Read Nduga NAM PARA WENE 20 Bible Online

NAM PARA WENE 20 - Nduga bible

NAM PARA WENE 20

¹Iri luk, an yik kaginggal-e, aid nap misik aid arem-nen mbuwasolar-e at inggem-e wat yugwi mbun tu imig worak pugwi min posid kere nggok min inggem mbuwagaij-o.

²Mbuwasolar-e, nanduk woraso waro iri na-ge unu-ge Sere, are, kugi iri na tenasa olengen seribu wolmakluk kere kamarak ibij-o.

³Iri luk, aid nap iri-nen waro na-ge wat yugwi mbun arem pil ngguruk, tu imig worak puruk, kuwak ma naru lop nok tak pugwi mende bem panggarak pid iri-ge olengen seribu (1,000) iri awo lak yigit lak ma ap enlem oboksa onmbol pem lujwa naru-nen kwarij-o. Nde, iri rak puruk, siyag-et nak wolmomtak pem mondok wisirik ubuwa-o.

⁴Iri luk, an yik kaginggal-e, nagawan-nen koreyak woragwi ondoro kwarat kagi-o. Nde, ereba na bem-e ap enpem wene mbaruwakluk amawi wok indidnak nap yere kore eneyagi-o. Nde, tuguruk yik kaginggal-e, ir-e Yesus owene kinggiridnak pem-nen na, Mbal Pem Nagawan-nen yidnak wene timbiridnak pem-nen na unlusu mbaridnak nap inndi nde eneyagi-o. Nde, it iri-ge ndakngge isilepma worak min at abage nggal ndak worak na min erembel wanigit lak, it inmbiriwak pem-nen na, ininggi bem-nen na ndakngge isilepma worak-nen idnak yenggerak purak mende enpem pigit lak nab-o. It iri na unluk lug-e, olengen seribu (1,000) woragolar-e, Kerisut imin nagawan nggal wolma-o.

⁵Yu-ge wat yidnak nap nandug-et unluk momtak iri nar-o. Alat nde, wat yidnak nap ereb-e men yigit lak irit woragola, o lengen seribu (1,000) irit wolma-o.

⁶Ap nandug-et men momtak tarem iri bem men ma nab-e mberen pem tak posolat wat momtak iri-ge it enpem mbuwa buk me, ir-e inmbiringgat worak, mondok marak arik lenak woragwi nap-nen yili-o. It iri na-ge Mbal Pem Nagawan min Kerisut min-nen idnak tepan ombo kwat luk, olengen seribu (1,000) woragolar-e, it-nen-e Kerisut imin totno nagawan wolma-o.

⁷Nde, olengen seribu (1,000) na woroksa lak yosola-ge, Sere iri-ge o kubu me ibil nggwid na wesera keya ubuwama,

⁸at na mborosolar-e, nggweyak ma yu me woragwi, o kuri ap kuri Nggog min Magog min woragwi ap enlem oboksa na onmbol pem lasolat wolma-o. Nde, wim purak pem Sere-nen it oboksa ndok wat unpuwa nap iri-ge yi ma woraso sisiri nggal, wonarurak puk irit ndok wat unpuwa-o.

⁹It ereba na-ge yi wi ndi wi oboksa liring keyok yogolar-e, Mbal Pem Nagawan ilirak woragwi sa min Mbal Pem Nagawan indi kundik o siri na min lop lop indiga-o. Alat nde, mbal pem-nen kanduk mbuwasolar-e, it na pusa lak tak inpij-o.

¹⁰Iri rak puruk, it onmbol pem laso Sere iri na-ge emben worak kule (belerang) laso kan mare arem mbo bil nggwid iri-ge ndakngge isilepma worak min enesiget Mbal Pem Nagawan ene lomboksa yoso nap min-e nandug-et iri me mbo inpil nggwij-o. It iri andi bandi kagolar-e, lengge-nen kubu-nen pem-et woralik nalik wolma-o.

¹¹Iri luk, an yik kaginggal-e, nagawan-nen koreyak woraso ondoro loro nggulok iri min ebem koreyak woraso nap min kagi-o. Nde, at iri eram-nen nggweyak min mbal min-e lak yosolar-e, ondoro min-et mondok lak yij-o.

¹²Nde, an yik kaginggal-e, wat yidnak nap nggulok min marik min nagawan-nen koreyak woraso ondoro iri urugwe nggwe mendak woragola eneyagi-o. Engga kwarat ereba na punggutlug-e, engga misik, unluk nak wolmomtak engga iri na pinggirij-o. Ponggorosola-ge, at wat yidnak nap ereba na-nen it woragolat-nen kwarogolat woraidnak engga kwarat ereba na arem mbarak worasu ereba na ndak ndag-et enpem wene mbarij-o.

¹³Iri luk, ap yi koma arem-nen wat yidnak woragwi na yi koma-nen pilana inpil wasolat, wat yugwi elem min ap wat luk ndok wiril mbugwi sa min-nen-e wat yidnak nap iri me woragwi na inpil luwagaij-o. Inpil luwarug-e, it pidsa it-nen kwarogolat woraidnak na ndak ndag-et enpem wene mbarij-o.

¹⁴Iri luk, wat yugwi elem min wat luk ndok wiril mbugwi sa min-e kan mare arem mbo bil nggwij-o. (Nde, kan mare arem iri-ge mberen pem tak posolat wat yugwi elem-nen yusu-o.)

¹⁵Nde, unluk nak wolmomtak engga arem unnu mbarigit lak nab-e kan mare arem mbo inpil nggwij-o.