Read Nduga NAM PARA WENE 1 Bible Online

NAM PARA WENE 1 - Nduga bible

NAM PARA WENE 1

¹Engga yu arem-e Yesus Kerisut-nen abok-nen kwat momtak mende nam tak pidnak wene mbarak worasu-o. Nde, yanem-et kwat ma mende iri-ge Mbal Pem Nagawan-nen at ndegel ubugwi nap mirik unpuwakluk, Kerisut wok tij-o. Nde, Kerisut-nen-e kwat ma mende iri na-ge at ndegel oboso nap Yoanes na mirik ubuwaklug-e, at-nen idnak aid nab-e Yoanes eram ibil lobok yij-o.

²Yoanes na at erengen-nen kaidnak mende oboksa konggorosolar-e, Mbal Pem Nagawan-nen yidnak wene min Yesus Kerisut-nen nam tak pidnak wene min engga yu bem kenggel indij-o.

³Wene yu oboksa-ge yanem-et kwat ma me, kwat ma-o luk urul pidnak engga yu arem mbarak worasu na wonaruwa nap min wonaridnak irit kuluruk iri na ndak ndag-et kwaruwa nap min-e enalen kujwa-o!

⁴Nanggamirak lambuk tak kinpidnak nap o tuju Asia wi worali nap kenpem-e: Nanduk na woraso, yawo na worasu, abok na wolma Mbal Pem Nagawan min at koreyak woraso urugwe nggwe woragwi indi tuju min mot mot nak konggoroso nap, Ambara manggu nderak iri-ge wat yidnak nap ennggendumu-nen uruk tak pid nap nggweyak ma yu me nagawan nagawan teberak unpuruk, nagawan amawi worak kek yidnak Yesus Kerisut min-nen idnak we wok ondoso elem min lambuksa woragwi elem min-e nanggamirak wok kunduwag-o luk an Yoanes-nen perasu-o. Yesus-nen nit nenabuwa karuk, at wat yosolar-e, nit meya yidnak inggem-nen wisirik nunpuruk,

⁶at Eid Mbal Pem Nagawan eyabu wanuwakluk, tepan ombo rak nonposolar-e, nagawan tak ninpij-o. Yesus Kerisut iri-ge kek tak, amawi worak pem-et woralik nalik irit wolma-o! Amen.

⁷Yik ker-o. Ar-e nggan nggan arem lobok yusu-o! Ap oboksa-nen at kagolat, tege at arem mon kaidnak nap-nen na kujwar-o. Nggweyak ma nap enlem oboksa-nen-e at ubud-nen yip kwarat yuwa-o. Ndemerer-o! Amen.

⁸Nanduk na woraso, yawo na worasu, abok na wolma nap, Mondok Amawi worak Nagawan Indo Mbal Pem Nagawan-nen yosolar-e: “An-e Tel Koroso min Woroksiyem min-nen yusu-o” luk yij-o.

⁹Kennggam Yoanes an-e Yesus imin nugwi nap enpem mboso mende anggun panggun na nenpem mbosola-t nde, nit at ilirak-nen-e mamak puruk worali-o. Mbal Pem Nagawan-nen yidnak wene Yesus-nen yak niridnak iri na ap kenggel ondoso bem yi terapmu o unu-ge Patmos iri me mbo nibiga-o.

¹⁰Nde, Nagawan Indo-nen idnak tarem-nen-e Konak Indi an narem nggosola-ge, an nombol nggwe-nen ene nggulok mbi, posid poba ene nggal, iri-nen wene yosola, kuligi-o.

¹¹Ene iri-nen yosolar-e: “Kat-nen kasu mende iri engga bem mbari-o. Lambuk tak inpidnak nap o tuju yu endam pil mbiri-o: Epesus min Simirina min Peregamus min Tiatira min Sarandis min Pilandelpia min Laorikia min endam pil mbiri-o” luk yij-o.

¹²An nimin wene yusu iri-ge ta-nen yusu-o luk nden kaga yik kaginggal-e, emas-nen konidnak tal tuju iri kagi-o.

¹³Nde, tal iri na enggenggerag-e ap nggal-et misik mendak kagi-o. Nde, usum-e lorok sum ijok kuri irit yirik, nde, emas-nen konidnak kere-nen-e imigwak ngonoksa yirik kagi-o.

¹⁴At anggulsu-ge yi umngen amare nggal, ndugu ndugu nggal loro lombok woragaij-o. Nde, at erengen-e kanduk nggal kere kererak,

¹⁵at ijog-e kerep wiril nggal, nde, at ene-ge yi ugul ene wud nggal-o.

¹⁶At inggi kigit nggwe-ge wonaru tuju tena, nde, emendam nggwe-ge yalawi anggat ponok ponok worak iri-ge kenanggo, nde, at imbiriwak amare-ge mo eyak kererak pil wasolat nggal-o.

¹⁷Nde, an-nen at yik kaginggal-e, ap wat yidnak nggal luk, at eralu mbud yigi-o. Alat nde, at-nen at inggi kigit nggwe-nen an tena nuburuk, yak norosolar-e: “Kwiye kasu meyog-o! An-e tel koroso min woroksiyem min-nen yusu-o.

¹⁸An-e nuruk woraso-nen yusu-o. Ki-o. An-e wat yigi-t nde, nuruk yigirik, yawo-ge an-e nurug-et pem-et woralik nalik worasu-o. Wat yugwi elem min wat yugwi elem-nen tenagaidnak wi min tu mig worak pugwi-ge an ninggem worasu-o.

¹⁹Iri bem-e, kat-nen kasu mende, yawo-n worasu mende na irit, abok-nen kwat ma mende na irit, engga bem mbari-o.

²⁰An ninggi kigit nggwe tena worasu wonaru tuju min, emas-nen konidnak tal tuju min iri bem-nen yidnak kura wene ebe-ge yu-o: Wonaru tuju iri-ge lambuk tak inpidnak nap tuju iri-nen idnak aid nap-nen yili-o. Nde, tal tuju iri-ge lambuk tak inpidnak nap o tuju iri-net yili-o” luk yak nirij-o.