Read Nduga 2YOANES 1 Bible Online

2YOANES 1 - Nduga bible

2YOANES 1

¹Mbal Pem Nagawan-nen len kibidnak kwe min kilirak min wa-e. Wiwa-o. Ogore yidnak nap an-nen engga yu mbal kundusu-o. An-e ndemeret kit kenabuwa kwarat kasu-o. Nde, an narig-et nak-nen kenabuwa kasu-ge lag-o. Are, ndemeret wene enaru yidnak nap pidsa-nen na kenabuwa-t kali-o.

²Nde, ndemeret wene-ge nit nenarem woralat, nit nin-min pem-et woralik nalik wolma iri bem-nen kenabuwa kali-o.

³Nineid Mbal Pem Nagawan min at Ambara Yesus Kerisut min-nen-e we wok ondoso elem min enabuwa kagwi elem min yamuksa woragwi elem min wok nunduwag-o. Iri mende pidsa lud tak woragwi bem na ena-buwa kagwi bem-net ninmin wolma-o.

⁴Nineid-nen: “Ndemeret wene bem-et wolmer-o” luk yak nindid na ndak ndag-et kat kilirak ereb-e ndemeret wene na bem-et woragola karuk, nalen kwarat kagi-o.

⁵Iri bem-e, niya wa-e. Nit na nit-net nabuwa kabuwa yogolat wolmog-o luk an-e kiri keresa yak kurusu-o. Nde, an-nen mbal kurusu wene yu-ge wene ngget ki-ge lag-o. Wene yu-ge nanduk-net “Iri kwarer-o” luk yak nindidnak wene-nen yusu-o.

⁶Enabuwa kagolar-e, nir-e Mbal Pem Nagawan-nen “Iri kwarer-o” yidnak iri na-t mondok kwarogolat wolmomtag-o. Nde, kit nanduk-net “Iri kwarurag-o” yidnak wene kuligep na-ge yu-o. Kit na kit-net mondok nabuwa kabuwa wolmomtag-o.

⁷Nde, ap onmbol pem lagwi nap kwarar-e yi wi ndi wi waring kali-o. Nde, it iri-nen yogolar-e: “Yesus Kerisut iri-ge nggweyak ma nap nggal lobok yij-o” luk yili bug-o. Nde, iri yugwi nap iri-ge Kerisut uwim nap, ap onmbol pem lagwi-nen yili-o.

⁸Iri bem-e kit-nen yabu wanugup na onggo lak we irit wabugup naru, onggo ndak ndak wanobokluk, kwara wolmer-o.

⁹Kerisut-nen mul indidnak wene iri na puksa tena woragit lak, are, Kerisut-nen mul indidnak keya buruk mburuwa nab-e Mbal Pem Nagawan imin kundik worasu bug-o. Alat nde, Kerisut-nen mul indidnak wene iri na puksa tena worasu nab-e Eid min Ambara min inmin kundik worasu-o.

¹⁰Iri bem-e, nin nap-nen lobok yuwarik, nin wene owak yak kondogola-ge, kenma rak unpurak puk, wa na yak undurak puk na-e.

¹¹Iri nggal kwarugwi nap iri wa yak indili nab-e at-nen meya kwaroso na ereb-et tenagusu-o.

¹²An-nen yak kundurak wene kwarat worasu-t nde, an-nen perasolar-e, engga bem nak mbarurag-e meya-o. Are, nebe-t lobok yimindik, nenalen pem-et yuwok-nen lambuksa wene yul-o luk perasu-o.

¹³Mbal Pem Nagawan-nen len ibidnak kanggam iri na ilirak-nen wa yak kiriga-o.