Read Nduga NAM PARA WENE 12 Bible Online

NAM PARA WENE 12 - Nduga bible

NAM PARA WENE 12

¹Iri luk, mbal pem-nen kwiye worak mende nggulok misik nam agaij-o. Iri-ge kwe misik molengen-e usum nggal yirik, waneya bem mendak worasolat, nagawan-nen yurugwi topi wonaru duabelas-nen konidnak iri anggul pem pago irit nam agaij-o.

²Kwe iri-ge abila me, la ndageyekluk yane worosolat ene kulak yosolat woragaij-o.

³Iri lug-e, mbal pem-nen kwiye worak mende misik nam agaij-o. Iri-ge aywa nggal nggok mimi mbi anggul-e tuju, anggul ambo-ge sepulu, nde, anggul ereya na irit sa nagawan-nen yurugwi topi pago irit nam agaij-o.

⁴Nde, at iyuwak-nen mbal pem woraso wonaru erep minggirik (sepertiga) iri na lit yaga nggweyak ma mbo bil mbuwagaij-o. Nde, aywa nggal nggok na-ge kwe la ndageyekluk yane wurusu na la na ndagosola ereya na-net nayekluk eram mendak woragaij-o.

⁵Nde, kwe na-nen-e li ap posid wangun pem ap enlem oboksa tena unpuruk wolmomtak nap li ap irit ndagaij-o. Alat nde, la na-ge kwe iri na inggem mengga Mbal Pem Nagawan eram Mbal Pem Nagawan koreyak woraso sa urugwe nggwe pil mbiriga-o.

⁶Nde, kwe iri na-ge Mbal Pem Nagawan-nen ondoro amanggim konidnak sa karu me ap lak ma mberarik worala iri me ndegel obosolat woralar-e, seribu dua ratus enam pulu (1,260) tarem irit woragaij-o.

⁷Iri luk, aid arem-nen wim ngariga-o. Mikael min at-nen idnak aid nap erep inmin-nen-e aywa nggal nggok na min at-nen idnak aid nap min inmin wim pogolat woraiga-t nde,

⁸aywa nggal nggok iri-ge urugwe nggwe rak puruk, at-nen idnak aid nap erep inmin-e aid arem wolmomtag-e lag-o luk,

⁹waro nggulok pare iri na-ge mbo bil mbuwagaij-o! Nde, at iri-ge nanduk-nen woraso unu misig-e Sere, are, Kugi oboksa onmbol pem laso iri nar-o. Ar-e at-nen idnak aid nap inmin-et nggweyak ma mbo bil mbuwagaij-o.

¹⁰Iri lug-e, an kuliginggal-e, aid arem-nen ene nggulok misik-nen yosolar-e: “Mbal Pem Nagawan-nen at ilirak inmiri yaga wok undurak tarem-e yawor-o! Nde, Mbal Pem Nagawan-nen at-nen nagawan woraso amawi-ge yawo nam tak pusu-o! Nde, at-nen lenak ibidnak Kerisut na amawi-ge yawo nam tak pusu-o! Nde, Mbal Pem Nagawan imbiri bem lengge-nen kubu-nen enesiget wene bem nennggamirak onpok poso na-ge aid arem-nen mbo bij-o.

¹¹Nde, nit nennggamirak-nen-e Lomba Wam Marik eyabi bem-nen na, Mbal Pem Nagawan-nen yidnak aid wene it-nen yugwi na bem-nen na ar-e urugwe nggwe rak ibiga-o. Nde, ir-e wat momtag-et nde, it inndi abuwa lak tak puruk wat yiga-o.

¹²Iri bem-e, aid arem min aid arem woragwi nap min wa-e. Kenalin kenalen ker-o! Alat nde, kit nggweyak min yi koma min wa-e. Sere na-ge at-nen kwarurak tarem-e marig-et nak iri-ge ar-e aru me, isilepma min kit kendam mbidnak me, nggweyak min yi koma min-e abuwa-o!” luk yij-o.

¹³Nde, waro na lombot pidnggal-e, at na nggweyak ma ibil mbuwaidnak karug-e, kwe la li ap ndagaid iri na muk kaso tel kwirij-o.

¹⁴Alat nde, kwe na-ge at ondoro karu me iri me pubu mburuwaklug-e, towe ud nggulok isiyamu mberen irit wok tij-o. Wok tamu, karu me waro na aye-nen iri me mberarik worasolar-e, Mbal Pem Nagawan-nen ndegel obosolat olengen kenan setenga (3 ½ tahun) irit woragaij-o.

¹⁵Iri luk, waro na-nen-e kwe na yi-nen wanuwakluk, waro na emendam nggwe-nen yi-ge kwe na ambigit nggwe mbuk yaga wirik pij-o.

¹⁶Alat nde, nggweyak-nen kwe iri yongga worosolar-e, at emende pera luk, waro na emendam-nen wirik pidnak yi na ninggij-o.

¹⁷Iri ala karuk, waro na kwe iri na ebem isilepma kwarat puruk, kwe iri-nen wigarak erep inmin wim peyekluk mbirij-o. Nde, it iri-ge Mbal Pem Nagawan-nen yidnak yidnak nak kwarogolat, Mbal Pem Nagawan-nen yidnak wene Yesus-nen nam tak pidnak wene na wanugwi nab-o.

¹⁸Nde, waro na-ge yi koma eyak pem mendak woragaij-o.