Read Nduga NAM PARA WENE 18 Bible Online

NAM PARA WENE 18 - Nduga bible

NAM PARA WENE 18

¹Iri luk, an yik kaginggal-e, aid nap misik aid arem-nen mbuwasola kagi-o. Nde, at iri-ge amawi kwarat worak me, at abinal-nen nggweyak ma yu me oboksa yaya rak pij-o.

²At-nen ene ngguloksa yosolar-e: “Tud yij-o! O siri Mbabel nggulok na-ge tud yij-o! Nde, yawo tud yosola-ge, ar-e kugi meya min meya inndi min ondoro kwat yosolar-e, arem-e yi towe ndi towe mbilaro ngin meya insili rak pugwi na worasu-o.

³Ap enlem oboksa-nen-e ukwe ukwe luk mbabi kwarugwi anggut engen amburu nonggolat, nggweyak ma nagawan nagawan-nen-e kwe na imin mbabi kwariga-o. Nde, nggweyak ma yu me toko winde woragwi-nen-e ukwe ukwe enarem kobong yosolar-e, iri-nen ndowaga insilobulo kwarat ligik piga-o” luk yij-o.

⁴Iri luk, an kuliginggal-e, aid arem-nen ene misik-nen yosolar-e: “An nilirak kir-e kwe iri-nen meya kwaroso mende kwarugupndik, at imin kenpem wene mbaruwa naru, kwe iri eram-nen wud yer-o!

⁵Kwe iri meya yidnag-e kwarat ligik mbal pem lasola me, Mbal Pem Nagawan-nen-e kwe iri-nen meya yidnag-e yebet yebet tak worasu-o.

⁶Kwe iri-nen kit kwat kinpid nggal-et kit-nen na iri nggal-et kwat uburag-o. Onggo at wok togolar-e, at-nen kwaridnak onggo-ge mberen pem tak paga wok turag-o. At-nen kit kenmanggim nat karuksa lid lud tak pidnak yi amawi-ge te nggal-et nde, kit-nen-e nat karuk tak pidnak yi amawi mberen pem nambena at idmbe arem kenanggo burag-o.

⁷Pempa at-nen at ambik imin yosolar-e: ‘An-e o tena woraso kwe nagawan-nen yusu-o! An-e kwe togwe-ge lag-o. An nindi puru pera mondok woramin pug-o!’ luk yoso me, ar-e arengge kwarat woralat, at ondomok kek tak woraso iri ndak ndag-et andi bandi mende min indi puru pera woragwi mende min wok turag-o.

⁸Iri bem-e misik tarem-et at andi bandi rak uburak mende at ebem mbosolar-e, ud andi kagwi mende min inndi puru yugwi mende min nere min at ebem mbuwa-o. At ebem wene mbaroso Nagawan Indo Mbal Pem Nagawan iri-ge amawi kwarat me, kwe iri na kan puwama, kan nujwa-o” luk yij-o.

⁹Kwe na imin mbabi yogolat, at-nen ukwe ukwe kwaroso imin kwarugwi nggweyak ma nagawan nagawan-nen-e at kan pidnak kule lasola karug-e, o siri iri abuwa-nen yip togolat, tabun puruk wolma-o.

¹⁰At andi bandi kasu na kwiye-nen nuruksa mendak woragolat-nen yogolar-e: “E! O siri anggu obok worak amawi worak Mbabel yu-ge ijar-o! Kat kebem wene mbarosolar-e, jam misiget pem nak lak tak kubusu-o!” luk yuwa-o.

¹¹Nde, ap misiger-o luk tet-nen it insilobulo onggo pigit lak ala karuk, nggweyak ma woragwi toko winde-nen kwe na ubud yip togolat, tabun puruk wolmar-o.

¹²It enarengge iri-ge emas min perak min onggo nggok pugwi kerep min mutiara tol min sum loro konak min sum mimi min ndagwi isinggalnggal-nen konidnak sum min mongga sum min; e embem konak onggo pugwi pidsa min; wam eyak-nen konidnak min e onggo nggok pugwi-nen konidnak min tembaga posid-nen konidnak min posid-nen konidnak min kerep mbesel-nen konidnak min;

¹³e aboro undu konak undu rak pugwi mende erep min ububu emben worak min mut amburu min nggimi amburu min; anggut engen amburu min wam amburu min oroti mburu worakwi mende yigirik mabe nggal min gandum mbato min sapi wam min lomba wam min kuda wam min nggweyak koma min ndegel unpugwi nap min ap inndi min-et oboksa onggo purak nab-e lak ala-n yip tuwa-o.

