Read Nduga 2PETERUS 2 Bible Online

2PETERUS 2 - Nduga bible

2PETERUS 2

¹Nandug-e enesiget Mbal Pem Nagawan ene lomboksa yugwi nab-e Mbal Pem Nagawan elem nap enngenggerak men yiga nggal, iri nggal-et enesiget siget mul undugwi nab-e kit kennggenggerak na men ma-o. Men yogolar-e, ap lak tak unpurak wene owak min enesiget wene owak min pil ngguwagolar-e, it weserak enpeyekluk wat yid nap amawi worak iri na imin-e: “Nenaru bug-o” luk yuwa-o. Iri nggal kwarogolar-e, it ndaget lak tak unpurak enambikpebe enare pili-o.

²Iri yili-t nde, ap kwarat-nen it enesiget siget ap mul undugwi nap-nen ukwe ukwe yugwi meya iri-nen yidnak yidnak kwarugwi na langgal luk mburuwa-o. Nde, it-nen kwarugwi-nen ndowaga ap kwarat-nen Lud tak nak Kwarugwi Tula iri nggweyara keya buwa-o.

³Ukwe akwe bem mbarak purak puk iri na bem-e enesiget siget ap mul undugwi nap-nen kenarengge luruwokluk, it inndi-nen mbilidnak wene yak kunduwa-o. Alat nde, it enpem wene mbarurak iri-ge obi-net lud tak pidnak worasu-o. Nde, it lak tak unpurak iri-ge mondok larok yuwa bug-o.

⁴Nde, meya yiga aid nap na Mbal Pem Nagawa-nen keya inpigit lak, are, kan mare arem mbo inpil nggwamu-o. Nde, ir-e ndamuk arem iri kamarak irit worakmu, it enpem wene mbarurak tarem wok ma-o.

⁵Nde, nanduk woraiga nap na irit, Mbal Pem Nagawan-nen keya inpigit lak, are, yidnak yidnak kwarigit lak nap enpem wene mbarosolar-e, yi tu kuwarak pamu yi-nen nok inpij-o. Mbal Pem Nagawan-nen inmiri yosolar-e, lud tak kwarugwi wene tomboroso nap Nu min ap enpe tuju min nak inmiri yij-o.

⁶Nde, o Sorom min Nggomora min na irit, Mbal Pem Nagawan-nen enpem wene mbarosolar-e, kanduk pem-nen lak tak inpij-o. Iri kwarid irige, Mbal Pem Nagawan ebem inndi angin tubu yugwi buk nap pidsa iri nggal kwat kunpuwa-o luk ndak worosolat-nen kwarij-o.

⁷Alat nde, lud tak nak kwaroso nap Lot na-ge imiri yij-o. Nde, Mbal Pem Nagawan-nen yidnak yidnak kwarugwi buk nap enpage meya iri-nen Lot na indi andi bandi rak pererenak woraiga-o.

⁸Lud tak nak kwaroso nap Lot na-ge it ennggenggerak worasolar-e, pempa pempa it-nen meya yugwi na-ge kasolat, kolosolat woralar-e, at indi mot mot nak woraso na-ge andi bandi yosolat woragaij-o.

⁹Iri bem-e, Mbal Pem Nagawan-nen kwaroso nggal kwarugwi nap na it enarem woraga pil nggogola-nen inmiri yurag-e Nagawan Indo aru-o. Nde, lud tak nak kwarugwi buk nap enpem wene mbarurak tarem andi bandi rak unpuwakluk len unpurak na Nagawan Indo-ge aru-o.

¹⁰Iri len unpuwa iri-ge it ondomok kopkap tobok tak onposo ukwe ukwe yugwi iri-nen yidnak yidnak kwarogolar-e. Mbal Pem Nagawan ene kulurak insili nap iri-ge len unpusu irir-o. Enesiget siget mul undugwi nap iri-ge kwiye lag-e, ondomok kek yogolar-e, teram woragwi enabinal worak nap iri na kwiye lag-et pesel inpili-o.

¹¹Enesiget siget mul undugwi nap enmawi min unmbunu min-e te nggal-o. Nde, aid nap na enmawi min unmbunu min-e terak minig-et nde, Nagawan Indo imbiri bem it aid nap-nen-e enesiget siget mul undugwi nap na-ge pesel inpili bug-o.

