Read Nduga 1PETERUS 4 Bible Online

1PETERUS 4 - Nduga bible

1PETERUS 4

¹Nde, Kerisut-e ki nap enaboro worak luk andi bandi kaidnak me, kat-nen na iri nggal-et kamin-o luk purag-o. Ta-nen nde enaboro-nen andi bandi kaidnak ala-ge, at meya kwaroso na-ge keya bidnak worasu-o.

²Iri bem-e, we yawo ya woragolar-e, ki nap-nen ukwe ukwe yugwi langgal luk mbururak pug-o. Are, Mbal Pem Nagawan indi-nen pidnak irit langgal luk mberer-o.

³Nde, kit nanduk kwarat woragolar-e, Mbal Pem Nagawan enaru buk nap-nen indingen kagwi mende kwarogolat woraigeb-o. Iri kwarogolar-e, meya nak kwarogolat, kinndi-nen ukwe yugwi nak langgal luk mborogolat, anggut engen amburu nuruk, kinndi wawa yogolat, inik inik saguruk, mbabi yogolat, anggut engen amburu na ndonggosa nonggolat, erembel wanurak pug-o luk yidnak kugiwak erembel wanogolat woraigeb-o.

⁴Nde, yawo-ge Mbal Pem Nagawan enaru buk nap-nen-e kir-e it-nen meya kwatli mende na inmin kwarugwi na kwarigit lak ala karuk, ir-e inndibok yili-o. Iri kwwarugwi keya bigep pem-e met kinpili-o.

⁵Alat nde, it iri-ge unluk worali nap min wat yidnak nap min enpem wene mbareyekluk lid lud tak puruk worasu Mbal Pem Nagawan na imbiri bem-e it-nen kwaridnak pidsa mondok paruwar-o.

⁶Iri yuwa bem-e, wat yidnak nap na irit aid wene yak indij-o. Ap pidsa enpem wene mbarugwi nggal, wat yidnak nap iri na-ge enpe unluk woragola, it enpem na wene mbarij-o. Nde, aid wene yak indid iri-ge, Mbal Pem Nagawan-e urug-et worasu nggal it inndi unluk wolmomtak pem yak indij-o.

⁷Yi mende ndi mende pidsa lak momtak tarem panggo yusu-o. Iri bem-e, tepan yobok-nen kit kondomoktak kinndi tena woragolat, kwil kwalsa wolmer-o.

⁸Nanduk tak purak wene owak ndum-e yur-o. Ndemeret kinndi-net nabuwa kabuwa yer-o. Nabuwa kabuwa yugwi iri-nen-e meya yidnak kwarat limirik pusu-o.

⁹Nanggam kanggam irit woragolar-e, kit na kit-net kennggamirak kenma rak onpogolar-e, kinsili min-e kenma rak unpurak pug-o.

¹⁰Kir-e Mbal Pem Nagawan-nen we wok ondoso mende kona tena woragwi nap yogolar-e, kenariktak we wok kindidnak na bem-e kit na kit-net yongga yongga wolmer-o.

¹¹Ta-nen nde aid wene yurak ala-ge, mondok Mbal Pem Nagawan-nen yidnak wene nak yurag-o. Nde, ta-nen nde ap erep yongga undurak ala-ge, mondok Mbal Pem Nagawan amawi bem-net ap yongga undurag-o. Iri ala-ge, yi kwatlik ndi kwatlik kwarogolar-e, Yesus Kerisut ebem-nen Mbal Pem Nagawan erembel wanurag-o. Yesus iri-ge amawi worak, at nak kek tak obogolat woralik nalik wolmomtak nap-nen yusu-o! Amen.

¹²Nanggamirak kenabuwa worak wa-e. Kan-nen nok onposola, andi bandi kagwi nggal kinndi ngarosola, yu-ge kagwi buk mende nde nebem mbij-o luk kinndibok yurak pug-o.

¹³Are, Kerisut andi bandi kagaid na nggal-et an-e at imin andi bandi kasu-o luk, kenalen ker-o. Iri kwarugup ala-ge, at kek tak woraso nam tak puwa tarem-e kit kenalin kenalen kwarat kagub-o.

¹⁴Kir-e Kerisut wanigep pem nggweyel konpogola-ge, kir-e imbiringgat worak yili-o. Iri kwat kunpuwa iri-ge abinal work Indi, Mbal Pem Nagawan Indi iri-ge kit kinmin woraso ala-nen kwat kunpuwa-o.

¹⁵Kit kennggendumu ap misiger-o luk tet ap wiridnak pem ala na, yariya wanidnak pem ala na, meya kwaridnak pem ala na, ap onowene abare lombok tidnak pem ala na, andi bandi kudtag-e meya-o.

¹⁶Alat nde, kir-e Kerisut wanidnak pem andi bandi kagolar-e, kinnggiri kudtak pug-o. Are, “An-e Kerisut nap yigi bem-nen kwat nibili-o” luk Mbal Pem Nagawan wa yak turag-o.

¹⁷Ap enpem wene mbarurak tarem-e pi wok yij-o. Nde, nanduk nandug-er-e Mbal Pem Nagawan ilirak nit nenpem nandug-et wene mbaruwa-o. Nde, nandug-er-e nit nenpem wene mbarosolug-e, abog-e Mbal Pem Nagawan-nen idnak aid wene keya bugwi nap enpem wene mbarosola, ngge nggal kwat ma-o?

¹⁸Nde, Mbal Pem Nagawan engga bem-nen yosolar-e: “Lud tak nak kwarugwi nap na inmiri yurag-e angin worag-et ala-ge lud tak kwarugwi buk nap min meya kwarugwi nap min-e ngge kwat unpuwa-o?” luk yij-o.

¹⁹Iri bem-e, Mbal Pem Nagawan indi-n pidnak pem andi bandi kagwi nap mbi woragolar-e, lud tak nak kwarogolat, it ndak wat inpidnak nap iri na ebem inndi angin tubu yogola-ge, at-nen urul yak indidnak na-ge ndak ndag-et kwarosolat wolma-o.