Read Nepali-पवित्र बाइबल अय्यूबको पुस्तक 16 Bible Online

अय्यूबको पुस्तक 16 - Nepali-पवित्र बाइबल bible

अय्यूबको पुस्तक 16

¹तब अय्यूबले जवाफ दिए,

²“मैले पहिलाबाट यी कुराहरू सुनेको हुँ। तिमीहरू तीनजनाले मलाई दुःख दिइरहेकाछौ, सान्तवना होइन।

³तिमीहरूका लामा भाषणहरू कहिले सिद्धिने होइनन्। किन तिमीहरूको तर्कहरू तन्काई रहन्छौ?

⁴तिमीहरूले भनेकै कुराहरू म पनि भन्न सक्थें यदि तिमीहरूसँग मेरो जस्तै सङ्कटहरू भए। म तिमीहरूलाई ज्ञानी कुराहरू सुनाउन सक्थें अनि मेरो टाउको तिमीहरूतिर हल्लाउथें।

⁵तर म तिमीलाई उत्साह दिउँला, अनि मैले भनेका कुराहरूसँग आशा जगाई दिउँला।

⁶“मैले जे भने पनि मेरो पीडा केहीबाट हरण हुने छैन, तर चुपचाप बसिरहनु पनि लाभ छैन।

⁷हे परमेश्वर, साँचो रूपमा, तपाईंले मेरो शक्ति लैजानु भयो। तपाईंले मेरो सबै परिवार तहसनहस पारिदिनु भयो।

⁸तपाईंले मलाई दुब्लो-पातलो बनाइदिनु भयो, अनि मानिसहरूलाई त्यसले मलाई दोष्याउने कारण उब्जाउँछ।

⁹“परमेश्वर क्रोधित हुनुभयो, अनि मेरो शरीरलाई एउटा सिंहले झैं आक्रमण गर्नु भयो। मेरो शरीर टुक्रा-टुक्रा पारी च्यात्नु भयो। अनि मेरो शत्रुहरूले मलाई तिनीहरूको घृणित नजरले हेरे।

¹⁰मानिसहरूले मेरो वरिपरि थुप्रेर, तिनीहरूले मलाई हाँसोको पात्र बनाए अनि थप्पड लगाए।

¹¹परमेश्वरले मलाई दुष्ट मानिसहरूकहाँ दिनु भयो। मलाई दुःख दिओस् भनेर उहाँले कुकर्मीहरूलाई छोडी दिनुभयो।

¹²जबसम्म परमेश्वरले मलाई घाँटीमा समात्नु भएन अनि मलाई टुक्रा-टुक्रा पार्नु भएन तबसम्म प्रत्येक कुरो राम्रै भइरहेको थियो। तब उहाँले मलाई पहिलेकै अवस्थामा ल्याउनु भयो र मलाई उहाँको तारोको रूपमा प्रयोग गर्नुभयो।

¹³परमेश्वरका धनुर्धारीहरू मेरो वरिपरि छन्। उहाँले मेरो मिर्गौलामा काँढले हान्नु भयो। उहाँले ममाथि दया देखाउनु भएन उहाँले मेरो पित्त भुईंमा फुटाउनु भयो।

¹⁴घरिघरि परमेश्वरले मलाई आक्रमण गर्नुहुन्छ। उहाँ एक सिपाही युद्धभूमिमा दौडे जस्तो दौड्नु हुन्छ।

¹⁵“म अत्यन्त उदास छु, यसैले म त्यस्ता उदासी पोषाकहरू लगाउँछु। म यहाँ धुलोमुलो र खरानीको थुप्रोमा बस्छु, अनि म पराजित भएको ठान्छु।

¹⁶रूँदा-रूँदा मेरो अनुहार रातो भइसक्यो। मेरो आँखा वरिपरि कालो गोलो रेखाहरू छन्।

¹⁷मैले कसैलाई नोक्सान गरेको छैन। तर त्यस्ता अप्रिय घटनाहरू मकहाँ आई लाग्यो। मेरा प्रार्थनाहरू उचित र चोखा छन्।

¹⁸“पृथ्वी, गल्ती कुराहरू नलुकाऊ जुन ममाथि आइपर्यो। मेरो न्यायको पुकारलाई नरोक।

¹⁹अहिले पनि त्यहाँ स्वर्गमा कोही छ जो मसँग बोल्नु हुन्छ। त्यहाँ माथि कोही त छ जसले मेरो लागि साक्षी दिनेछ।

²⁰मेरो साथीहरूले मलाई हप्काउँछ। मेरा आँखहरूबाट परमेश्वरका निम्ति आँशु बग्छ।

²¹तर परमेश्वर अघि उसले मेरो विषयमा साथीको लागि न्याय गरिदिने मानिसले झैं बोलिदिन्छ।

²²“केही बर्षमा म नफर्किने ठाउँमा जानेछु।