Read Nduga 1YOANES 2 Bible Online

1YOANES 2 - Nduga bible

1YOANES 2

¹Nilirak wa-e. Kir-e meya yugup naru, an-e engga yu mbal kundusu-o. Alat nde, ap mbi-nen meya kwarosola-ge, nit nonowene Nineid imin konoso nap, lud tak nak kwaroso nap Yesus Kerisut irit worasu-o.

²Nde, nit meya yidnak amberam tak puwakluk, Kerisut-e mirin ngal yij-o. Nde, nit meya yidnak nag-e lag-o. Are, ap pidsa meya yidnak amberam tak puwakluk, mirin ngal yid irir-o.

³Nde, nit nde Mbal Pem Nagawan-nen imiri mbarak pidnak wene-nen yidnak yidnak nak kwarogolar-e, iri bem-net nir-e ndemeret at nenaru yili-o luk yenggerak pili-o.

⁴Nde, ap misik-nen nde: “Mbal Pem Nagawan-e an naru-o” luk yosolar-et nde, at-nen yidnak yidnak kwarigit lak yosolar-e, iri yusu nab-e enesiget wene yoso-nen yusu-o. At iri na arem-e ndemeret wene-ge mondok lag-o.

⁵Alat nde, Mbal Pem Nagawan-nen yidnak yidnak nak kwaroso nap perak nde, ar-e Mbal Pem Nagawan abuwa kaso-ge iminep mbarak irit worasu-o. Iri bem-nen nir-e Mbal Pem Nagawan imin kundik misiget worali-o luk nenaru yusu-o.

⁶Ta-nen nde: “An-e Mbal Pem Nagawan imin kundik worasu-o” luk yosolar-e, ar-e Yesus Kerisut abage nggal-et wolmomtag-o.

⁷Nanggamirak kenabuwa worak wa-e. Imiri mbarak pidnak wene ngget nin mbal kundusu-ge lag-o. Are, nandug-et yak kindidnak wene, nanduk imiri mbarak pidnak wene na-t mbal kundusu-o. Wene iri-ge kit obi-net kuligep nar-o.

⁸Iri nde, mbal kundusu wene yu-ge imiri mbarak pidnak wene ngget-nen yusu-o. Wene ngget yu-ge Kerisut ebem-nen na, kit kenpem-nen na, yu-ge ndemeret wene-nen yusu-o luk yenggerak pili-o. Ndamuk na lak yosolat, ndemeret yaya-ge yaya rak pusu-o.

⁹Ta-nen nde: “An-e yaya bem-et worasu-o” luk yosolar-et nde, anggam isili rak posolar-e, yawo-nen na irit ndamuk arem worasu-o.

¹⁰Nde, at anggam abuwa kaso nab-e yaya arem worasu me, at arem-e ap enare purak mende mbi worasu bug-o.

¹¹Alat nde, at anggam isili rak poso nab-e ndamuk arem-et worasolar-e, ndamuk arem waring kasolar-e, ndamuk iri-nen at erengen ngguru rak pidnak me, at mburusu sa na an-e iri me mburusu-o luk yenggerak pusu bug-o.

¹²Nilirak wa-e. Kerisut unu bem kit meya yidnak amberam tak pidnak me, engga yu mbal kundusu-o.

¹³Neidtak wa-e. Tel kuridnak kuri-net woraso Wene na kenaru yigep pem engga yu mbal kundusu-o. Kit ap sugwe wa-e. Kir-e Meya Kwaroso Nap na urugwe nggwe rak pigep pem engga yu mbal kundusu-o.

¹⁴Nilirak wa-e. Kir-e Nineid Mbal Pem Nagawan kenaru yigep pem engga yu mbal kundusu-o. Neidtak wa-e. Tel kuridnak kuri-net woraso Wene na kenaru yigep pem engga yu mbal kundusu-o. Kit ap sugwe wa-e. Kir-e kenmawi worak, Mbal Pem Nagawan-nen yidnak wene na kit kenarem worasolat, Meya Kwaroso Nap na urugwe nggwe rak pogolat yigep pem engga yu mbal kundusu-o.

¹⁵O nggweyak yu min nggweyak ma woraso mende min abuwa yurak pug-o. Kit-nen nde o nggweyak yu abuwa kagola-ge, Nineid abuwa kagwi kit kenarem-e mondok lag-o.