¹⁴It toko winde-nen kwe na yak togolar-e: “Kat-nen winde yurak peraso na-ge oboksa lak yij-o. Kat karengge kwarat worak kigirik iri na lak yij-o. Nde, kar-e tuguruk wanugun pug-o” luk yak tuwa-o.

¹⁵Toko winde o siri iri me-nen toko tena woragolat, enarengge kwarat winde yiga it iri na-ge kwe iri na andi bandi kasu iri na kwiye-nen enpe nuruksa mendak woragolar-e, yip togolat, tabun puruk woragolat-nen

¹⁶yogolar-e: “At usum-e sum loro konak min sum mimi min mongga sum min yirik worasolat, imirik umurug-e emas-nen konidnak min onggo kwarat pugwi kerep min mutiara tol min pago woraso na-t nde, o! O siri anggu obok worak yu-ge andi bandi kasu yu-ge o!

¹⁷Nde, at iri-ge jam misiget pem nak isilobulo mondok kwarat iri oboksa lak yij-o!” luk yuwa-o. Yi koma waruk nugwi nap enne kulugwi nap oboksa min yi koma arem mburugwi nap oboksa min yi koma waruk mburugwi nap oboksa min yi koma ombolwak pem yi mende ndi mende kore yil nugwi nap oboksa min-e nuruksa mendak woragolat-nen

¹⁸kwe na kan nasolat kule lasola karuk-nen enne nggoksa yogolar-e: “O siri erep mbi o siri nggulok yu nggal mbi mondok worasu bug-o!” luk yiga-o.

¹⁹Ir-e mabe ndatluk tabun puruk woragolat, yip togolat-nen enne ngguloksa yogolar-e: “O! O siri nggulok iri andi bandi kasu yu-ge o! At isilobulo kwarat ereba na-nen ndowaga yi ombolwak pem waring kagwi koma winde nap oboksa-ge enarengge kwarat ligik lagaij-o. Nde, jam misiget pem nak at arenggi arengge oboksa lak yij-o!” luk yiga-o.

²⁰Aid arem wa-e. Kwe iri na yigisa lak tak pidnak pem kalen ki-o! Mbal Pem Nagawan ilirak min wirik kinpidnak nap min Mbal Pem Nagawan ene lomboksa yugwi nap min wa-e. Kwe iri-nen kwat kinpidnak na onggo Mbal Pem Nagawan-nen kwe iri ebem wene mbarid pem-e kenalin kenalen ker-o!

²¹Iri luk, amawi worak aid nap misik-nen kerep nggok misik waga mbisingsa yi koma arem mbo bil nggosolat-nen yosolar-e: “O siri nggulok Mbabel na-ge yu nggal kwasa isilepma min mbo buwama, abok erare mondok kujwa bug-o.

²²Kecapi poba yugwi nap-nen yogola enne min ndawi yugwi nap enne min mingin owak arem poba yogola enne min posid poba ene yogola enne min iri nggal ereba-ge o siri iri me-nen yogola-ge, mondok kuluwa bug-o. Yabu nin tak nan tak wanugwi nab-e o iri me mondok ini yujwa bug-o. Tagarugwi kerep ene lo na o iri me mondok kuluwa bug-o.

²³O siri iri me-nen-e tal yaya na kujwa bug-o. Nde, kwe wok kerak mbugwi tarem sakolat inni enne na o iri me-nen-e kuluwa bug-o. O iri me woragwi toko winde-ge nggweyak ma yu-nen mondok anggu obok worak woraiga-o. Nde, o iri me woragwi kwal ombo-nen-e nggweyak ma nap enlem pidsa onmbol pem laiga-o” luk yij-o.

²⁴O Mbabel iri me-ge Mbal Pem Nagawan ene lomboksa yugwi nap eneyabi min Mbal Pem Nagawan ilirak eneyabi min wirik pidnak ala karuk, Mbabel na ebem wene mbarij-o. Nde, poro rak posolar-e, nggweyak ma yu-nen ap pidsa ondogolat eneyabi wirik pidnak ala-nen kwarij-o.