta pidsa-nen yidnak yidnak nak kwarer-o. Yi nap ndi nap pidsa onmbol pem kek tak Kaisat na irit,

¹⁴meya kwarugwi nab-e enpem wene mbarogolat, nde, konak kwarugwi nab-e entembel wanogolat makluk, Kaisat-nen ese mendak inpidnak nap iri na iri enne kulurag-o.

¹⁵Kit-nen konak nak kwarugwi iri-nen kasa kasa wene yugwi nap enne pok tak purak iri-ge Mbal Pem Nagawan indingen-o.

¹⁶Kir-e weserak woragwi nap nggal wolmer-o. Alat nde, wisirik woragwi iri na bem-nen kit meya yidnak lumururak pug-o. Are, Mbal Pem Nagawan ndegel ubugwi nap kenpage irit wolmer-o.

¹⁷Ap oboksa kek tak onpogolat, Kerisut ebem inndi angin tubu yidnak kennggamirak na enabuwa kagolat, Mbal Pem Nagawan aye kagolat, nagawan Kaisat kek tak pogolat wolmer-o.

¹⁸Ap ndegel unpugwi nap wa-e. Kit-nen ndegel unpugwi nagawan kek tak onpogolar-e, it-nen yidnak yidnak nak kwarurag-o. Nde, it enabut op, yanggonak iri ala nak kek tak unpurag-e lag-o. Are, enabut meya iri min-et kek tak unpurag-o.

¹⁹Elem lak ma-t nde, ap-nen kondogola-ge, kir-e andi kagir-et “Mbal Pem Nagawan indi-n pidnak pem-net yu kwat nibili-o” luk mamak puruk woragup pem-e Mbal Pem Nagawan-nen-e imbiringgat tak kunpuwa-o.

²⁰Nde, kit-nen meya yidnak pem-net kondogola, andi bandi kagolat mamak puruk woragup iri-ge kentembel wanuwa? Alat nde, kit-nen konak nak kwarugup pem-net kondogola, andi bandi kagolat mamak puruk woragup pem-e Mbal Pem Nagawan-nen imbiringgat tak kunpuwa-o.

²¹Mbal Pem Nagawan-nen wene mbo kinpid iri-ge, kondogola, andi bandi kabokluk-nen wene mbo kinpij-o. Nde, Kerisut na kit kenmanggim-et andi bandi kagaid iri-ge at-nen kwarid iri karuk, at ijok pem mborobok-nen kwarid irir-o.

²²At iri-ge meya mbi kwaroso buk, at emnde nggwe-nen enesiget wene mbi wirik poso bug-o.

²³Meya wene yak togola na at-nen na meya wene onggo yak indigit lag-o. Nde, at worogola na at-nen na it onggo kwat unpurak na yak indigit lag-o. Are, at kwat ibili wene iri-ge mot mor-et ap enpem wene mbaroso Mbal Pem Nagawan na ebem keya bij-o.

²⁴Nir-e meya yugwi elem inggem-nen weserak woragolat, lud tak nak kwarogolat wolmakluk, Kerisut at-net nit meya yidnag-e at ondomok ebem puruk, e lang pang tak pem wat yij-o. At wiridnak sa ud iri-nen-e kit ki rak kinpij-o.

²⁵Kit nandug-e kabak yidnak lomba wam nggal woraigeb-o. Alat nde, yawo-ge kit yik keneyarok worasolat, ndegel konposolat yoso-nap Kerisut eram tuguruk lobok yigeb-o.