Read Nduga NAM PARA WENE 8 Bible Online

NAM PARA WENE 8 - Nduga bible

NAM PARA WENE 8

¹Lomba Wam Marik-nen lop nok tak pugwi mende imbirik (yang ketuju) iri ponggorosola-ge, aid arem-e setenga jam nggal (30 menit) yi ne lak ndi ne lak woragaij-o.

²Iri rak puruk, yik kaginggal-e, Mbal Pem Nagawan eram mendak woragwi aid nap tuju iri eneyagi-o. Nde, it iri-ge posid poba tuju wok indij-o.

³Nde, aid nap nin mbi-ge emas-nen konidnak emben konak mende yarak pugwi yimbe tena, Mbal Pem Nagawan amanggim wam wosa pugwi sa iri me lobok yarik, mendak woragaij-o. At iri wok tosolar-e, emben konak mende amburu kwarat wok tij-o. Nde, iri wok tid iri-ge, Mbal Pem Nagawan winde nap oboksa-nen tepan yidnak wene min nambek tak puruk, nagawan koreyak woraso ondoro eralu woraso Mbal Pem Nagawan amanggim wam wosa pugwi sa iri me-nen at amanggim puwakluk wok tij-o.

⁴Emben konak mende iri kan pidnak kule lasolar-e, Mbal Pem Nagawan winde nap-nen tepan yidnak wene na min lambuksa lasolar-e, Mbal Pem Nagawan eram mendak woraidnak aid nap na inggem-nen lagaij-o.

⁵Iri rak puruk, aid nap na-nen yimbe na wanuruk, Mbal Pem Nagawan amanggim wam wosa kan pugwi sa-nen kan ngen waga yimbe na arem yarak puruk, nggweyak ma mbo bil mbuwagaij-o. Mbo bil mbuwagaidnggal-e, o nggu ngak yosolat, obinel yebek yebek yosolat, o lele yij-o.

⁶Iri luk, posid poba tuju tena woraiga aid nap tuju iri-nen-e onpoba ene pu yuwokluk lid lud pogolat woraiga-o.

⁷Aid nap nandug-et (yang pertama) iri-nen-e at oboba ene pu yosola-ge, talme engen min kan amare min-e mep min nat karuk nggweyak pem nggilara mbuwagaij-o. Nggweyak erep menggesa (sepertiga) kan nasolat, e na erep menggesa (sepertiga) min tusuwangge miri oboksa min kan ninggij-o.

⁸Iri luk, aid nap imbirik (yang kedua) iri-nen oboba ene pu yosola-ge, ndobo nggulok nggal mbi amare yosola, amare kundugu yi koma arem mbo bil nggwij-o. Mbo bil nggosola-ge, yi koma erep menggesa (sepertiga) na-ge mep tam yosolat,

⁹urugup worak mende yi koma arem woraso na erep menggesa (sepertiga) wat yosolat, e koma erep menggesa (sepertiga) na lak yij-o.

¹⁰Iri luk, aid nap imbirik (yang ketiga) iri-nen oboba ene pu yosola-ge, wonaru nggulok misig-e tal pago nggal mbal pem-nen mbuwasolar-e, yi min yi ulusu min erep menggesa (sepertiga) ebem mbuwagaij-o.

¹¹(Wonaru iri unu-ge Ngari worag-o.) Nde, yi erep menggesa (sepertiga) ngari worak yosola, yi ngari yidnak me, yi iri ninggidnak nap kwarat wat yiga-o.

¹²Iri luk, aid nap imbirik (yang keempat) iri-nen oboba ene pu yosola-ge, mo erep menggesa (sepertiga) lel kasola, waneya erep menggesa (sepertiga) min wonaru erep menggesa (sepertiga) min lel kaidnak me, yaya erep menggesa (sepertiga) ndamuk yosola-ge, lengge erep menggesa (sepertiga) min kubu erep menggesa (sepertiga) min yaya lak, ndamuk irit woragaij-o.

¹³Iri luk, yik kaginggal-e, towe ud mbi mondok teram abu yebaluk waring kasolat-nen ene ngguloksa yosolar-e: “Enabuwa-o! Enabuwa-o! Nggweyak ma yu wolma nap oboksa-ge aid nap erep kenan iri-nen onpoba ene pu yogola kuluwa nab-e mondok enabuwa-o!” luk yosola, kuligi-o.