¹²Alat nde, it iri na-ge indi lak wam nggal-et kwatli-o. It ap iri-ge tenaguruk, wururak pem nak ndesa mbidnak anggam naso ndakngge nggal-nen yili-o. Ir-e kwara inndi yebet kagit lag-et nggweyel inpili-o. Nde, anggam naso ndakngge wurugwi nggal, it ondomok-nen kwarugwi iri-net it lak tak unpuwa-o.

¹³It-nen meya kwarugwi iri na onggo-ge andi bandi kujwa-o. It enalen yurak mende kwarogolar-e, it enaboro-nen ukwe ukwe yugwi teyok tak pogolar-e, lengge-t nde, yi kwatlik ndi kwatlik kwatli-o. Nde, ir-e yi meya ndi meya kwarogolat inndi lak tak kwarugwi me, it-nen nde kit kinmin lambuksa nonggolar-e, kit kunnu emben to rak pogolat, mbilaro ngin tak pili-o.

¹⁴It inndi kundig-e mbabi yugwi kwami iri na enpem enlengen yumburugwi me, ir-e meya kwarurak pem insili yoso bug-o. It iri-nen-e kwara inndi angin tubu yigit lak nap na enare pili-o. It inndi-nen ukwe akwe bem mbarak purak puk mamarak pidnak me, it iri-ge Mbal Pem Nagawan-nen inmbiri lamut tak inpidnak-nen yili-o.

¹⁵It iri-ge mot mot tula na keya bidnak me, ir-e kabak luk, nanduk Mbeyot ambara Mbileam-nen mbirid tula iri nggwe mbitli-o. Mbileam na-ge meya kwarurak onggo tol iri na indingen tak pij-et nde,

¹⁶at-nen meya yidnak na bem met obosolar-e, kelerai wam ene yoso bug-et nde, ap-nen yugwi nggal wene yak tosolar-e, Mbal Pem Nagawan ene lomboksa yoso nap iri-nen indi wawa kwaroso na kondok yuwakluk, watsa yak tij-o.

¹⁷Nde, it enesiget siget mul undugwi nab-e yi ulusu eberek yidnak nggal, wijakni-nen nggan nggan puk kaso nggal-nen yili-o. It enmanggim-e Mbal Pem Nagawan-nen mondok ndamuk nak woraso sa lid lud tak pidnak worasu-o.

¹⁸Ir-e inndi kek tak pem wene kwiye worak yili-t nde, ebe lak wene yogolar-e, mbabi kwarurak pem ukwe akwe yugwi iri na bem-nen kabak yidnak nap ennggendumu-nen nggeret inndi angin tubu yili nap enare pili-o.

¹⁹It enesiget siget mul undugwi nap iri-ge it-nen kwarugwi meya mende iri na ndegel pugwi nap-net nde, it-nen ap erep yak ondogolar-e, weserak unpurak urul yak indili-o. Ta-nen nde yi mende ndi mende-nen urugwe nggwe rak pidnak ala-ge, iri na ndegel poso nab-et kwat yusu-o.

²⁰Nde, ap-nen-e Nenagawan Indo Ninmiri Yoso Yesus Kerisut na enaru yidnak pem-nen nggweyak ma yu-nen kopkap tobok tak woragwi inggem-nen wesera labuk yidnak-et nde, iri mende-nen tuguruk it kamat unpuruk, urugwe nggwe rak onposola-ge, ap iri na nanduk meya kwarogolat woraidnag-e meya-t nde, abok-nen kwatli iri-ge mondok meya lombog-o.

²¹It iri na-ge lud tak nak kwarugwi tula enaru buk woragolat nggal-nen-e ob-et nde, lud tak nak kwarugwi tula enaru lug-et nde, it yak indidnak imiri mbarak pidnak wene mbek tak iri keya bili iri-ge mondok meya lombog-o.

²²It-nen kwatli iri-ge nden karuk wene bem: “Yenggenen sogom kuluruk, naso-o” nde, “Yi marak pidnak wam-e tuguruk kiri ndaril mboroso-o” yugwi na ndak ndak kwatli-o.