Read Nduga 1YOANES 1 Bible Online

1YOANES 1 - Nduga bible

1YOANES 1

¹Engga yu arem-e unluk-et woragwi elem wok ondoso Wene iri owene mbatli-o. Nde, Wene iri-ge tel kwiridnak kuri-net woraso-o. Wene iri na nir-e ene kologolat, nondomok nenlengen-nen kagolat, nenlengen nomosa yik karok woragolat, nininggi-nen tena obogolat yige-o.

²Urug-et woraso iri-ge ap-nen kujwakluk nam tak posola-ge, nit-nen kaige-o. Iri bem-e, at owene iri yak kondogolat, Eid imin woraso pem-et urug-et woralik nalik wolmomtak elem nit ninmbiri bem nam tak pid iri na kenggel kondogolat yili-o.

³Nir-e Nineid min at Ambara Yesus Kerisut min inmin-e erep kundik worali-o. Nde, kir-e nit ninmin lambuksa erep kundik woraboklug-e, nit nenlengen-nen kaidnak min neneyanggo-nen kulidnak min iri na-t yak kindili-o.

⁴Nit nenalen-e iminep mbal maklug-e, engga yu kenmanggim mbatli-o.

⁵At Ambara-nen yak nindidnak wene yu-ge nit-nen kit yak kindili-o. Nde iri-ge Mbal Pem Nagawan-e yaya-nen yusu-o. Nde, at ebem-e ndamuk mbi mondok lag-o.

⁶Nde, nir-e ndamuk arem woragolar-et nde, nir-e Mbal Pem Nagawan imin kundik worali-o luk yogolar-e, nenne bem yogolat na, nininggi-nen kwarogolat na nennesiget yili-o.

⁷Nde, Mbal Pem Nagawan-e yaya bem worasu nggal, nit-nen na yaya bem woragolar-e, nit na nit-net nennggamirak inmin erep kundik worali-o. Woragola, at Ambara Yesus eyabi-nen-e nit meya yugwi pidsa marak nunpusu-o.

⁸Nit-nen nde: “Nit meya yugwi bug-o” luk yogolar-e, nenambikpebe nonmbol pem lali-o. Nde, ndemeret wene-ge nit nenarem-e mondok lag-o.

⁹Mbal Pem Nagawan-e mot mot nak, ndung tak na kwaroso me, nit-nen meya yidnak para yak togola-ge, nit meya yidnag-e at amberam tak puruk, nit meya yugwi mende pidsa marak nunpuwa-o.

¹⁰Nde, nit-nen nde: “Nit meya yugwi bug-o” luk yogolar-e, nit-nen-e Mbal Pem Nagawan na enesiget yoso nap tak pili-o. Nde, at-nen yidnak wene-ge nit nenarem-e mondok lag-o.