Read Nduga NAM PARA WENE 3 Bible Online

NAM PARA WENE 3 - Nduga bible

NAM PARA WENE 3

¹“Sarandis woragwi lambuk tak inpidnak nap-nen idnak aid nap amanggim-e yu nggal mbari-o: Nde, wene yu-ge Mbal Pem Nagawan indi tuju min wonaru tuju min iri tena worasu nap-nen yidnak wene-o. Kit-nen kwatli an-e naru-o. Kir-e wat yidnak woragola-t nde, kunluk worali-o luk yak kindili-o.

²Iri bem-e, kir-e kinndi pengge luk, kit kendam worasu mende-ge erengen nigi yigit lak ma-net amawi rak per-o. Kit-nen kwatli mende-ge an-nen yik kasolar-e, an Nembal Pem Nagawan erengen pem-e misiger-o luk tet mondok iminep mbarak lak yik kasu-o.

³Iri bem-e, kit-nen-e nanduk mirik kinpidnak wene kuligep na-ge tuguruk kwara yebet ker-o. Yebet karug-e, wene iri-nen yidnak yidnak kwarogolar-e, kit meya yidnak keya buruk, kondok yer-o. Nde, kir-e kunluk yigit lak ala-ge, an-e yariya wanugwi nap nggal kendam lobok yimin tarem iri-ge kir-e kabag-et woragub-o.

⁴Alat nde, kit Sarandis woragwi nap kennggendumu ap ereb-e it unsum kik tak pul naru kwara yik karok woragwi na woralir-o. Nde, it iri-ge mondok enpam ala karuk, unsum loro yirik an nimin nuwa-o.

⁵Amawi luk ombol nggwe yuwa nap iri-ge iri nggal kwasa sum loro yirik wolma-o. Nde, unlug-et wolmomtak engga bem-nen it unnu kurik pimin pug-o. An Neid min at-nen idnak aid nap min inmbiri bem ‘It iri-ge an narengge-net yili-o’ luk nam-et para yimin-o.

⁶Ta-nen nde eyanggo worak ala-ge, Konak Indi-nen lambuk tak inpidnak nap yak undusu wene yu kuluwag-o!”

⁷“Pilandelpia woragwi lambuk tak inpidnak nap-nen idnak aid nap amanggim-e yu nggal mbari-o: Nde, wene yu-ge ndemeret marak nap iri-nen yusu wene-o. Nde, at iri-ge Ndaud-nen idnak tu imig worak pugwi tena woraso-o. Nde, at-nen nde tu kuwarak posoma-ge, ap misiger-o luk-nen lerak purag-e meya-o. Nde, at-nen tu lerak posoma-ge, ap misiger-o luk-nen kuwarurag-e meya-o.

⁸Kit-nen kwatli iri-ge an-e naru-o. Kit kenmawi marig-et alat nde, an-nen mul kindidnak wene wanogolar-e, an-nen yidnak yidnak kundugu kwarogolat woraigeb-o. Nde, an-nen kit kenmanggim tu misik kuwarak pigi iri-ge ap misiger-o luk-nen lerak purag-e meya-o.

⁹Kenaru wolmer-o! Sere ilirak iri-ge ir-e Yawuri nab-e lag-et nde ennesiget: ‘Nir-e Yawuri nab-o’ luk yili-o. An-nen it iri kwat onposolar-e, kit kendam lobok luk, kentalu tud luk, kentembel wanugwi nap tak inpimin-o. Iri kwarogolar-e, an-nen kit kenabuwa kaso iri-ge enaru yuwa-o.

¹⁰Kir-e an-nen: ‘Mamak puruk wolmer-o’ yak kindigi wene na ndak ndag-et mamak puruk woraigepndik me, nggweyak ma nap oboksa inndi ngareyekluk, nggweyak ma nap oboksa enpem anggun panggun mende mbuma tarem-e an-nen-e kinmiri yimin-o.

¹¹An-e ndag-et nak lobok yimin-o. Nde, kit-nen ombol nggwe yidnak pem onggo wok kundurak mende na nin nap-nen mengga wanuwa naru, kit-nen wanigep mende iri-ge puksa tena wolmer-o.

¹²Amawi luk ombol nggwe yuwa nab-e an-nen-e an Nembal Pem Nagawan uwi ndum tak ibimin-o. Ubumu-ge, iri me-nen kona mburuwa bug-o. Nde, Nembal Pem Nagawan unu min Nembal Pem Nagawan uwi siri Yerusalem ngget Nembal Pem Nagawan eram aid arem-nen mbuma iri na unu min an nunu ngget min-e at ebem mbarimin-o.

¹³Ta-nen nde eyanggo worak ala-ge, Konak Indi-nen lambuk tak inpidnak nap yak undusu wene yu kuluwag-o!”

¹⁴“Laorikia woragwi lambuk tak inpidnak nap-nen idnak aid nap amanggim-e yu nggal mbari-o: Nde, wene yu-ge mot mot lud tak nak konggoroso nap, Mbal Pem Nagawan-nen ndak worak pidnak mende oboksa tel koroso Amin-nen yidnak wene-o.

¹⁵Kit-nen kwatli iri-ge an-e naru-o. Kir-e embem na lak, kol na lak worali iri-ge an-e naru-o. Nde, kir-e embem-a? Are, kol-a? Nggal woragolar-e ob-et nde,

¹⁶kir-e embem na lak, kol na lak, kol-a? Embem-a? We enggendumu yat worali me, an nemendam-nen kela keya kinpimin-o!

¹⁷Kit-nen yogolar-e: ‘Nit nenarengge kwarat, yi mende ndi mende ombo-nen yili-o. Nit-nen lak mende misik nendam worasu bug-o’ luk yili-t nde, kir-e kinpinil konmbomo na lak, we kunsu nggwarak worali iri-ge kenaru buk worali-o. Kinsilobulo na lak, kenlengen na ngguru, kunsum na lak, we koro nderak worali-o luk kenaru bug-o.

¹⁸Iri bem-e, an-nen nggomo kendeyeg-o. Kir-e ndemeret kinsilobulo worak nap yobok-nen kopkap mondok lak emas posid iri-ge an nebem onggo pogolat, kunsum we koro nderak woragolat, kinnggiri kagwi mende iri lomorobokluk, sum loro an nebem onggo pogolat, kenlengen pasa nomosa yik kabok-nen kenlengen pem yugururak amburu an nebem onggo per-o.

¹⁹An-nen enabuwa kaso nab-e nggomo nggal eneyanggo wat makluk linggamburok ondoso-o. Iri bem-e, kir-e kenmawi kunduruk, kit meya yidnak keya buruk, kondok yer-o.

²⁰Yu ker-o. An-e tumende bem men yigirik, tu lel lel kasu-o. Ap mbi-nen an nene kuluruk, tu kuwarak posola-ge, an-e at ama nggwimindik, at imin totno nonggolat, nde, at-nen na an totno nonggolat wulmul-o.

²¹An na namawi luk ombol nggwe yigirig-e, an Neid nagawan koreyak woraso ondoro iri me at eralu koreyak worasu iri nggal-et amawi luk ombol nggwe yuwa nab-e an-nen-e nagawan an koreyak woraso ondoro iri me an neralu koreyak ibimin-o.

²²Ta-nen nde eyanggo worak ala-ge, Konak Indi-nen lambuk tak inpidnak nap yak undusu wene yu kuluwag-o!”