Read Nduga NAM PARA WENE 14 Bible Online

NAM PARA WENE 14 - Nduga bible

NAM PARA WENE 14

¹Iri luk, yik kaginggal-e, Lomba Wam Marik na-ge Sion ndobo bem mendak worala kagi-o. Nde, at imin-et at unu nde at Eid unu nde it inmbiriwak pem mbarak nab-e seratus empat pulu empat ribu (144,000) irit woraiga-o.

²Nde, an kuliginggal-e, aid arem-nen ene misig-e yi ugul nggok wud kasolat ene min o nggu nggok ene lu nggal irit kuligi-o. Nde, ene iri-ge kecapi poga yugwi nap-nen onpoba ene yogola, ene yoso nggal-et kuligi-o.

³Nde, it-nen ndawi ngget misik yogolar-e, nagawan koreyak woraso ondoro bem koreyak worasu na min untugup worak mende empat ereya na min enne kulugwi nap min inmbiri bem ndawi iri-ge yiga-o. Nde, nggweyak ma yu me-nen onnggo bidnak nap seratus empat pulu empat ribu (144,000) iri nak-nen ndawi iri enaru-o.

⁴It iri na-ge kwami inmin nene yugwi buk me, kopkap lak-nen yili-o. Ir-e kwami wanugwi buk-nen yili-o. Nde, ir-e Lomba Wam Marik na mbiridnak sa nak imbirik nak nugwi-o. It iri-ge nggweyak ma nap ennggenggerak-nen onnggo bidnak nap me, ir-e nanduk nandug-et Mbal Pem Nagawan min Lomba Wam Marik min enmanggim wosa inpidnak-nen yili-o.

⁵It iri enmende nggwe-nen-e enesiget wene mariget tet wirik pugwi bug-o. Nde, meya mariger-o luk tet it enpem-e mondok lag-o.

⁶Iri luk, an yik kaginggal-e, aid nap misik mbal pem teram pubu waring kasola kagi-o. Nde, aid nap iri-nen-e pem-et wolmomtak aid wene-ge nggweyak ma nap, ap enlem obiksa na, ap enlem tak oboksa na, ap enne lombok oboksa na ap unuwi nggweyak lombok woragwi oboksa yak undurak wene min waring kasolar-e,

⁷at-nen ene ngguloksa-t yosolar-e: “Mbal Pem Nagawan-nen ap enpem wene mbarurak tarem wok yidnak me, Mbal Pem Nagawan aye kagolat, at-nen kek tak woraso iri na erembel waner-o! Mbal min nggweyak min yi koma min yi ulusu min ndak worak pid Mbal Pem Nagawan na erembel waner-o!” luk yij-o.

⁸Yosoloma-ge, aid nap na imbirik aid nap misik (yang kedua) wok yosolat-nen yosolar-e: “Tud yij-o! O siri nggulok Mbabel iri na tud yij-o! At iri-nen ap enlem oboksa mak ondosolar-e, at-nen ukwe ukwe yoso mbabi yugwi mende anggut engen amburu iri bem-nen ap oboksa inndi nden yaga keya unpusu-o!” luk yij-o.

⁹Yosoloma-ge, aid nap mberen na inmbirik aid nap misik (yang ketiga) wok yosolat-nen ene ngguloksa yosolar-e: “Ndakngge isilepma worak iri na min at abage nggal ndak worak pidnak iri na min erembel wanogolat, at-nen pidnak yenggerak purak mende iri-ge it inmbiriwak pem ala na, it ininggi bem ala na worak nab-e

¹⁰iri yidnak nap-nen-e Mbal Pem Nagawan-nen idnak anggut engen amburu iri nujwa-o! Anggut engen amburu iri-ge Mbal Pem Nagawan isilepma na-ge mariget tet nin tak pigit lak iniksa-t idmbe arem woranggasa pil nggwidnak iri na nujwa-o! Nde, it iri na oboksa-ge andi bandi rak onposolar-e, lenak inpidnak aid nap min Lomba Wam Marik min enlengen pem-et kanduk min kule emben meya (belerang) min-nen andi bandi rak onposolat wolma-o.

¹¹It andi bandi rak unpusu kule-ge lasolat nak wolma-o. Ndakngge isilepma worak min at abage nggal ndak worak min erembel wanidnak nap yenggerak purak mende at unu mbarak worak nab-e lengge-nen kubu-nen pok tak pigit lak andi nak kagolat wolma-o” luk yij-o.

¹²Wene yu bem-e Mbal Pem Nagawan ilirak at-nen yidnak yidnak nak kwarogolat, Yesus ebem inndi puksa-t angin tubu yogolat yugwi nab-e mondok tugup lak wolmomtag-o.

¹³Iri luk, an kuliginggal-e, aid arem-nen ene misik-nen yosolar-e: “Wene yu engga bem mbari-o. Yawo kuri-net Nagawan Indo eyabu wanukmu wat yuwa nab-e enalen kujwag-o!” luk yij-o. Nde, Konak Indi-nen yosolar-e: “Ndemerer-o. It-nen yabu wanidnak ebe-ge pempa it inmin wolma me, it eneyabu anggun panggun wanugwi na keya buruk, enpabok kwaruwa-o” luk yij-o.

¹⁴Iri luk, an yik kaginggal-e, nggan nggan loro mbi kagi-o. Nde, nggan nggan iri na bem-e ap nggal misik anggul pem-e nagawan-nen pugwi topi emas-nen konidnak pago, nde, inggem-e yalawi anggat worak tena koreyak kagi-o.

¹⁵Iri luk, aid nap misig-e Mbal Pem Nagawan ama-nen wasolar-e, ene ngguloksa nggan nggan pem koreyak worasu nap na yak tosolar-e: “Ogore yidnak pem mbarurak tarem ndak yidnak me, nggweyak ma yu-nen poso ebe-ge ogore yid me, kat keyalawi iri waga ebe yidnak iri mbari-o!” luk yak tij-o.

¹⁶Yak tosoloma-ge, nggan nggan pem koreyak worasu nap-nen at eyalawi nggweyak ma mberak pil mbuwaruk, nggweyak ma-nen pidnak ogore yidnak oboksa mbarij-o.

¹⁷Mbarosola, yik kaginggal-e, aid nap misig-e Mbal Pem Nagawan uwi aid arem iri na me-nen wasola kagi-o. Nde, at inggem na yalawi anggat worak misik tena kagi-o.

¹⁸Nde, kanduk tena wolmomtak amawi wok tidnak aid nap misig-e Mbal Pem Nagawan amanggim wam wosa pugwi sa-nen wagaij-o. Wasolar-e, at ene ngguloksa-net yalawi anggat worak tena worasu aid nap na yak tosolar-e: “Anggut engen-e ogore yidnak me, kat keyalawi iri waga nggweyak ma-nen pidnak anggut engen ogore yidnak iri mbari-o!” luk yak tij-o.

¹⁹Yak tosoloma-ge, aid nap iri-nen-e at eyalawi lit karuk nggweyak ma pil mbuwasolar-e, anggut engen mbara amburu mbetla pugwi sa pil nggwij-o. Nde, amburu mbetla pugwi sa iri-ge Mbal Pem Nagawan isilepma kwarat-nen yusu-o.

²⁰Anggut engen ereba na-ge o siri ombol nggwe mbepme-nen amburu mbotlosola-ge, amburu mbutlugwi iri me-nen-e yabi-ge yi ebe nggal wasolar-e, yubuktag-e sapi wam ombolwak pem-nen nggweyak ma nggal-o, nde, kuri-ge tiga ratus (300) kilometer irit mbirij-o.