¹⁶Nggweyak ma woraso mende pidsa-ge yu-o. Enaboro-nen ukwe ukwe yugwi mende min enlengen-nen karuk ukwe ukwe yugwi mende min nggweyak ma mende bem ap-nen ondomok entembel wanugwi mende min iri-ge Nineid eram-nen lobok yidnak mende-nen yusu-ge lag-o. Nggweyak ma-nen idnak mende-net yusu-o.

¹⁷O nggweyak yu min nggweyak ma mende ukwe ukwe yugwi mende pidsa min-e lak yusu-o. Alat nde, Mbal Pem Nagawan indi-n pidnak nak kwat tenak wolma nab-e urug-et pem-et woralik nalik wolma-o.

¹⁸Nilirak wa-e. Woroksiyem-e panggo yij-o! “Kerisut imin sirid nab-e lobok yuwa-o” luk yak kindiga na-ge yawo-ge Kerisut imin sirid nab-e kwarat men yigarik me, iri bem-nen worok tak purak tarem panggo yusu-o luk nenaru yili-o.

¹⁹Kerisut imin sirid nap iri-ge nit ninmin woragwi na-t nde, ndemeret ninmin kundigit lak me, keya nunpuruk mbiridnak nap-net yili-o. It nde nit ninmin kundik nap nggal-nen-e ndemeret nit ninmin wolareb-o. It iri-ge ap misiger-o luk tet nit nab-e lag-o luk yenggerak puwakluk, nit keya nunpuruk mbiriga-o.

²⁰Alat nde, Kerisut-nen Konak Indi-ge kit kenpem kilidnak me, kit pidsa kenaru yili-o.

²¹Iri ala-ge, kir-e ndemeret wene kenaru buk ala, engga yu mbal kundusu-ge lag-o. Are, ndemeret yoso Mbal Pem Nagawan iri-ge mondok enesiget yoso bug-o kenaru yili iri bem-nen engga yu mbal kundusu-o.

²²Iri bem-e, enesiget yoso nab-e ta-o? Iri-ge “Yesus iri-ge Kerisut-nen yusu-ge lag-o” luk yoso nap irir-o. Iri yoso nab-e Kerisut imin sirid nap-nen yusu-o. At iri-nen-e: “Eid na irit, Ambara na irit, naru bug-o” yoso-o.

²³Ta-nen nde: “Ambara na naru bug-o” yusu nab-e Eid na wok ubusu bug-o. Nde, ta-nen nde: “Ambara iri-ge naru-o” yusu nab-e Eid na wok ubusu-o.

²⁴Iri bem-e, nandug-et kuligep wene na-ge kwara parugu wolmer-o. Nde, nandug-et kuligep wene iri na kit kenarem puksa parugu woragola-ge, kir-e pempa Ambara min Eid min inmin kundik woragub-o.

²⁵Nde, Kerisut at-net urul yak nondosolar-e: “Kunlug-et pem-et woralik nalik woragub-o” luk yak nindik nar-o.

²⁶An engga mbarusu yu-ge kit konmbol pem lokluk enmawi kundili nap iri wene mbarusu-o.

²⁷Alat nde, kit perak nde, Kerisut-nen Konak Indi-ge kit kenpem nggilara pil mbuwagaij-o. Nde, Konak Indi-ge kit kenarem woralar-e, yi mende ndi mende pidsa mul kundusu me, ap-nen mul kundurag-e meya-o. Nde, Konak Indi-nen mul kundusu wene-ge enesiget wene-ge lag-o. Ndemeret wene nak mul kundusu-o. Iri bem-e, kit-nen-e Konak Indi-nen yidnak yidnak nak kwarogolat, Kerisut imin kundik irit wolmer-o.

²⁸Nde, nilirak wa-e. Kerisut lobok yuwa tarem-e ninggiri min lak, mondok kwiye lag-et at eram wok yuwok-nen Kerisut imin kundik irit wolmer-o.

²⁹Nde, Kerisut na-ge lud tak nak kwaroso-nen yusu-o luk, kenaru nar-o. Iri bem-e, lud tak nak kwatli nap pidsa-ge Mbal Pem Nagawan ilirak-nen yili-o luk kenaru mer-o.