Read Nepali New Revised Version, 2012 २ शमूएल 16 Bible Online

२ शमूएल 16 - Nepali New Revised Version, 2012 bible

२ शमूएल 16

¹दाऊद डाँड़ाको टाकुराबाट अलिक पर मात्र पुगेको बेलामा मपीबोशेतको नोकर सीबासँग तिनको भेट भयो। त्‍यसले आफूसँग दुई सय रोटी, एक सय झुप्‍पा किसमिस, नेभाराका एक सय डल्‍लो र एक मशक दाखमद्य जीन-लगाम कसेका एक हूल गधामा बोकाएर ल्‍याएको थियो।

²राजाले सीबालाई भने, “तिमीले यी सबै किन ल्‍यायौ?” सीबाले जवाफ दियो, “यी गधाहरूचाहिँ राजाका परिवारका सवारीको निम्‍ति हुन्, रोटी र फलहरू जवान मानिसहरूलाई खानका निम्‍ति र दाखमद्यचाहिँ मरुभूमिमा थाक्‍नेहरूका निम्‍ति हो।”

³राजाले सोधे, “तिम्रा मालिकका नाति कहाँ छन्‌?” सीबाले भन्‍यो, “उनी त यरूशलेममा नै छन्, किनभने इस्राएलको घरानाले उनलाई आफ्‍ना बाजेको सिंहासन फिर्ता गरिदिनेछ भनी उनले सम्‍झेका छन्‌।”

⁴राजाले सीबालाई भने, “मपीबोशेतका सबै थोक तिमीले पाउनेछौ।” सीबाले भन्‍यो, “हे हजूर, मेरा महाराज, म त हजूरको एक क्षुद्र दास हुँ। हजूरको दृष्‍टिमा निगाह पाऊँ।”

⁵जब दाऊद राजा बहूरीममा आइपुगे तब त्‍यहाँ शाऊलका घरानाको एक जना मानिस, गेराको छोरो शिमी, निस्‍केर दाऊदलाई सराप्‍दैआयो।

⁶त्‍यसले दाऊद र तिनका सबै अधिकारीहरूलाई जथाभाबी ढुङ्गाले हान्‍न लाग्‍यो। दाऊदका देब्रे र दाहिनेतिर तिनका सिपाही र अङ्गरक्षकहरू थिए।

⁷शिमीले यसो भनेर दाऊदलाई सराप दियो, “जा, जा, ए बदमाश! ए हत्‍यारा!

⁸शाऊलको घरानामा रगत बगाएर उनको स्‍थानमा राज्‍य गर्न खोज्‍ने तँमाथि आज परमप्रभुले बदला लिनुभएको चाहिँ हो, र त्‍यो राज्‍य अब परमप्रभुले तेरो छोरो अब्‍शालोमलाई दिनुभयो। तँ आज बरबाद भइस्, किनभने तँ हत्‍यारा होस्‌!”

⁹तब सरूयाहका छोरा अबीशैले राजालाई भने, “हजूर, यो मरेको कुकुरले किन हजूरलाई सराप्‍ने? म पारि गएर त्‍यसको टाउको उड़ाइदिनेछु।”

¹⁰तर राजाले भने, “ए सरूयाहका छोराहरू हो, तिमीहरूलाई मसँग के सरोकार? यदि परमप्रभुले दाऊदलाई त्‍यसले सरापोस्‌ भनी भन्‍नुभएको छ भने कसले त्‍यसलाई रोक्‍न सक्‍छ?”

¹¹दाऊदले अबीशै र आफ्‍ना सबै अधिकारीहरूलाई भने, “यदि मेरो छोरा, मेरो आफ्‍नै छोराले मलाई मार्न खोज्‍छ भने यस बेन्‍यामीनी त के कुरा गर्नु? त्‍यसलाई छोड़िदेओ। त्‍यसले सरापोस्‌। किनभने परमप्रभुले नै त्‍यसलाई त्‍यसो गर्नू भनी भन्‍नुभएको होला।

¹²शायद आजको दिन मलाई यो सरापको सट्टा परमप्रभुले मेरो कष्‍ट हेर्नुहुनेछ र मलाई आशिष्‌ दिनुहुनेछ।”

¹³यसैले दाऊद र तिनका मानिसहरू आफ्‍नो बाटो लागे, र शिमीचाहिँ दाऊदको बाटोमा परेको पारिपट्टिको डाँड़ै-डाँड़ा गयो, र जाँदा दाऊदतिर सराप्‍दै र ढुङ्गा हान्‍दै र धूलो फ्‍याँक्‍दैगयो।

¹⁴राजा र तिनीसँग भएका सबै मानिसहरू आफ्‍नो गन्‍तव्‍यमा लखतरान भई पुगे। अनि त्‍यहाँ तिनले आफूलाई ताजा बनाए।

¹⁵यसै बीचमा अब्‍शालोम र तिनीसँग भएका सबै इस्राएलीहरू यरूशलेममा पुगे, अनि अहीतोपेल पनि तिनीसँग थिए।

¹⁶तब दाऊदका मित्र अरकी हूशैले अब्‍शालोमलाई भेटे, र तिनलाई भने, “राजा दीर्घायु होऊन्‌! राजा दीर्घायु होऊन्‌!”

¹⁷तर अब्‍शालोमले जवाफ दिए, “तिम्रा मित्रलाई देखाएको प्रेम यही हो? तिमी उहाँसँग किन गएनौ?”

¹⁸हूशैले अब्‍शालोमलाई जवाफ दिए, “परमेश्‍वरले चुन्‍नुभएका मानिस, जनता र इस्राएलका सारा मानिसहरूले चुनेका व्‍यक्तिसँग लाग्‍ने विचार मैले गरेको छु। अनि म तिनीसँगै बस्‍नेछु।

¹⁹फेरि मैले कसको सेवा गर्ने? के छोराको सेवा गर्नुपर्दैन र? जस्‍तो मैले तपाईंका पिताको सेवा गरें, त्‍यस्‍तै म तपाईंको सेवा गर्नेछु।”

²⁰अब्‍शालोमले अहीतोपेललाई भने, “हामीलाई तपाईंको सल्‍लाह दिनुहोस्‌। हामीले कसरी काम गर्नुपर्ने हो?”

²¹अहीतोपेलले जवाफ दिए, “तपाईंका पिताले महलको जिम्‍मेवारीमा छोड़िगएका तपाईंका पिताका उपपत्‍नीहरूसित सहवास गर्नुहोस्‌। तब तपाईंले आफ्‍ना पिताको नाक काटिदिएको काम सबै इस्राएलले सुन्‍नेछन्, र तपाईंको पछि लाग्‍नेहरूको हात अझै बलियो हुनेछ।”

²²यसैले तिनीहरूले कौसीमा अब्‍शालोमको निम्‍ति एउटा पाल टाँगिदिए, र सबै इस्राएलले देख्‍ने गरी तिनी आफ्‍ना बुबाका उपपत्‍नीहरूसित सुते।

²³ती दिनहरूमा अहीतोपेलको सल्‍लाहचाहिँ परमेश्‍वरसँग सोधपूछ गर्नेको जस्‍तै नै मानिन्‍थ्‍यो। दाऊद र अब्‍शालोमले अहीतोपेलका सल्‍लाहलाई त्‍यतिसम्‍म कदर गर्थे।