Read Nduga 1PETERUS 5 Bible Online

1PETERUS 5 - Nduga bible

1PETERUS 5

¹An-nen na ogore yidnak nap-net yusu me, kit kennggendumu enne kulugwi ogore yidnak nab-e wene yu kwara kuluwag-o. Kerisut andi bandi kagaid iri-ge an nimbiri bem-et kagaij-o. Nde, Kerisut na kek tak woraso iri nam tak puwa tarem-e an totno kek tak nubuwa me, an-e kiri keresa yak kundusu-o.

²Mbal Pem Nagawan-nen kininggem pidnak lomba wam iri na towarak woragolar-e. Mbal Pem Nagawan indi-n pidnak ndak ndag-et kwarogolar-e, kinsili lag-et, kenalen min-et yik karok wolmer-o. Nde, yik karok woragolar-e, onggo wanurak pem nak-nen yik karok wolmomtag-e lag-o. Are, ndemeret kinndi-nen ndegel enpeyeg-o peraruk-nen ndegel unpurag-o.

³Nde, kininggem pidnak nap iri na inmin-e kir-e nagawan nggal luk, kenne amawi min: “Iri kwarer-o Yu kwarer-o” yurak pug-o. Are, Mbal Pem Nagawan olomba mirik unpurak pem kit kenpage konak irit kwat mer-o.

⁴Iri kwat yugup pem-e, Lomba Wam Winde Kek tak na lobok yosolar-e, abinal lak momtak puk wirik irit wanugub-o.

⁵Nde, iri nggal-et kit ap sugwe-nen-e inndi worak-nen yidnak yidnak nak kwarurag-o. Nde, kit pidsa kinndi tebe luk yongga yongga yogolat wolmer-o. Nde, Mbal Pem Nagawan engga bem-nen yosolar-e: “Mbal Pem Nagawan-nen-e inndi kek yugwi nap inmin-e sirid mbarak worasu-t nde, at-nen-e inndi teberak woragwi nab-e enabuwa kasu-o” luk yij-o.

⁶Iri bem-e, at indi-n pidnak tarem wok yosolar-e, Mbal Pem Nagawan-nen kek tak kunpuwaklug-e, kir-e amawi winde Mbal Pem Nagawan inggiyapma kit kondomok kinndi tebe luk wolmer-o.

⁷Ar-e kit kwara lombot konposo me, kir-e kunmud kagwi mende pidsa-ge at eram nak keya ber-o.

⁸Kit kunuwim nap Sere na-nen-e: “No nap lebena mbo namin-o?” luk singa ndakngge nggal ene yolo ngolo waring kasu me, kir-e lid lud tak puruk, kwil kwalsa wolmer-o.

⁹Kennggamirak Kerisut ebem inndi angin tubu yidnak nap yi wi ndi wi worali na kit andi bandi kali nggal-et kali iri-ge kenaru me, Kerisut ebem kinndi angin tubu yigep pem tugup lak woragolar-e. Sere imin kunsuru ndere yer-o.

¹⁰Alat nde, kir-e we marig-et nak andi bandi kagolug-e, Mbal Pem Nagawan at nak-nen-e iminep mbarak konposolat, tugup lak tak konposolat, amawi rak konposolat, yogo konposolat ma-o. Nde, we wok ondoso mende pidsa elem Mbal Pem Nagawan-nen-e Kerisut ebem-nen at abinal pem-et woralik nalik momtak abinal worak irit yobokluk, wene mbo kinpij-o.

¹¹At arig-et nak amawi worak pem-et worlik nalik wolma-o. Amen.

¹²An engga poro-t kenmanggim mbarigi yu-ge an-nen eberasolat mot mor-et yoso nonowot Silas-nen yongga norosola, mbarigi-o. “Wene yu-ge ndemeret Mbal Pem Nagawan-e we wok ondoso elem-nen yusu-o” luk kinndi embem tak posolat-nen engga yu mbarusu-o. Mbal Pem Nagawan we wok ondoso pem-et tugup lak mendak wolmer-o.

¹³Mbal Pem Nagawan-nen len kinpidnak kenggamirak Mbabilon woragwi nap min nambara Marakus min-nen-e wa yak kindili-o.

¹⁴Nabuwa kabuwa yogolar-e, manuksa wa yak kerak mber-o. Mbal Pem Nagawan-nen-e Kerisut ebem worali nap kit pidsa lambuksa woragwi elem wok kunduwag-o.