Read Nduga NAM PARA WENE 7 Bible Online

NAM PARA WENE 7 - Nduga bible

NAM PARA WENE 7

¹Iri luk, yik kaginggal-e, aid nap empat iri-ge o nggweyak unggut empat manda mendak woragolar-e, nggweyak pem min yi koma bem min e bem min obube puk kujwa naru, aid nap empat iri-nen-e nggweyak ma woraso obube empat iri tena woragola, eneyagi-o.

²Nde, yik kaginggal-e, mo luwaso sa nggwe-nen aid nap misig-e, uruk nak woraso Mbal Pem Nagawan-nen idnak lop nok tak pugwi mende waruk lobok yosola, kagi-o. Nde, at iri na-nen-e nggweyak min yi koma min meya rak purak amawi Mbal Pem Nagawan-nen ininggem pidnak aid nap empat ereya na ene nggoksa wene mbo inpij-o.

³Aid nap iri na-nen yosolar-e: “Nit-nen-e Mbal Pem Nagawan ndegel ubugwi nap na yenggerak unpuwakluk, it inmbiriwak pem lop nok tak pugwi mende iri pigit lak ma-ge, kir-e nggweyak min yi koma min e min-e meya rak purak pug-o” luk yak indij-o.

⁴Iri luk, an kuliginggal-e ap lambuksa seratus empat pulu empat ribu (144,000) iri-ge Mbal Pem Nagawan-nen idnak lop nok tak pugwi mende-ge it inmbiriwak pem pidnak wene yak niriga-o. Nde, ap ereba-ge Isarael nap enlem duabelas ennggendumu-nen ya lit nda lit wok inpidnag-o.

⁵Nde, wok onpogolar-e, Isarael nap enlem duabelas na ennggendumu-nen duabelas ribu duabelas ribu wonarag-o. Iri-ge enlem Yewura, Uruben, Nggat,

⁶Aser, Naptali, Manase,

⁷Simeon, Lewi, Isakar,

⁸Sebulon, Yusup, Mbenyamin ennggendumu-nen ya lit nda lit nak wonarag-o.

⁹Iri luk, yik kaginggal-e, ap kwarat ndok worak, wanat unpurak mondok meya irit eneyagi-o. It iri na-ge ap enlem oboksa min ap enlem ndomok oboksa min ab-e ap oboksa min ap enne oboksa min ndok worak ereba na-ge nagawan koreyak woraso ondoro na min Lomba Wam Marik na min urugwe nggwe mendak woragolar-e, unsum loro yutluk, mbari angga ininggem tena woraiga-o.

¹⁰It enne ngguloksa yogolar-e: “Nit ninmiri yoso elem-e nit Nenmbal Pem Nagawan koreyak woraso ondoro ebem koreyak worasu iri min Lomba Wam Marik min endam nak-nen lobok yoso-o!” luk yiga-o.

¹¹Nde, aid nap oboksa-ge nagawan koreyak woraso ondoro min enne kulugwi nap min untugup worak mende empat ereya na min lop lop worak unpuruk, mendak woragolar-e, aid nap ereba na-ge nagawan koreyak woraso ondoro eralu entare nggwe yud tud mbogolat, Mbal Pem Nagawan erembel wanogolat-nen

¹²yogolar-e: “Amin-o! Nit Nenmbal Pem Nagawan iri-ge erembel wanogolat, at nak kek tak pogolat, indi nggat nggat worak-nen yusu-o. Nit Nenmbal Pem Nagawan iri-ge at nak wiwa-o yak togolat, at ambigit nak tebe yogolat yurak Mbal Pem Nagawan iri-ge o tena buruk wolmomtak amawi min amawi worak pem-et woralik nalik woraso Mbal Pem Nagawan-nen yusu-o. Amin-o!” luk yiga-o.

¹³Enne kulugwi nap misik-nen an kin wok nobosolar-e: “It unsum loro yirik yeba-ge ta rag-o? Ngge me-nen lobok yidnag-o?” luk kin wok nibij-o.

¹⁴Yosoloma-ge, an-nen wene iri erep nggarosolar-e: “Nap wa-e. An naru bug-o. Kat perak nde karu-o” luk yosolakmu, at-nen yak norosolar-e: “Ap yeba-ge andi bandi mende nggulok it enpem mbidnag-et nde, ob-et woraidnak nab-o. It unsum marogolar-e, Lomba Wam Marik eyabi bem-net unsum-e masa loro rak pidnag-o.

¹⁵Iri kwaridnak me, ir-e Mbal Pem Nagawan koreyak woraso ondoro urugwe nggwe mendak woragolar-e, lengge-nen na, kubu-nen na, Mbal Pem Nagawan ama marak na me at ndegel obogolat worali-o. Nde, nagawan koreyak woraso ondoro ebem koreyak worasu nap na-ge it wosarak unpuruk worayekluk, it inmin wolma-o.

¹⁶It iri na-ge mburu nere min yi nere min tuguruk kujwa bug-o. Mo eyak kwarat-nen tuguruk nok unpuwa bug-o.

¹⁷Iri kwat unpuwa iri-ge nagawan koreyak woraso ondoro bem enggendumu worasu Lomba Wam Marik iri-ge at olomba wam iri yik eneyarok woraso nap kwatluk, wok unpuruk, unluk nak wolmomtak yi pilana waso sa inmin mburuwa-o. Nde, Mbal Pem Nagawan-nen-e iniyip lengen oboksa ndogwarak unpuwa-o” luk yij-o.